وحدت نیوز(گلگت) مجلس وحدت مسلمین پاکستان کے مرکزی وائس چیئرمین علامہ احمد اقبال رضوی نے کہا ہے کہ ملک میں اسلامی نظام کے نفاذ تک عملی جدوجہد جاری رکھیں گے۔ آزاد خارجہ و داخلہ پالیسی ہماری تحریک کا بنیادی مقصد ہے۔ اپنے ملک کے قومی مفادات پر آنچ آنے نہیں دیں گے۔ قائد شہید عارف حسین الحسینی کے دیئے ہوئے سیاسی منشور پر عمل پپیرا ہو کر دشمن کی سازشوں کو ناکام بنا دیں گے۔ انہوں نے کہا کہ مملکت خداداد پاکستان کی جغرافیائی سرحدوں کی حفاظت ہماری عقیدے کا حصہ ہے۔ وحدت ہاؤس گلگت میں منعقدہ عزم نو کنونشن سے خطاب کرتے ہوئے علامہ سید احمد اقبال رضوی نے کہا کہ پاکستان کی آزاد خارجہ پالیسی ہی ملک کی سیاسی اور معاشی استحکام کیلئے ضروری ہے۔

ان کا کہنا تھا کہ ہمارا ملک استعماری قوتوں کے اثر و رسوخ اور مداخلت کی وجہ سے سیاسی اور معاشی عدم استحکام کا شکار ہے، ایسے میں ہماری ذمہ داری ہے کہ ہم پاکستان کی سلامتی کیلئے اپنی ذمہ داریاں بہتر انداز میں انجام دیں اور امید کی جاتی ہے کہ ریاستی ادارے قومی مفادات کا تحفظ یقینی بنائیں گے تاکہ عوام میں پائی جانے والی بے چینی دور ہو۔ اس موقع پر سید اسد عباس نقی نے شرکاء کنونشن سے خطاب کرتے ہوئے کہا کہ ہم سیاست عبادت سمجھ کر کر رہے ہیں اور ہمارا دین سیاست کے بغیر ادھورا ہے۔ مجلس وحدت مسلمین مظلوم طبقات کی نمائندہ جماعت ہے اور بلاتفریق مذہب و مکتب خدمات سرانجام دے رہے ہیں۔

کنونشن سے خطاب کرتے ہوئے ایم ڈبلیو ایم جی بی کے نائب صدر شیخ نیئر عباس مصطفوی نے کہا کہ مجلس وحدت مسلمین نے قومی سطح پر منتشر قوم کو ایک پلیٹ فارم پر جمع کرنے کی پوری سعی کی ہے اور خدا کے فضل سے قوم میں نفرتیں بہت حد تک کم ہو چکی ہیں۔ اس کنونشن میں عارف حسین قنبری کو اکثریت رائے سے مجلس وحدت مسلمین ضلع گلگت کا صدر، برادر قلب علی کو ضلع نگر، تحصیل دنیور کا یاور حسین، تحصیل گلگت اظہر حسین جبکہ ضلع استور کیلئے شیخ عبد الواحد کو چیف آرگنائزر منتخب کیا گیا۔

وحدت نیوز(کراچی)مجلس وحدت مسلمین ضلع ملیر کے زیراہتمام مرکزی امام بارگاہ جعفر طیار سوسائٹی میں منعقدہ سہ روزہ مجالس بسلسلہ شہادت شہزادی کونین فاطمہ زہرا سلام اللہ علیہا سے خطاب کرتے ہوئے علامہ سید محمد علی نقوی نے کہا ہے کہ جن کی تعظیم میں پوری کائنات کھڑی ہوجائے انہیں محمد مصطفیٰ ۖ کہتے ہیں اور جس ہستی کی تعظیم میں خود محمد مصطفیٰ ۖ کھڑے ہوجائیں انہیں فاطمہ زہرا سلام اللہ علیہا کہتے ہیں، جناب فاطمہ سلام اللہ علیہا کو پنجتن پاک میں کلیدی حیثیت حاصل ہے، وہ اللہ کے نبی کی بیٹی، ولی اور شیرخدا کی زوجہ اور سیدین شباب اہل جنت کی والدہ ہیں، مخدومہ کونین نے ہر رشتے میں اپنے نمونہ عمل کو مثالی بنایا، بندگی میں یہ اعزاز پایا کہ اللہ رب العزت نے ہر نماز کے دعائوں کی مستجابی کے لئے تسبیح زہرا سلام اللہ علیہا کو مجرب وسیلہ قرار دیا۔

ان کا کہنا تھا کہ بیٹی کے روپ میں آپ سلام اللہ علیہا نے ام ابیہا کا اعزاز حاصل کیا اور اسے نبھاتے ہوئے والد گرامی کے وصول کے بعد صرف تین ماہ بقید حیات رہیں، زوجہ کے طور پر حضرت علی (ع) کے حق کے تحفظ کی اعانت میں اپنی جان جان آفرین کے سپرد کردی، اولاد کی پرورش ایسے کی کہ دونوں شہزادے جنت کے جوانوں کے سردار قرار پائے اور اللہ دین کی بالادستی کے لئے اپنے تن من دھن کو قربان کردیا۔آپ سلام اللہ علیہا کی دونوں بیٹیوں نے بھی زینب کبریٰ اور زینب صغریٰ جیسے اسماء ہائے مبارکہ کی لاج رکھتے ہوئے خود کو باپ کی زینت ثابت کیا، جناب فاطمہ سلام اللہ علیہا کے بطن مبارکہ سے جنم لینے والے ہر بچہ نے ثابت کیا کہ اہلبیت نبوی ہی اللہ پاک کا وہ اصل چہرہ ہیں جنہیں قرآن حکیم میں وجہہ اللہ سے موسوم کیا گیا ہے، یہی وہ ہستیاں ہیں جن کے ذکر پر درود و سلام واجب ہوجاتا ہے اور درود و سلام ہی اللہ کی معرفت ہے۔

