The Latest
وحدت نیوز(چنیوٹ)مجلس وحدت مسلمین شعبہ خواتین چنیوٹ کی جانب سے زن زندگی آزادی اسلام کی نگاہ میں کے عنوان سے ایک نشست کا انعقاد کیا گیا جس میں عالمہ محترمہ گلشن بتول ، صدر ایم ڈبلیوایم شعبہ خواتین چینیوٹ محترمہ عابدہ عرفان اور مرکزی صدر مجلس وحدت مسلمین شعبہ خواتین محترمہ سیدہ معصومہ نقوی نے خطاب کیا ۔
تقریب میں سابقہ مرکزی رہنما ڈاکٹر ردا فاطمہ نے بھی شرکت کیاپنے خطاب میں محترمہ معصومہ نقوی کا کہنا تھا کہ دشمنان اسلام کی ہمیشہ سے یہی کوشش رہی کہ دین اسلام کے بنیادی احکامات اور قوانین خدا میں اپنی مرضی کی توجیحات شامل کر کے انہیں یکسر تبدیل کر دیں ، حجاب اسلامی کے خلاف جاری موجودہ سازشی لہر اسی لیے ہے کہ خواتین نام نہاد آزادی کے حصول کے لیے اپنے حجاب سے روگردانی کریں تاکہ اسلامی معاشرہ مزید کھوکھلا اور غیر متحرک و بے اثر ہوجائے۔
انہوں نے کہا مسلمان خواتین اللہ تعالی پر ایمان رکھتی ھیں اور پردہ کا حکم خدا کی جانب سے ہے جو کہ خواتین کے تحفظ وقار اور ان کی عزت میں اضافے کا باعث ہے حجاب کبھی بھی کسی معاشرے کی ترقی میں رکاوٹ نہیں بنا بلکہ تاریخ اسلام گواہ ھے کہ محجبہ خواتین نے مردوں کے شانہ بشانہ ہر میدان میں اپنا کردار پیش کیا ہے۔
وحدت نیوز(سکردو)عالمی یوم پہاڑ کی مناسبت ایک عظیم الشان تقریب کا اہتمام سدپارہ کے نامور کوہ پیماوں کی جانب سے منعقد کیا گیا۔ تقریب میں فورس کمانڈر گلگت بلتستان, منسٹر ایگریکلچر گلگت بلتستان و پارلیمانی لیڈر مجلس وحدت مسلمین گلگت بلتستان کاظم میثم اور منسٹر ٹورزم راجہ ناصر علی خان نے خصوصی شرکت کی۔
اس موقع پر گفتگو کرتے ہوئے وزیر زراعت نے کہا کہ سدپارہ کے کوہ پیماء صرف گلگت بلتستان کے لیے قابل فخر نہیں بلکہ پورے پاکستان کے لیے قابل فخر ہے۔ کسی بھی سطح پر انکی پذیرائی اور معاونت نہ ہونے کے باوجود پوری دنیا میں انہوں نے اپنی صلاحیتوں کا لوہا منوا کر پاکستان کا سر فخر سے بلند کیا۔
انہوں نے کہا کہ سدپارہ اس وقت ٹریڈ مارک بن چکا ہے انکی صلاحیتوں کو دنیا مان چکی ہے لیکن باقاعدہ ادارہ نہ ہونے اور ٹریننگ نہ ہونے اور سرٹیفکیشن کا کوئی ادارہ نہ ہونے کے سبب انکی خدمات کو دوسرے ادارے اپنی جھولی میں ڈال دیتے ہیں۔ سدپارہ میں ماونٹینیرنگ سکول کے قیام سے ایک بڑا مسئلہ ہوگا اور اپنی اے ڈی پی سے ماونٹینیرنگ سکول کے لیے فنڈ رکھا جائے گا تاکہ اس کو صنعت کا درجہ دیا جاسکے اور پوری دنیا سے کوہ پیمائی اور کوہ نوردی کے شوقین یہاں سے تربیت حاصل کرسکے۔ ماونٹینیرنگ سکول کو عالمی سٹینڈرڈ کے مطابق قائم کرنے کے بعد گلگت بلتستان کوہ پیمائی کا نیا باب کھلے گا۔
وزیر زراعت گلگت بلتستان نے اس تقریب میں شرکت کرنے اور اس پروگرام کو کامیاب بنانے والے تمام اداروں بالخصوص سدپارہ کے کوہ پیماوں اور دیگر جوانوں کا بھی شکریہ ادا کیا۔
