The Latest
وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے اپنے بیان میں کہا ہے کہ ایک مخصوص سوچ کو مسلط کرنے کی کوشش میں گلگت بلتستان کی حکومت کے ساتھ جو غیر قانونی و غیر اخلاقی کھیل کھیلا جا رہا ہے، وہ گلگت بلتستان کی غیرت مند، شجاع اور محب وطن عوام کی توہین ہے۔ جی بی کے عوام کے جمہوری کردار کو سبوتاژ کر کے کسی بھی امپورٹڈ ایجنڈے پر عملدرآمد کا خمیازہ گلگت بلتستان سمیت پورے ملک کو بھگتنا پڑ سکتا ہے، اس حساس علاقے میں اس طرح کی غیر قانونی، غیر اخلاقی اور غیر جمہوری کاروائیوں میں مصروف پی ڈی ایم ٹولہ اور اس کے سہولت کار ہوش کے ناخن لیں اور وہاں کی اکثریتی جماعت کے خلاف سازشوں سے باز رہیں۔
انہوں نے کہا کہ آج کے دن ہونے والے غیر قانونی و غیر آئینی عمل کی ہم بھر پور مذمت کرتے ہوئے مسترد کرتے ہیں، ان اوچھے ہتھکنڈوں سے سوائے حکمرانوں کے کالے کرتوت آشکار ہونے کےکچھ حاصل نہیں ہو گا، پورے ملک کی طرح آئینی و جمہوری قدروں کی پامالی کا سلسلہ اب گلگت بلتستان میں بھی شروع کر دیا گیا ہے، ان شرمناک اور بھونڈی حرکتوں سے عوام کے دلوں میں ملوث ذمہ دار کرداروں کے خلاف نفرت شدت اختیار کرے گی، لہذا اس طرح کے عوامی منشاء کے خلاف ناپسندیدہ اور رعونت پسندانہ اقدامات اٹھانے سے گریز کیا جائے۔
وحدت نیوز(اسلام آباد) چیئرمین مجلس وحدت مسلمین پاکستان علامہ راجہ ناصر عباس جعفری نے اسرائیلی فورسز کی جانب سے فلسطینی شہر جنین پر حملے کی شدید مذمت کرتے ہوئے اسے فلسطینیوں کے خلاف قابض اسرائیلی حکام کا مجرمانہ اور وحشیانہ اقدام قرار دیا ہے، یہ مظلوم فلسطینی عوام کے خلاف منظم اور سوچی سمجھی ریاستی دہشت گردی ہے، فلسطینیوں پر اسرائیل کے ڈھائے گئے مظالم مسلم اُمہ کے لیے لمحہ فکریہ ہیں، جن پر مسلم ممالک کو خاموش تماشائی نہیں بننا چاہیے، جنین میں اسرائیل جس سفاکانہ انداز میں حملے کر رہا ہے، وہ بین الاقوامی قوانین کی بھی شدید خلاف ورزی ہے۔
انہوں نے کہا کہ شہروں اور کیمپوں پر بمباری، گھروں کو بلڈوز کرنے جیسے اقدامات کسی صورت برداشت نہیں، جس میں درجن بھر معصوم افراد شہید ہو چکے ہیں، یہ وقت اسرائیل سے قطع تعلقی اختیار کرنے کا ہے نہ کہ اس سے تعلقات جوڑنے کا، اسرائیل سے سفارتی تعلقات قائم کرنے والے دراصل فلسطینی کاز کے ساتھ خیانت کر رہے ہیں، او آئی سی سمیت عرب لیگ کو بھی اسرائیل کے جنگی جرائم اور قتل عام پر ٹھوس اقدامات اٹھانے ہونگے، اسرائیل کی جانب سے بین الاقوامی قوانین کی مسلسل دھجیاں اڑائی جا رہی ہیں، لیکن عالمی برادری اور انسانی حقوق کی تنظیموں کی طرف سے اس ظلم وبربریت پر مجرمانہ خاموشی اختیار کرنا شرمناک ہے، اسرائیل کے غاصبانہ اور تسلط پسندانہ عزائم سے علاقائی امن کو شدید خطرات لاحق ہو رہے ہیں، جس کا نتیجہ اسرائیل کی نابودی پر ہی منتج ہو گا۔