انہوں نے مزید کہا کہ اللہ رب العزت قرآن کریم میں ارشاد فرماتا ہے کہ اللہ اور اس کے ملائکہ ہمہ درود و سلام میں مشغول رہتے ہیں لہذا جب کوئی بنی بشر درود و سلام پڑھتا ہے تو اپنی فریکوینسی اللہ پاک اور ملائکہ کرام اجمعین سے ٹیون کرلیتا ہے، اس لئے ہمیں چاہیئے کہ کثرت سے درود پاک کا ورد زبان رکھیں، یہ قرب و ارتباط الہی کا بہترین ذریعہ ہے، اسی طرح صدقہ بھی اللہ سے قرب اور تقویٰ کا موجب ہے، صدقہ کہتا ہے کہ میں فانی تھا اور صاحب صدقہ نے مجھے باقی کردیا، میں قلیل تھا اور صدقہ دینے والے نے مجھے کثیر کردیا۔ انہوں نے مزید کہا کہ قرآن و اہلبیت سے متمسک رہ کر ہی ہم صراط مستقیم کے راہی بن سکتے ہیں کیونکہ دونوں نور الہی ہیں، کتابی شکل میں قرآن صامت اور اہلبیت عملی شکل میں قرآن ناطق ہیں، کربلا میں سید الشہداء ابا عبداللہ الحسین کی شہادت نے ہمیں سبق دیا کہ سبط پیمبرؑ ہی وہ ہستی ہیں جنہوں نے رہتی دنیا کو حریت اور سربلندی کا سبق دیا کہ اقوام عالم میں راس المرفوع یعنی سرفراز کے طور جانے جاتے ہیں۔

انہوں نے ایک سجدے میں مقام بشریت کو اشرف المخلوق کی معراج، حسین منی وانا من الحسین کا وعدہ، مخدومہ کونین جیسی ماں کی تربیت، جد ابوطالب اور پدر علی مرتضیٰ کی غیرت و حمیت، بنی ہاشم کے صبر و استقلال اور جاہ جلال کے مرقع جلوہ گر کردیئے کہ رہتی دنیا تک پوری انسانیت ہزاروں سال کی زندگی پاکر بھی ایسا نمونہ توحید و یقین پیش کرنے کی کوشش کرے تو کامیاب نہیں ہوسکتی، یہ شیر فاطمہ سلام اللہ علیہا کہ تاثیر امام حسین علیہ سلام ہی جن کی اعزاز میں اللہ رب کریم کو قرآن پاک کے سورہ الفجر میں گویاہونا پڑا کہ اے چین پالینے والی جان، اپنے رب کی طرف باہمی رضا کے اعزاز کے ساتھ لوٹ ،حق بندگی ادا کرنے والے کامیابوں میں شامل اور باغ بہشت میں ابداََ ابدا داخل ہوجا۔

وحدت نیوز(اسلام آباد) مجلس وحدت مسلمین شعبہ خواتین اسلام آباد کی جانب سے سیمینار بعنوان زن ،زندگی آزادی اسلام کی نگاہ میں جامعہ معصومہ بہارہ کہو اسلام آباد میں منعقد ہوا جس میں مومنات کی کثیر تعداد نے شرکت کی۔ سیمینار کے انعقاد میں ضلعی صدر اسلام آباد محترمہ صدیقہ کائنات اور ان کی کابینہ سمیت مرکزی آفس سیکرٹری محترمہ بینا شاہ نے بھرپور کاوش کی ۔

سیمینار سے جناب مولانا مھدی کاظمی ، محترمہ پارس فاطمہ ، محترمہ عنصر زہرا پرنسپل جامعہ معصومہ جبکہ مرکزی خطاب مرکزی صدر مجلس وحدت مسلمین شعبہ خواتین محترمہ سیدہ معصومہ نقوی صاحبہ نے کیا ،انہوں نے کہا کہ یہ تمام لوگ جو صرف دھوکہ دینے کے لئے خواتین کی آزادی کا نعرہ لگاتے ہیں دراصل چاہتے ہیں معصوم مسلم عورتوں کو ہوس پرستی اور فحاشی کی زنجیروں میں قید کریں اور ان سے اس راہ میں غلامی کروائیں ، جبکہ دین اسلام ہی ہے جو ہماری مومنات کو اصل آزادگی اور حریت کی طرف دعوت دینے والا ہے۔

 ان کا مزید کہنا تھا کہ انشاء اللہ وطن عزیز میں ایک دن ایسا آئے کہ اسلامی جمہوریہ ہونے کے ناطے حجاب کو قانونی طور پر مسلم خواتین کے لئے لازمی قرار دیا جائے ، تمام مسلمان خواتین موظف ہوں گھروں سے نکلتے وقت سروں کو ڈھانپ کر باہر نکلیں کیونکہ اصل آزادی نام ہی اسی کا ہے کہ انسان نفس کی غلامی سے آزاد ہو جائے اور اللہ تعالیٰ کے بنائے ہوئے قوانین کا تابع ہوجائے۔