وحدت نیوز(اسلام آباد) جو قومیں شہدا کو یاد رکھتی ہیں انہیں دنیا کی کوئی طاقت شکست نہیں دے سکتی۔ عالمی استکبار اور اسلام دشمن قوتوں سے ٹکرانے والے عظیم شہداء کو سلام پیش کرتے ہیں ان خیالات کا اظہار چیئرمیں مجلس وحدت مسلمین علامہ راجہ ناصر عباس جعفری نے مرکزی کابینہ کے اجلاس میں جماعت کے آئندہ کے پروگرامات پر گفتگو کرتے ہوئے کیا۔
انہوں نے کہ وطن عزیز کے باوفا شہدا ء ملت جعفریہ اور عالم اسلام کے عظیم شہدائے مقاومت کو خراج تحسین پیش کرنے کے لئے مجلس وحدت مسلمین پاکستان یکم جنوری تا دس جنوری عشرہ تکریم شہداء کے طور پر منائے گی ۔ اس حوالے سے مرکزی کانفرنس اسلام آباد میں اور تمام صوبوں میں بھی پروگرامات منعقد کئے جائیں گے ۔
انہوں نے مزید کہا کہ ہم پاکستان کے استحکام کے لئے خون کا نذرانہ دینے والے شہدا کو سلام پیش کرتے ہیں،شہدائےتحریک آزادی کشمیر، یمن ،فلسطین اور خصوصا عراق میں مقدس مقامات کے لئے جانیں نچھاور کرنے والے شہدائے اسلام کو خراج تحسین پیش کرتے ہیں .شہدا کا خون کبھی رائیگاں نہیں جائے گا انشااللہ شہداء کی یاد کو شایان شان انداز میں منایا جائے گا۔
وحدت نیوز(جیکب آباد)مجلس وحدت مسلمین پاکستان کے مرکزی سیکرٹری تنظیم اور نصاب کمیٹی کے سربراہ علامہ مقصود علی ڈومکی نے کہا ہے کہ ملت جعفریہ کے تحفظات اور اعتراضات کو نظرانداز کرتے ہوئے متنازعہ نصاب تعلیم کو اسکولوں میں نافذ کیا جا رہا ہے، جو انتہائی افسوسناک عمل ہے۔ حکومت نے متنازعہ نصاب تعلیم پر جس نظرثانی کا شیعہ علماء اور اکابرین سے وعدہ کیا تھا، وہ وعدہ وفا نہیں ہوا اور متنازعہ نصاب تعلیم نافذ کرکے ملک میں حکومت خود فرقہ واریت کی فضا پیدا کر رہی ہے۔ انہوں نے کہا کہ ملت جعفریہ کے علماء و اکابرین اور نمائندہ جماعتیں بالاتفاق متنازعہ نصاب تعلیم کو رد کر چکے ہیں۔
اس کے باوجود حکومتی ضد اور ہٹ دھرمی حیرت انگیز ہے۔ انہوں نے کہا کہ شیعہ دینیات شیعہ طلباء کا بنیادی آئینی حق ہے۔ جلد یا دیر حکومت اور ریاستی اداروں کو یہ مطالبہ ماننا پڑے گا۔ دنیا کے مہذب ممالک میں قوم کو اپنے آئینی حقوق مطالبے پر ہی ملتے ہیں۔ مگر وطن عزیز پاکستان کے حکمرانوں کا مزاج ہی کچھ ایسا ہے کہ یہاں عوام کو اپنے جائز قانونی مطالبات منوانے کے لئے بھی مجبور ہو کر احتجاج کا راستہ اختیار کرنا پڑتا ہے۔ انہوں نے امید ظاہر کی کہ پاکستان کے ارباب اقتدار و ارباب اختیار دانشمندی کا مظاہرہ کرتے ہوئے شیعہ دینیات سے متعلق ملت جعفریہ کے آئینی حقوق تسلیم کریں گے۔
وحدت نیوز(جیکب آباد) مدرسہ خدیجہ الکبریٰ ع جیکب آباد میں ایام فاطمیہ کی مناسبت سے سیدہ کائنات حضرت فاطمہ الزہراء سلام اللہ علیہا کے خطبہ کے موضوع پر منعقدہ نشست سے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی اور مدرسہ کی پرنسپل محترمہ رقیہ سلطانہ نے خطاب کیا۔