وحدت نیوز(قم) موسسہ باقرالعلوم قم میں مجلس وحدت مسلمین پاکستان کے شعبہ امور خارجہ کے مسئول حجۃ الاسلام ڈاکٹر شفقت حسین شیرازی نے ایم ڈبلیو ایم پاکستان کے مرکزی جنرل سیکرٹری سید ناصر شیرازی ایڈووکیٹ کے اعزاز میں ایک ظہرانے کا اہتمام کیا۔ ظہرانے کا آغاز تنظیمی ساتھیوں نے شہید غلام محمد فخر الدین قدس سرہ کیلئے اجتماعی طور پر فاتحہ پڑھ کر کیا اور سب نے ان کی بلندی درجات کیلئے دعا کی۔ ظہرانے میں پاکستان کی سیاسی صورتحال، ملک کے اقتصادی اتار چڑھاو، قوم کے مستقبل اور شیعیان پاکستان کی ذمہ داریوں جیسے موضوعات زیر بحث رہے۔ سوال و جواب کا سلسلہ بھی جاری رہا۔ پاکستان میں استعماری حکومتوں خصوصاً امریکہ کی مداخلت اور حالیہ بحران پر خصوصی طور پر بات چیت ہوئی۔
سید ناصر شیرازی ایڈووکیٹ کا کہنا تھا کہ مجلس وحدت مسلمین کا اہم ہدف شہید قائد علامہ عارف حسین الحسینی کے ایجنڈے اور ان کے مشن کی تکمیل کرنا ہے۔ انہوں نے کہا کہ پاکستان کی ملت تشیع نے مجلس وحدت کے پلیٹ فارم سے تمام تر میدانوں میں اپنی سیاسی بصیرت کا لوہا منوایا ہے۔ انہوں نے کہا کہ اس وقت سب شیعیان پاکستان کی بصیرت، مقاومت اور شجاعت کا اعتراف کرتے ہیں۔ مجلس وحدت کے تمام تر مواقف نے پاکستان کی سیاست پر دورس اثرات مرتب کئے ہیں۔ انہوں نے جی بی کی سیاسی صورتحال اور ملکی سیاست کے جی بی پر اثرات کو بھی بیان کیا۔ حاضرین کی طرف سے سوالات و جوابات کے دوران انہوں نے تمام اہم ملکی و سیاسی مسائل پر مجلس وحدت مسلمین کے موقف کو بیان کیا۔
وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری کی کال پر 7 جولائی 2023ء بروز جمعہ المبارک سویڈن میں قرآن کریم کو نظر آتش کرنے کے خلاف ملک بھر میں احتجاج کیا جائے گا، اور بروز جمعہ یوم حرمت قرآن الحکیم کے عنوان سے منایا جائے گا، تمام آئمہ جمعہ والجماعت و علمائے کرام اپنے خطبات میں قرآن مجید کی عزت و جلالت پر گفتگو کریں گے، ملک کے چاروں صوبوں سمیت گلگت بلتستان اور آزاد جموں و کشمیر میں اس سلسلے میں احتجاجی مظاہرے اور ریلیاں نکالی جائیں گی، جس میں مجلس وحدت مسلمین پاکستان کے عہدے داران، کارکنان سمیت تمام محبان قرآن حکیم بھر پور شرکت کریں گے، قرآن مجید کی عظمت و رفعت پر مبنی قرار دادیں بھی پیش کی جائیں گی اور اپنا احتجاج ریکارڈ کروایا جائے گا۔
