وحدت نیوز(کوئٹہ) مجلس وحدت مسلمین پاکستان کے مرکزی سیکرٹری تنظیم مقصود علی ڈومکی نے سویڈن میں قرآن پاک کی بے حرمتی کی مذمت کرتے ہوئے کیا ہے کہ حکومت فوری طور پر سویڈن کے سفیر کو ملک بدر کرے کیونکہ 2009 سے لے کر اب تک یورپ میں 360 سے زائد مرتبہ قرآن کریم کی بے حرمتی کی گئی ہے۔ سویڈن کی متعصب عیسائی حکومت دنیا بھر میں مسلم عیسائی خونی فسادات کی آگ بھڑکانا چاہتی ہے۔ پاکستان کے تمام علماء کرام سے مطالبہ ہے کہ 7 جولائی جمعہ کو اپنے خطبات میں قرآن پاک سے تمسک کے طور پر منا کر اسلام دشمنوں کے ناپاک عزائم کو بے نقاب کیا جائے۔ یہ بات انہوں نے شیعہ علماء کونسل کے رہنماء علامہ سید محمود رضا اخلاقی، مولانا فضل ربی، ایم ڈبلیو ایم کے صوبائی صدر علامہ سہیل اکبر شیرازی، ایم ڈبلیو ایم علمدار روڈ کے صدر ارباب لیاقت علی ہزارہ، سید ابراہیم اور دیگر کے ہمراہ کوئٹہ پریس کلب میں پریس کانفرنس کرتے ہوئے کہی۔

انہوں نے کہا کہ سویڈن کے دارالحکومت اسٹاک ہوم کی مسجد کے باہر عید الاضحی کو قرآن پاک کو نذرآتش کرنے کی اجازت سویڈن عدالت نے دی۔ قرآن پاک کی بے حرمتی سے 2 ارب مسلمانوں کے دل چھلنی ہوئے ہیں۔ پچھلے 14 سالوں میں یورپ اور امریکہ میں اسلام قبول کرنے والوں کی شرح 3 فیصد سے بڑھ کر 8 فیصد تک جا پہنچی ہے۔ غیر یورپی ممالک جس میں امریکہ سرفہرست ہے میں تیزی سے اسلام پھیل رہا ہے۔ جاپان جہان 2000 تک ٹوکیو میں صرف ایک مسجد تھی، آج پورے جاپان میں 4 ہزار 1 سو مساجد ہیں۔ روس جہاں قرآن مجید کی تلاوت پر پابندی اور نماز پڑھنا جرم تھا۔ آج سائبیریا، بلغاریہ، ماسکو میں 300 سے زائد مساجد ہیں۔ اس طرح کے اوچھے ہتھکنڈوں سے اسلام مزید مضبوط ہوتا جا رہا ہے۔ انہوں نے توہین قرآن کریم جیسے شرمناک عمل کی پرزور مذمت کرتے ہوئے مسلم ممالک سے مطالبہ کیا کہ وہ اپنے ملکوں سے سویڈن سفیر کو احتجاجاً ملک بدر کریں اور تمام اسلامی ممالک اور مسلم امہ سویڈن مصنوعات کے مکمل بائیکاٹ کا اعلان کریں۔

پاکستان کے کروڑوں شہری سمجھتے ہیں کہ حکومت پاکستان کا صرف مذمتی بیان ناکافی ہے۔ ہم حکومت پاکستان سے مطالبہ کرتے ہیں کہ اسلام آباد میں متعین سویڈن سفیر کو فی الفور ملک بدر کیا جائے۔ سویڈن کی متعصب عیسائی حکومت دنیا بھر میں مسلم عیسائی خونی فسادات کی آگ بھڑ کانا چاہتی ہے۔ اقوام متحدہ سویڈن میں آخری مقدس کتاب قرآن کریم اور انبیاء اکرام علیہ اسلام کی بے حرمتی کا نوٹس لے اور قرآن کریم کی توہین کو سنگین جرم قرار دیتے ہوئے قانون سازی کرے۔ قرآن کی جس طرح توہین سویڈن نے سرکاری سطح پر کی، اس سے تو قرآن مجید کے ایک حرف کو فرق نہیں پڑا لیکن مغرب کی اخلاقی تاریخ کے سیاہ دھبوں میں ایک بڑے دھبے میں اضافہ ہوا ہے۔ انہوں نے پاکستان کے تمام علماء کرام سے مطالبہ کیا کہ 7 جولائی بروز جمعہ اپنے خطبات میں قرآن پاک سے تمسک کے طور پر منا کر اسلام دشمنوں کے ناپاک عزائم کو بے نقاب کیا جائے اور حکومت سوئیڈن کے سفیر کو ملک بدر کرے۔