اس موقع پر گفتگو کرتے ہوئے علامہ مقصود علی ڈومکی نے کہا کہ سیدہ النساء العالمین حضرت بی بی فاطمہ الزہراء سلام اللہ علیہا کی ذات گرامی عالم بشریت خصوصاً صنف نسواں کے لئے نمونہ عمل اور اسوہ حسنہ ہے۔ آپ اپنی پاکیزہ سیرت اور کردار کی بلندی کے سبب خواتین عالم کی سردار قرار پائیں۔ آپ کے دامن عصمت میں جن ھستیوں نے تربیت پائی وہ عالم انسانیت کے رہبر و رہنما قرار پائے۔
انہوں نے کہا کہ سیدہ کائنات حضرت فاطمہ الزہراء سلام اللہ علیہا کا خطبہ فدکیہ علم و عرفان کا سمندر ہے جس معارف دین کے سمندر کو کوزے میں سمویا گیا ہے۔ آپ محدثہ صدیقہ الکبریٰ بتول ام ابیہا اور بضعہ منی کے رتبہ پر فائز ہونے کے سبب شریک کار رسالت تھیں۔ جس طرح حضرت مریم سلام اللہ علیہا پر فرشتے اترتے تھے اسی طرح بلکہ اس سے بالاتر سیدہ فاطمہ الزہراء سلام اللہ علیہا پر فرشتے اترتے تھے۔
انہوں نے کہا کہ حجاب خاتون جنت صدیقہ الکبریٰ ع کی میراث اور امانت ہے مسلم خواتین خصوصاً کنیزان حضرت زہراء کو اس عظیم امانت کی حفاظت کرنا ہوگی۔ حجاب اور پردے کے خلاف عالمی استکباری قوتوں کے حملے جاری ہیں۔ مغربی ثقافتی یلغار کے مقابلے کے لئے مسلم خواتین کو سیرتِ سیدہ فاطمہ الزہراء سلام اللہ علیہا کو اپنانا ہوگا جو حیاء عفت پاکدامنی حجاب اور عبودیت الہی و بندگی خدا پر مشتمل ہے۔
وحدت نیوز(کواردو)صوبائی وزیر زراعت و پارلیمانی لیڈر مجلس وحدت مسلمین گلگت بلتستان کاظم میثم کی عمائدین و سرکردگان سترانگدونگما کواردو سے ملاقات ہوئی۔
ملاقات میں دریائی کٹاو پر حفاظتی بند کی بروقت تکمیل پر زور دیا گیا اور علاقے کے تعلیمی مسائل سمیت دیگر ایشوز سے بھی آگاہ کیا گیا۔
وزیر زراعت نے حفاظتی بند پر فوری کام شروع کروانے کے حوالے سے متعلقہ محکموں کو ہدایات دیں اور منظور شدہ سکیم پر متاثرین کی کمیٹی کے ساتھ بیٹھ کر جگہ کا انتخاب کرنے اور دیگر جزئیات پر مل کر اقدامات اٹھانے کی ہدایات دیں۔
وزیر زراعت نے حلقے میں جاری سکیموں بالخصوص کواردو قمراہ روڈ سمیت دیگر منصوبوں سے عوام کو آگاہ گیا۔ ان کی آمد پر عمائدین نے انکا شکریہ ادا کیا۔
وحدت نیوز(ملتان) مجلس وحدت مسلمین جنوبی پنجاب کے صدر مولانا اقتدار نقوی کی جانب سے آئی ایس او پاکستان کے مرکزی صدر حسن عارف کے اعزاز میں عشائیہ کا اہتمام کیا گیا۔ عشائیہ میں مجلس وحدت مسلمین پاکستان کے مرکزی ڈپٹی سیکرٹری جنرل سلیم عباس صدیقی، ڈویژنل صدر آئی ایس او ملتان شبر رضا، صوبائی رہنما ایم ڈبلیو ایم جنوبی پنجاب سید دلاور زیدی، وسیم عباس زیدی، علی رضا بخاری، فہیم جعفر ایڈووکیٹ، جواد مصطفی سرگانہ اور دیگر موجود تھے۔
قبل ازیں آئی ایس او کے مرکزی صدر حسن عارف کے مسجد الحسین پہنچنے پر پھولوں سے استقبال کیا گیا۔ ملاقات میں دونوں جماعتوں کے رہنماؤں نے مختلف امور پر تبادلہ خیال کیا اور مستقبل میں قومی و ملی امور میں مشترکہ جدوجہد کے حوالے سے اتفاق کیا گیا۔