علامہ راجہ ناصرعباس نےمزید کہاکہ اس شرمناک حرکت پر پورا عالم اسلام سراپا احتجاج ہے، مسلمانوں کے لیے حرمت قرآن مجید پر کسی قسم کا سمجھوتہ ناقابل قبول ہے، جس طرح دین مبین اسلام تمام مذاہب کے مقدسات کے احترام کی تعلیمات دیتا ہے اسی طرح دیگر مذاھب کے پیروکار بھی اسلام کے مقدسات کی توہین کرنا بند کریں، مسلمان توہین رسالت صلی اللہ علیہ وآلہ وسلم و اہانت قرآن کریم کی ہرگز اجازت نہیں دیں گے۔
وحدت نیوز(کراچی)مجلس وحدت مسلمین پاکستان صوبہ سندھ کے نائب صدر علامہ مختار احمد امامی نے کہا ہے کہ 6 جولائی پاکستان کی تاریخ کا ایک اہم دن ہے کہ جس دن وطن عزیز کے باوفا بیٹوں نے ضیائی آمریت کے خلاف قیام کیا اور قائد ملت جعفریہ حضرت علامہ مفتی جعفر حسین رحمۃ اللہ علیہ کی قیادت میں وفاقی دارالحکومت اسلام آباد میں تاریخی دھرنا دیا، جنرل ضیاء الحق نے وطن عزیز پاکستان میں اپنے باطل اور ناجائز اقتدار کو طول دینے کے لئے دین اسلام کی تعلیمات کا سہارا لیا اور ملک میں فرقہ واریت کے بیج بوئے۔
علامہ مختار امامی نے مزید کہا کہ ضیائی آمریت کے خلاف علامہ مفتی جعفر حسین اور علامہ شہید عارف حسین الحسینی کی جدوجہد سنہری حروف سے لکھی جائے گی، جنہوں نے زھد و تقویٰ اور شجاعت سے ضیائی آمریت کا مقابلہ کرتے ہوئے ایک طرف اتحاد بین المسلمین کے پرچم کو بلند رکھا تو ساتھ ہی ملت کے حقوق کا بھرپور دفاع کیا۔ انہوں نے کہا کہ 6 جولائی کے دن سرزمین بلوچستان پر جن شہداء نے قائد شہید علامہ عارف حسین الحسینی کی قیادت میں راہ حق میں اپنے خون کا نذرانہ پیش کیا ہم ان شہداء کو خراج عقیدت پیش کرتے ہیں۔
وحدت نیوز(کوئٹہ)مجلس وحدت مسلمین کے مرکزی رہنماء علامہ مقصود علی ڈومکی نے کہا ہے کہ ایم ڈبلیو ایم زندگی کے ہر شعبہ میں عوام کی رہنمائی کر رہی ہے۔ کھیل صحت مند زندگی کے حصول کیلئے اسپورٹس نہایت ضروری ہے۔ یہ بات انہوں نے مجلس وحدت مسلمین پاکستان ضلع کوئٹہ شعبہ اسپورٹس کے زیر اہتمام تیسرا آل ہزارہ چیمپئن ٹرافی کرکٹ ٹورنامنٹ 2023 کے موقع پر کہی۔ وہ سیمی فائنل میچ میں مہمان خصوصی کے طور پر شریک تھے، جبکہ اعزازی مہمان حاجی عبد الستار ظلمئے، صوبائی جنرل سیکرٹری علامہ سہیل اکبر شیرازی اور سید گلزار شاہ بخاری تھے۔ اس موقع پر ضلعی صدر ایم ڈبلیو ایم کوئٹہ ارباب لیاقت علی ہزارہ، سیکرٹری اسپورٹس راحیل حسین، سیکرٹری سیاسیات حاجی غلام حسین، سیکرٹری میڈیا عاطف حسین، حاجی غلام رسول و دیگر اراکین ضلعی کابینہ موجود تھے۔