وحدت نیوز(ملتان) مجلس وحدت مسلمین پاکستان عزاداری ونگ کے مرکزی صدر ملک اقرار حسین علوی نے کہا ہے کہ عزاداری سید الشہداء ہماری بنیادی اساس ہے اور ہماری بقاء کی ضامن ہے، ایام عزاداری حقیقی طور پر تبلیغ کے ایام ہیں، محرم اور صفر میں معنوی، فکری، اخلاقی اور نظریاتی تربیت کا بہترین موقع ہوتا ہے یہی وجہ ہے کہ دشمن عزاداری سے خائف ہے، طرح طرح کے ہتھکنڈے استعمال کرکے عزاداری کی واہ میں رکاوٹیں پیدا کرتا ہے، ہمیں ان ایام عزا کو بطور طاقت استعمال کرنا چاہیے اور پیغام محمد وآل محمد کو عام کرنا چاہیے۔

 ان خیالات کا اظہار اُنہوں نے ملتان میں ایم ڈبلیو ایم عزاداری ونگ جنوبی پنجاب کے زیراہتمام منعقدہ تحفظ حقوق تشیع کانفرنس و چہلم شہدائے پاراچنار کی مناسبت سے اجتماع سے خطاب کرتے ہوئے کیا۔

 ملک اقرار حسین علوی نے مزید کہا کہ ہم عزاداروں کے تحفظ کے لیے ہر ممکن کوشش کریں گے، جنوبی پنجاب عزاداری کا گڑھ ہے لیکن بدقسمتی ہے یہاں آئے روز مسائل پیدا کیے جاتے ہیں۔

وحدت نیوز(ملتان)مجلس وحدت مسلمین عزاداری ونگ جنوبی پنجاب کے زیراہتمام امام بارگاہ سائبان زہرا میں ''تحفظ حقوق تشیع کانفرنس و چہلم شہدائے پاراچنار کی مناسبت سے نمائندہ اجتماع منعقد ہوا۔

جس میں مجلس وحدت مسلمین پاکستان کے سربراہ علامہ راجہ ناصر عباس جعفری، ایم ڈبلیو ایم عزاداری ونگ کے مرکزی صدر ملک اقرار حسین علوی، ایم ڈبلیو ایم یوتھ ونگ کے مرکزی جنرل سیکرٹری علامہ اعجاز حسین بہشتی، مرکزی ڈپٹی جنرل سیکریٹری سلیم عباس صدیقی،مجلس علمائے مکتب اہلیبیت کے مرکزی رہنما علامہ اصغر عسکری، ایم ڈبلیو ایم عزاداری ونگ جنوبی پنجاب کے صدر و ممبر ڈویژنل امن کمیٹی انجینئر سخاوت علی سیال، ایم ڈبلیو ایم جنوبی پنجاب کے صدر علامہ اقتدار حسین نقوی، مجلس علمائے مکتب اہلیبیت جنوبی پنجاب کے صدر علامہ قاضی نادر حسین علوی، علامہ غلام مصطفیٰ انصاری، علامہ وسیم عباس معصومی، علامہ ظفر حسین حقانی، انجمن تحفظ عزاداری کے رہنما سہیل حسنین بھٹہ، مخدوم حسن رضا مشہدی، حسنین بخاری، شاہد حسین زیدی، آفتاب کریم گردیزی، عزاداری ونگ جنوبی پنجاب کے رہنما سردار صفدر حسین خان، عون رضا انجم، سید ظفر عباس زیدی، سید وسیم زیدی، دلاور زیدی سمیت دیگر عزاداروں، بانیان مجالس، منتظمین جلوس، لائسنسداران اور نوحہ خواں حضرات نے بڑی تعداد میں شرکت کی۔

اجتماع میں جنوبی پنجاب کے مختلف اضلاع سے علماء نے بڑی تعداد میں شرکت کی۔ اس موقع پر رہنمائوں نے اپنے خطابات میں فلسفہ غدیر اور محرم کے حوالے سے گفتگو کی۔ رہنمائوں نے آمدہ محرم الحرام کے حوالے سے تیاریاں تیز کرنے کی ہدایت کرتے ہوئے کہا کہ اپنی صفوں میں اتحاد قائم کریں اور دشمن کے عزائم کو ناکام و نامراد بنائیں۔