وحدت نیوز(اسلام آباد)بدعنوانی نے ملکی معیشت کو ڈیفالٹ کے دہانے پر لاکھڑا کیا ہے کرپشن کی لعنت نے تعمیر وترقی کی راہیں معدوم کر دی ہیں اور عوام کے لیے تمام شعبہ ہائے زندگی میں منصفانہ انداز سے آگے بڑھنے کے مواقع مسدود ہو رہے ہیں۔ ان خیالات کا اظہار سید ناصر عباس شیرازی مرکزی جنرل سیکرٹری مجلس وحدت مسلمین نے کرپشن کے عالمی دن کے موقع پر میڈیا سیل سے جاری بیان میں کیا ۔
انہوں نے کہا کہ بدقسمتی سے پچہتر سال میں ملک پر حکومت کرنے والوں نے ملک سے کرپشن کے خاتمے کے لیے خاطر خواہ اقدامات نہیں اٹھائے بلکہ ایسا ماحول پیدا کر دیا گیا ہے جس سے پاکستانی معاشرے میں کرپشن کے لیے قبولیت کے جذبات پروان چڑھ چکے ہیں ۔ ملک میں کرپشن سے کھربوں روپے لوٹنے والے ہی قانون ساز اداروں میں بیٹھے احتساب کے خلاف قانون سازیاں کر رہے ہیں ۔
انہوں نے کہا کہ ہمارے ملک میں وسائلِ اور دولت کی تقسیم انتہائی غیر منصفانہ ہے جس سے غریب طبقہ سب سے زیادہ متاثر ہو رہا ہے پاکستان میں دنیا کے دیگر ممالک سے کئی گنا زیادہ کرپشن ہے اور بدعنوانی میں ملوث طاقتور لوگ قانون کی پکڑ سے ہمیشہ محفوظ رہتے ہیں جب تک بااثر بدعنوان افراد پر ہاتھ نہیں ڈالا جائے گا ملک سے کرپشن کا خاتمہ ممکن نہیں اور یہ ناسور ملکی بنیادوں کو کھوکھلا کرتا رہے گا لہذا ضرورت اس امر کی ہے کہ کرپشن کے خلاف صرف خوبصورت نعروں سے نہیں بلکہ سختی کے ساتھ عملی اقدامات اٹھانے سے ہی نجات مل سکتی ہے۔
وحدت نیوز(کوئٹہ)مجلس وحدت مسلمین بلوچستان کے صوبائی نائب صدر سہیل اکبر شیرازی نے امام جمعہ والجماعت کوئٹہ علامہ حسنین وجدانی کی سیکورٹی اداروں کی جانب بلاجواز گرفتاری کو غیر آئینی وغیر قانونی قرار دیتے ہوئے کہا کہ علامہ وجدانی محب وطن پاکستانی اور پر امن شہری ہیں علامہ صاحب ہمیشہ امن و بھائی چارے کی بات کرتے ہیں انکی گرفتاری ایک بزرگ عالم دین کی بے حرمتی ہے سی ٹی ڈی کے اس ظالمانہ رویہ کی پر زور مذمت کرتے ہیں اور حکومت بلوچستان ،گورنر، وزیراعلی، وزیر داخلہ، آئی جی پولیس سے مطالبہ کرتے ہیں کہ علامہ صاحب فی الفوررہا کیاجائے۔
وحدت نیوز (کوئٹہ) مجلس علمائے شیعہ بلوچستان کے صوبائی نائب صدر علامہ ذوالفقارعلی سعیدی نے اپنے ایک بیان میں کہاہے کہ معروف عالم دین ، امام جمعہ کوئٹہ علامہ غلام حسنین وجدانی نے ہمیشہ مسلمانوں کے درمیان اتحاد بین المسلمین کا پیغام عام کیاہے اور ہمیشہ پاکستان بچانے اور قوم کو متحد کرنے کی بات کرتےہیں۔ انہیں بے بنیاد الزام لگا کر ذہنی طور پر ٹارچر کرنا انصاف نہیں ہو سکتا ہے۔
انہوں نے مزید کہا کہ علامہ صاحب ہمیشہ امن و بھائی چارے کی بات کرتے ہیں انکی گرفتاری ایک بزرگ عالم دین کی بے حرمتی ہے انہوں نے حکومت بلوچستان ، گونر وزیراعلی ، وزیر داخلہ آئی جی پولیس سے مطالبہ کرتے ہیں کہ علامہ صاحب کو فی الفوررہا کیاجائے۔