اس موقع پر گفتگو کرتے ہوئے مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا کہ صحت مند معاشرے کی تشکیل میں کھیل بنیادی اہمیت رکھتی ہے۔ کھیل صحت مند زندگی کے حصول کیلئے نہایت ضروری ہے۔ کھیل صرف تفریح کا ذریعہ ہی نہیں، بلکہ جسم کو چاق و چوبند اور صحت مند بنانے کا بھی ذریعہ ہے۔ کھیلنے سے دماغ تر و تازہ ہوتا ہے۔ کھیل انسانی صلاحیتوں کو اُبھارتا ہے۔ انہوں نے کہا کہ مجلس وحدت مسلمین ضلع کوئٹہ کی جانب سے ہر سال کھیلوں کے مقابلے کروانا قابل تحسین اقدام ہے۔ ایم ڈبلیو ایم ایک عوامی جماعت کی حیثیت سے زندگی کے مختلف شعبوں میں عوام کی رہنمائی کر رہی ہے۔ دو ٹیموں اقراء اکیڈمی اور ہزارہ یونائیٹڈ کے مقابلے میں اقراء اکیڈمی کی ٹیم نے کامیابی حاصل کی۔ اس موقع پر مہمان خصوصی نے مین آف دی میچ سجاد علی کو خصوصی انعام دیا۔
وحدت نیوز(کراچی)معروف عالم دین ،خطیب اہل بیتؑ اور رہنماء مجلس وحدت مسلمین علامہ سید حسن ظفر نقوی نے کہا ہے کہ فلسطین کے نہتے مسلمانوں پر ہونے والے مظالم اور جارحیت کی مذمت کرتے ہیں اسلامی دنیا اور عالمی برادری اس کا نوٹس لے کیونکہ فلسطین کے مظلوم مسلمان طویل عرصے سے صیہونی مظالم برداشت کررہے ہیں اور ان پر ہونے والے مظالم پر صدائے احتجاج بلند کرنیوالا کوئی نہیں ہے۔
علامہ حسن ظفر نقوی نے مسلم سربراہان مملکت، اسلامی تنظیموں ار اکابرین ملت سے کہا کہ وہ آگے آئیں اور مظالم کے خاتمے کیلئے ٹھوس اور مؤثر آواز اٹھائیں تاکہ فلسطین میں بسنے والے مسلمان بھی دوسری اقوام اور دیگر برادریوں کی طرح عزت و آبرو کے ساتھ زندگی گزار سکیں تاکہ مسلمانوں میں پھیلی ہوئی بے چینی کا خاتمہ ہو، اس سلسلے میں اسلامی جمہوریہ ایران کے رہنماؤں کی کوششیں قابل تحسین ہیں اور ایران عراق اور شام، یمن کے مسلمانوں نے احتجاج کا سلسلہ شروع کر رکھا ہے جوکہ قابل تحسین ہے۔
وحدت نیوز(سرگودھا)مجلس علماء امامیہ کے زیر اہتمام سرگودھا میں مبلغین امامیہ کا ساتواں سالانہ علاقائی اجتماع بعنوان "عظمت غدیر و عاشورا کانفرنس" کا انعقاد کیا گیا جس میں بطور خاص چیئرمین مجلس وحدت مسلمین پاکستان حجت الاسلام والمسلمین علامہ راجہ ناصر عباس جعفری نے شرکت کی اور مختلف اضلاع سے آئے ہوئے آئمہ مساجد سے خطاب کیا۔
کانفرنس سے خطاب کرتے ہوئے چیئرمین مجلس وحدت مسلمین پاکستان نے کہا ہم پاکستان میں ظالم کے خلاف اظہار برات و مظلوم کی حمایت کے اصولی موقف پر قائم ہیں اورقائم رہیں گے۔
