وحدت نیوز(اسلام آباد)قائد اعظم محمد علی جناح کے حقیقی پاکستان کی تکمیل ہی ساری مشکلات سے نجات کا واحد ذریعہ ہے۔قائداعظم محمد علی جناح نے جس پاکستان کے قیام کے لیے ایک طویل جدوجہد کی ہم بھی اسی پاکستان کا قیام چاہتے ہیں۔ ایسا پاکستان جہاں قانون کی بالادستی ہوجو تعصب، انتہا پسندی، تکفیر یت،کرپشن، اقربا پروری اور ظلم سے پاک ہو ۔ ان خیالات کا اظہار سربراہ مجلس وحدت مسلمین پاکستان علامہ ناصر عباس جعفری بابائے قوم قائد اعظم محمد علی جناح کے147ویں یوم پیدائش پر میڈیا سیل سے جاری اپنے بیان میں کیا انہوں نے کہا کہ بانی پاکستان کی رہنمائی میں قوم کی بے شمار قربانیوں کی بدولت یہ عظیم مملکت خداد داد کا حصول ممکن ہوا لیکن موجودہ حکمرانوں نے حصول پاکستان کے مقاصد کو پس پشت ڈالتے ہوئے اپنے اقتدار اور مفادات کے تحفظ میں مصروف ہیں۔ قائد اعظم چاہتے تھے کہ اسلامی نظریہ پر بنائے گئے ملک میں عوام الناس کو تمام تر بنیادی حقوق حاصل ہوں اور سماج میں طبقاتی تقسیم کا نام و نشان تک نہ ہو، تمام تعصبات سے بالاتر ہوکر کر سب کو انکے مذہبی،معاشی،معاشرتی اور سیاسی حقوق میسر ہوں۔

انہوں نے کہا کہ اقتدار کے پجاری اور بیرونی استعماری قوتوں کے کاسہ لیس حکمرانوں نے قائد اعظم اور قوم کی قربانیوں کو فراموش کر دیا ہے آج نوجوانوں کو بابائے قوم کے ویژن سے روشناس کرانے کی اشد ضرورت ہے ان کے رہنما اصول ایمان اتحاد تنظیم سے تجدید عہد کرنے کا دن ہے جسے پوری قوم کو بھرپور انداز سے منانا چاہیے تاکہ قائد کی فکری راہ پر چل کر وطن عزیز کو ترقی واستحکام کی طرف گامزن کیا جا سکے۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجا ناصر عباس جعفری نے پیغمبر خدا حضرت عیسیٰ علیہ السلام کی ولادت باسعادت کے موقع پر اپنے پیغام میں کہا ہے کہ 25 دسمبر کا دن مسلمانوں اور مسیحی برادری دونوں کیلئے مشترکہ طور پر خوشیوں کا باعث ہے۔ حضرت عیسیٰ علیہ السلام کا یوم ولادت یگانگت اور باہمی تعلقات کو فروغ دینے کا موقع فراہم کرتا ہے۔ خوشیاں بانٹنا بھائی چارے اور رواداری میں اضافے کا سبب ہے۔انہوں نے دنیا کے مظلومین سمیت مسیحی برادری کو انکے مذہبی تہوار پر مبارکباد پیش کرتے ہوئے کہا ہے کہ امن اور محبت کا فروغ حضرت عیسٰی علیہ السلام کی تعلیمات کا خاصہ ہے آپ صاحبان شریعت انبیاء علیہم السلام میں ایک ہیں اور ابھی تک ژندہ ہیں۔ دین اسلام کی تعلیمات کے مطابق تمام انبیاء کرام کی عزت و توقیر کرنا ہمارا دینی فریضہ ہے۔ حضرت عیسیٰ علیہ السلام سمیت تمام انبیاء پر ایمان دین اسلام کا لازمی جزو ہے۔

انہوں نے کہا کہ ملک میں بسنے والی تمام اقلیتی برادریوں کو مکمل مذہبی آزادی اور مساوی حقوق ملنا پاکستان کے بنیادی نظریہ کا لازمی جزو ہے۔ مسیحی برادری سمیت تمام اقلیتوں کو اپنے عقائد کے مطابق زندگی بسر کرنے کی مکمل آزادی ملنا ان کا حق ہے صحت و تعلیم کے شعبوں میں مسیحی برادری کی خدمات لائق تحسین ہیں۔ ملک کو آگے لے جانے کیلئے ہمیں مل کر تحمل، برداشت اور رواداری کے کلچر کو پروان چڑھانا ہو گا۔ پاکستان ہم سب کا ہے لہٰذا بین الامذاہب ہم آہنگی کے فروغ کیلئے سب کا مل کر کام کرنا ہی ملکی ترقی کا باعث بنے گا۔انہوں نے کہا کہ پاکستان کو اس وقت جن مسائل کا سامنا ہے ان میں بین المذاہب ہم آہنگی کی ضرورت پہلے سے بڑھ گئی ہے، پاکستان کو انس ومحبت کے شگوفوں سے سجانے کے لئے ایک دوسرے کے ہاتھوں کو تھامنا ہوگا کیونکہ تحریک پاکستان اور حصول وطن میں مسلمانوں کے ساتھ ساتھ مسیحی برادری کا بھی کردار شامل ہے اس موقع پر تمام مذاہب کے ماننے والوں کو ایک سچے پاکستانی کی حیثیت سے ملک کی تعمیر و ترقی کے لیے اپنا موثر کردارادا کرنے کا عزم کرنا ہوگا۔

