وحدت نیوز(اسلام آباد)مجلس وحدت مسلمین پاکستان عزاداری ونگ کے مرکزی مسئول ملک اقرار حسین علوی نے وسطی پنجاب کے لیے سابقہ صوبائی ڈپٹی سیکرٹری جنرل اور سنئیر صوبائی رہنما ڈاکٹر افتخار حسین نقوی صاحب کو صوبہ وسطی پنجاب کے عزاداری ونگ کے لیے صوبائی صدر نامزد کیا ہے۔

مرکزی مسئول عزاداری ونگ ملک اقرار حسین علوی نے اس امید کا اظہار کیا ہے کہ ڈاکٹر افتخار حسین نقوی الہی ذمہ داری کو باطریق احسن نبھائے میں اپنا بھرپور کردار ادا کرنے میں کوئی کسر اٹھا نہیں رکھیں گے اور عزاداری سید الشہداء حضرت امام حسین علیہ السلام کے لیے آپ اپنی خدمات بہترین انداز میں انجام دیں گے، اس عہدے کے لئے آپ کا انتخاب ایک بہترین اور مؤثر اثاثہ ہو گا۔ ان شاءاللہ

وحدت نیوز(پاراچنار)مجلس وحدت مسلمین خیبر پختونخوا کے صوبائی صدر علامہ جہانزیب علی جعفری، جنرل سیکرٹری شبیر حسین ساجدی، ضلع پارہ چنار کے صدر و تحصیل چیئرمین آغا مزمل حسین فصیح کی وفد کے ہمراہ خانوادگان شہدائے تری مینگل کے لواحقین سے ملاقات، شہداء کی بلندی درجات کے لئے دعا اور تعزیت کی۔

اس موقع پر انہوں نے قائد وحدت چیرمین علامہ راجہ ناصر عباس جعفری کی جانب سے شہداء کے ورثاء کو تعزیتی پیغام پہنچایا اور کہا کہ مشکل اس گھڑی میں ہر قدم پر آپ کی حمایت کرتے ہیں اور ساتھ کھڑے ہیں۔صوبائی صدر نے علاقے کے معززین سے بھی ملاقاتیں کیں اور آئندہ کے لائحہ عمل پر مشاورت کی، علامہ جہانزیب علی جعفری نے امام جمعہ پارہ چنار علامہ فدا حسین مظاہری دیگر اہم شخصیات سے بھی ملاقات سمیت موجودہ صورتحال پر تفصیلی تبادلہ خیال کیا۔

اس موقع پر گفتگو کرتے ہوئے انہوں نے کہا کہ پارہ چنار کے عوام امن و وحدت کے ساتھ رہنا چاہتے ہیں لیکن وہ بے دردی سے شہید ہونے والے اساتذہ کے قاتلوں کو جلد از جلد قانون کے شکنجے میں جکڑا دیکھنا چاہتے ہیں، ہم کسی بھی انسان کے ساتھ ظلم وزیادتی برداشت نہیں کر سکتے چاہے اس کا تعلق کسی بھی مذہب و مسلک سے ہو اور نہ ہی کسی ایسے جرم میں ملوث شخص کی حمایت کرتے ہیں، یہ اساتذہ مسلکی پہچان کے ساتھ ساتھ ریاست کے ملازمین بھی تھے جس پر ریاستی خاموشی افسوس ناک ہے، نامعلوم افراد کے خلاف درج کی گئی ایف آئی آر کو مسترد کرتے ہوئے ہمارا ارباب اختیار سے مطالبہ ہے کہ وہ اس واقعے کی شفاف اور آزادانہ طور پر تحقیقات کرتے ہوئے ملوث دہشت گردوں کو گرفتار کر کے انہیں کیفرِ کردار تک پہنچانے میں کوئی کسر اٹھا نہ رکھی جائے۔ تاکہ ضلع کرم پارہ چنار میں بدامنی پھیلانے والوں کے ناپاک عزائم کو خاک میں ملایا جا سکے۔

وحدت نیوز(مانٹرنگ ڈیسک)ظلم وبربیت اور شیعہ نسل کشی کے خلاف صدائے احتجاج بلند کرنا جرم بن گیا، سانحہ تری مینگل پاراچنار میں 7 بے گناہ اساتذہ اور مزدوروں کی مسلکی شناخت کے بعدبہیمانہ قتل عام پر احتجاجی کرنے کی پاداش میں ریاستی اداروں نے قاتلوں کے خلاف مقدمہ درج کرنے کے بجائے مجلس وحدت مسلمین پاکستان کے قائدین سمیت 200 افراد کےخلاف مقدمہ درج کردیا۔