پاکستان کے موجودہ حالات پر گفتگو کرتے ہوئے علامہ صاحب کا کہنا یہ تھا کہ ہم شیعان اہلبیت ( ع) ہمیشہ سے ظالموں کے خلاف نبرد آزما رہے ہیں اور رہیں گے۔ ہمارا موقف عدل و انصاف پر مبنی معاشرے کا قیام ہے جس میں قانون کی بالادستی ہو جس میں کسی بھی طبقے کے ساتھ ظلم و زیادتی نہ ہو۔
مجلس علماء امامیہ کے اجتماع سے خطاب کرتے ہوئے چیئرمین ایم ڈبلیو ایم علامہ راجا ناصر عباس نے مزید کہا: ہم شیعیان پاکستان اپنے ہم وطن تمام مظلوم طبقات کو ساتھ ملا کر حقیقی آزادی کی تحریک کو پایہ تکمیل تک پہنچائیں گے۔
خطاب کے آخر میں علامہ راجا ناصر عباس نے ادارہ الباقر کے مختلف شعبہ جات کی کارکردگی کو سراہتے ہوئے کہا کہ آج ضرورت اس امر کی ہے کہ مبلغین امامیہ کی فکری تربیت پر خصوصی توجہ دی جائے اور مجلس علماء امامیہ اس خلا کو اچھے انداز سے پر کیے ہوئے ہے۔ علاوہ ازیں انہوں نے سربراہ ادارہ الباقر حجت الاسلام والمسلمین ڈاکٹر سید شفقت حسین شیرازی اور ان کے ساتھیوں کی مخلصانہ کوششوں کو سراہا۔
وحدت نیوز(لاہور) مجلس وحدت مسلمین پاکستان شعبہ خواتین کے زیر اہتمام لاہور میں عید غدیر کے حوالے سے عظیم الشان تقریب کا انعقاد لاہور میں مجلس وحدت مسلمین شعبہ خواتین کے زیر اہتمام عید غدیر کی مناسبت سے آڈیٹوریم سلمان فارسی گلبرگ لاہور میں مرکزی صدر ایم ڈبلیو ایم شعبہ خواتین محترمہ سیدہ معصومہ نقوی کی زیر سرپرستی جشن عید غدیر و جشن بندگی کا انعقاد کیا گیا تقریب میں عمومی شرکت کے علاوہ ضلع لاہور کی تمام تحصیلوں کی صدور و کابینہ و کارکنان نےبھی شرکت کی۔
اس پر رونق تقریب میں مختلف یونٹس کی جانب سے منقبت و قصائد بارگاہ امیرالمومنین ع میں ھدیہ کیے گئے جبکہ ننھی بچیوں نے عید غدیر کی مناسبت سے ٹیبلو پیش کیا ، جشن عید غدیر کے ساتھ ساتھ سن بلوغت کو پہنچنے والی بچیوں کے لیے جشن بندگی کا اہتمام کیا گیا جس میں تمام بچیاں شرعی حجاب کے ساتھ منظم انداز میں اسٹیج پر آئیں انہیں جید علمائے کرام کے ہاتھوں عبا پہنائی گئی۔
اس نورانی محفل میں وائس چئیرمین ایم ڈبلیو ایم مولانا احمد اقبال رضوی ،سنیئر رہنما ایم ڈبلیو ایم مولانا ظہیر الحسن کربلائی اور پرنسپل جامعہ بعثت مولانا حسن مھدی کاظمی صاحب نے بطور مہمان خصوصی شرکت کی مولانا احمد اقبال رضوی اور مولانا حسن مہدی کاظمی صاحب نے تقریب سے خطاب کرتے ہوئے یوم غدیر پر مقصد و ھدف انتخاب امامت و علوی طرز زندگی اور حالات حاضرہ کے موضوع پر بہترین معلومات فراہم کیں ۔