وحدت نیوز(لاڑکانہ)مجلس وحدت مسلمین پاکستان ضلع لاڑکانہ کے زیر اہتمام سر شاہنواز بھٹو میموریل لائبریری میں شہدائے اسلام وپاکستان کی یاد میں عظیم الشان عظمت شہداء کانفرنس کا انعقاد کیا گیا۔ جس میں ایم ڈبلیوایم کے صوبائی نائب صدر حجۃ الاسلام و المسلمین علامہ رضا محمد سعیدی، صوبائی نائب صدر جناب طارق حسین بدوی، صوبائی سیکرٹری تبلیغات حجۃ الاسلام و المسلمین مولانا غلام شبیر کانہیو، اصغریہ آرگنائزیشن کے مرکزی رہنما استاد عبدالرزاق بلوچ اور جناب فضل حسین اصغری صاحب کے علاوہ جمعیت علمائے پاکستان کے صوبائی نائب صدر مولانا حافظ روشن علی انقلابی، ضلعی انچارج مولانا حافظ شعیب علی اور لاڑکانہ کی معزز شخصیات جناب مسعود احمد چغتائی، جناب شمس الدین کلہوڑو، جناب الطاف حسین بھرگڑی، منٹھار علی سولنگی شریک تھے۔

مجلس وحدت مسلمین کے سابق عہدیداران جناب طارق رسول انڑ، جناب اعجاز علی سولنگی، جناب ایڈوکیٹ بشیر حسین لاڑک، جناب بشیر احمد شیخ، جناب جاوید فاضل حسینی اور انجمنوں کے صدور و متولی جناب سجاد حسین جعفری، مولانا انور علی حیدری، محترم غلام فاروق بھرگڑی، محترم خالد حسین سموں، محترم جسارت علی سموں، محترم جناب بشیر احمد شیخ کے علاوہ کانفرنس میں محترم گدا حسین انڑ، محترم نوشاد علی کھوکر، محترم عمران علی کھوکر اور دیگر شرکاء نے شہدائے ملت جعفریہ، آرمی، رینجرز، پولیس، اے پی ایس اور دیگر راہ حق کے شہداء کو خراج عقیدت پیش کیا۔ شہداء کی یاد میں شمعیں روشن کی گئی۔

موجودہ ضلعی کابینہ کے تمام عہدیداران اور ممبران محترم آغا سہراب علی میرانی، محترم گدا حسین جتوئی، محترم زوہیب علی سانگی، محترم غلام حیدر منگی، ظفر علی انڑ، سعید علی میرانی، مولانا افضل حسین کھٹیان، محترم علی فرمان انڑ ،منصور علی سہاگ کے علاوہ تمام یونٹس سے مومنین نے بھرپور شرکت کی۔ آخر میں ضلعی نائب صدر مولانا مولا بخش مرتضائی نے شہداء کے ایصال ثواب کے لیے فاتحہ خوانی کی۔

وحدت نیوز(لاہور) وائس چیئرمین مجلس وحدت مسلمین پاکستان علامہ احمد اقبال رضوی نے بانی پاکستان قائد اعظم محمد علی جناح ؒ کے یوم ولادت پر اپنے پیغام میں کہا ہے کہ دیانت ، امانت اور صداقت قائد اعظمؒ کی شناخت تھی۔ انہوں نے عمر بھر عوامی و قومی وسائل اور اثاثوں کی حفاظت کی، عوامی و ریاستی عہدے کو کبھی اپنی ذات کےلئے استعمال نہیں کیا۔

انہوں نے اپنی کامیاب پیشہ ورانہ زندگی کو پاکستان کی آزادی اور پھر معاشی استحکام کے لئے قربان کیا ۔ ایماندار قیادت سے قومیں عروج پاتی ہیں اور بدعنوان ارباب اختیار قوموں کے زوال کا سبب بنتے ہیں اور آج ہم دیکھ بھی رہے ہیں۔ انہوں نے قیام پاکستان کے فوری بعد اقربا پروری ،رشوت ستانی ،ذخیرہ اندوزی سے بچنے کی ہدایت کی تھی مگر آج وہ سب کچھ مملکت خداداد میں دھڑلے سے کیا جارہا ہے جس سے قائد اعظمؒ نے منع فرمایا تھا۔