تفصیلات کے مطابق پاراچنار میں تری مینگل کے تکفیری وہابی د ہشت گرد وں کے ہاتھوں 7 شیعہ اساتذہ کے بہیما نہ قتل و سفا کیت کے خلاف مجلس وحدت مسلمین اسلام آباد و اہلیانِ پاراچنار کی جانب سے اسلام آباد پریس کلب کے سامنے احتجاجی ریلی نکالنے پر MWM کے قائدین کے خلاف وفاقی دارالحکومت اسلام آباد کی پولیس کی مدعیت میں ایف آئی۔آر درج کردی گئی۔

ایف آئی۔آر میں رکن شوریٰ عالی علامہ سید حسنین عباس گردیزی، مرکزی سیاسی کونسل کے رکن و سابق صدر اسلام اباد ظہیر عباس نقوی، موجودہ ضلعی صدر برادر اسد اللہ اور راہنما اہلیانِ پاراچنار سید شیرازی کے نام درج کیے گئےجبکہ 200 افراد کو شامل کیا گیا ہے۔

حیرت انگیز بات ہے کہ علامہ حسنین عباس گردیزی اس احتجاجی ریلی میں شریک ہی نہیں تھے، بس ریاستی اداروں نے ایف آئی آر کا پیٹ بھرنے کیلئے ان کا نام ڈال دیا۔

قابلِ افسوس بات یہ ہے کہ ابھی تک اس سانحہ کی نا کوئی ایف آئی آر درج کی گئی نا کوئی گرفتاری یا آپریشن کیا گیا لیکن اس ظلم و بربریت کے خلاف احتجاج پر ایف آئی آر درج کر دی گئی ریاست کے یہی رویئےان سے متعلق شکوک و شبہات کو تقویت پہنچاتے اور ان کے کردار کو مشکوک و زیر سوال لاتے ہیں۔

وحدت نیوز(اسلام آباد) مجلس وحدت مسلمین پاکستان کے ترجمان اور مرکزی جنرل سیکرٹری سید ناصر عباس شیرازی ایڈووکیٹ نے اسلام آباد پولیس کی جانب سے ایم ڈبلیو ایم کے پرامن کارکنوں پر درج کردہ ایف آئی آر کے حوالے سے اپنے ردعمل میں کہا ہے کہ انتظامیہ کا یہ عمل سراسر بدنیتی پر مبنی ہے، جس کی شدید مذمت کرتے ہوئے مطالبہ کرتے ہیں کہ اس ایف آئی آر کو فوری طور پر خارج کیا جائے۔

انہوں نے کہا کہ دن دیہاڑے علم کی روشنی پھیلانے والوں کو بے دردی سے موت کے گھاٹ اتار دیا جاتا ہے، وہاں قانون اس قدر تیز رفتاری سے حرکت میں نہیں آتا، وہاں پر لواحقین کی مرضی نہ ہونے کے باوجود نامعلوم افراد کے خلاف ایف آئی آر درج کی جاتی ہے، جبکہ وہ اساتذہ ریاست کے بھی سرکاری ملازمین تھے، لیکن ان مظلوموں کے لیے صدائے احتجاج بلند کرنے والے پرامن کارکنوں پر نام کے ساتھ ایف آئی آر درج کرنے میں ذرا سی بھی دیر نہیں لگائی جاتی، جو کہ صریحاً ناانصافی ہے۔

انہوں نے کہا کہ پارہ چنار کے اساتذہ کے قاتلوں کو کلین چٹ دینے سے یہی واضح ہو رہا ہے کہ ریاست قاتلوں کے ساتھ کھڑی ہو رہی ہے، پھر مقتول کس سے انصاف مانگے۔۔؟ موجودہ حکمران اپنے عمل سے دہشتگردوں کے سیاسی ونگ کا رول پلے کر رہے ہیں، ریلی کے دوران اسٹیج سے مسلسل اس بات کا اعلان کیا گیا کہ جو نعرے اسٹیج سے لگائے جائیں انکا جواب دیا جائے اور اس کے علاوہ کسی قسم کی غیر ضروری اور نامناسب نعرے بازی نہ کی جائے، عوامی ریلیوں اور مظاہروں میں ہر سوچ کے افراد شریک ہوتے ہیں لہذا کسی انفرادی عمل کو جواز بنا کر ایک ذمہ دار مذہبی و سیاسی جماعت کے کارکنان پر ایف آئی آر کا اندراج مضحکہ خیز ہے، جسے کسی صورت برداشت نہیں کیا جائے گا۔