پروگرام کے اختتام پر مرکزی صدر محترمہ سیدہ معصومہ نقوی خطاب کیا انہوں نے آیہ تبلیغ کی تفسیر بیان کی اور کہا کہ اس دور میں ولایت کی اطاعت یعنی خط ولایت فقیہ کو مضبوطی سے تھامے رکھنا ہے جو اقوام ولی فقیہ کی اطاعت کے راستے امام زمانہ عج کی پیروی کر رہے ہیں آج کے دور میں وہ ہی اصل غدیری پیروکار ہیں ، محفل کے اختتام پر شرکاء مومنات نے اس عظیم الشان جشن کے انعقاد پر انتظامیہ کا شکریہ ادا کیا اور جشن بندگی جیسے بہترین پروگرام کو فروغ دینے اور بچیوں میں احکام شرعی کی اہمیت کو اجاگر کرنے کے حوالے سے کاوشوں کو جاری رکھنے کا عزم کیا گیا ۔
وحدت نیوز(کراچی)محرم الحرام ۵۴۴۱ھ ملک خداد پاکستان میں عقیدت و احترام سے منایا جائے گا۔ شہر قائدکے مسائل گزشتہ چند سالوں سے بڑھتے جارہے ہیں جن کا تدارک موجودہ حکومت کی اولین ذمہ داریوں میں ہونا چاہیے۔ معاشی حب کراچی بحرانوں کا شہر بن چکا ہے۔ عالمی سروے کے مطابق معاشی حب،روشنیوں کا شہر کراچی دنیا کے بدترین پانچ شہروں میں سے ایک ہے۔شہر کی عوام بنیادی سہولیات سے محروم ہیں پانی،بجلی،گیس،مہنگانی نے عوام کی کمر توڑ کر رکھ دی ہے موجودہ حکومت نے ملک کا دیوالیہ نکال دیا ہے عوام مذید مہنگائی کا بوج برداشت نہیں کر پائیں گے۔روز بروز عوام پر خاموشی سے نئے ٹیکس لگا دیئے جاتے ہیں۔تیزی سے بند ہوتی ہوئی صنعتوں کے باعث بے روزگاری میں ہورہا ہے عوام سے اربوں روپے اضافی لوٹنے والی کے الیکٹرک مافیا کے ظلم وستم عوام پر بڑھتے جارہے ہیں۔کے الیکٹرک مافیا شہر قائد کی عوام کو سب سے زیادہ مہنگی بجلی فروخت کر رہی ہے۔روشنیوں کا شہر تاریکی میں ڈوب گیا ہے، کے الیکٹرک مافیا کے لائسنس کو نا صرف تجدید سے روکا جائے بلکہ مکمل منسوخ کیا جائے۔ شہر کی مجموعی صورتحال میں مختلف پاور جنریشن کمپنیوں کو عوامی مفاد میں خدمت کا موقع دیا جائے کیونکہ جب سے یہ مافیا آئی ہے اس کی پرفارمنس صفر اور اب تک اس کی جانب سے شہر کی ضرورت کے مطابق پاور جنریشن نہیں بڑھائی گئی ہے۔ شہر میں موجودہ بجلی بحران کے خاتمے کیلئے لوڈ کو تقسیم کر کے مختلف پاور جنریشن کمپنیوں کو چانس دیا جائے مہنگی بجلی اور بیجا ٹیکسس سے عوام کو نجات دلائی جائے شہر میں توانائی کے مصنوعی بحران کو ختم کیا جائے سازش کے تحت بند مختلف پاور پلانٹس کو چلایا جائے۔ یہ ادارہ مضبوط مافیا بن گیا ہے جو وزیراعظم پاکستان کے احکامات کو بھی خاطر میں نہیں لاتا بجلی بلوں میں فیول ایڈجسٹمنٹ سمیت مذید ٹیکس لگاکر بلوں میں دیا ہوا فی یونٹ سلیب ختم کرکے عوام سے بھتہ وصول کی جارہی ہے اس مافیا کے خلاف فوری کاروائی کر کے سرکاری تحویل میں لیا جائے۔
ان خیالات کا اظہار مجلس وحدت مسلمین سندھ کے سیکر ٹری سیاسیات سید علی حسین نقوی نے رہنماوں کے ہمراہ کراچی عزاء خانہ زہرا روڈ پر پریس کانفرنس سے خطاب میں کیا انہوں نے کہا کہ عزاداری امام حسین علیہ السلام امت مسلمہ کے درمیان وحدت کا مظہر ہے، یہ عزاداری ہی ہے کہ جس نے حسینی اور یزیدی افکار کے درمیان فرق واضح کیا،محرم الحرام 1445ھ کے دوران عزاداری کے پروگراموں کو فول پروف سیکورٹی فراہم کی جائے تمام مرکزی جلوسوں کے داخلی و خارجی راستوں پر واک تھرو گیٹ نصب اور اضافی نفری تعینات کر کے کسی بھی شرپسندی کے خدشے کو کم سے کم کیا جا سکتا ہے۔ نو منتخب میئر کراچی گزشتہ چندسالوں میں محرم سے قبل شہر کے مضافاتی علاقوں میں مجالس و جلوسوں عزاء کے راستوں کی صفائی ستھرائی، سڑکوں کی مرمت، اسٹریٹ لائٹس کی تنصیب و بحالی،سوریج کے مسائل کو اپنی خصوصی توجہ دیکر ختم کر وائیں شہر بھر میں بلدیاتی ایشوز پر وفاقی و صوبائی حکومتوں کو خصوصی توجہ دینے کی ضرورت ہے ایام عزاء میں عشرہ مجالس کی جگہوں بلخصوص مساجد و امام بارگاہوں میں اورجلوسوں کی گزر گاہوں پر بجلی کی بلا تعطل فراہمی کیلئے متعلقہ اداروں کولوڈ شیڈنگ ختم کرنے کیلئے باقائدہ پابند کیا جائے۔کے الیکٹرک انتظامیہ کی جانب سے سبیلوں کے لیئے میٹر دیئے جائیں۔ ایام عزاء میں شہر بھر میں لوڈ شیڈنگ کا خاتمہ کر کے بلا تعطل بجلی فراہم کی جائے۔
انہوں نے کہا کہ ملک بھر کی طرح شہر بھرمیں تمام لائسنس یافتہ و روایتی جلوس حسب سابق بھرپور مذہبی عقیدت و احترام سے نکالے جائیں گے۔ علاقائی انتظامیہ کوقانون کی عمل داری کے نام پر کسی جلوس کے راہ کی رکاوٹ بننے اور اختیارات کے ناجائز استعمال کی اجازت نہیں دی جائے گی۔رواداری اور باہمی احترام ہمارے مذہب کا حصہ ہیں۔علما ء کرام کو چاہیے کہ تمام مسالک کے بنیادی عقائد کے احترام کو ملحوظ خاطر رکھیں تاکہ تمام مسالک کے مابین ایک دوسرے کا احترام قائم رہ سکے۔محرم الحرام کی آمد سے قبل کچھ اضلاع میں معتدل علما و ذاکرین کے داخلے پر انتظامیہ کی جانب سے پابندی برداشت نہیں کی جائے گی امید کرتے ہیں اس بار ایسا نہیں ہوگا۔جمعہ 7جولائی کو چیئرمین ایم ڈبلیو ایم علامہ راجہ ناصر عباس جعفری کے حکم پر یوم حرمت قرآن منایا جائے گا۔کانفرنس میں سید علی حسین نقوی، علامہ صادق جعفری،علامہ مبشر حسن.مولانا حیات عباس نجفی، رضی رضوی،مولانا ملک عباس ،مولانا اسحاق قرائتی، مولانا عباس کمیلی، مولانا نذیر جنتی، زوالفقار بھٹوسمیت دیگر موجود تھے۔
