وحدت نیوز (پشاور) اسلام آباد میں چیئرمین مجلس وحدت مسلمین پاکستان علامہ راجہ ناصر عباس جعفری اور پاراچنار میں تحصیل چئیرمین جناب مزمل حسین فصیح کی حکومتی بےحسی کے خلاف پریس کانفرنس نے خیبرپختونخواہ حکومت کو ہوش کے ناخن لینے پر مجبورکردیا۔مجلس وحدت مسلمین کے پی کے اور تحریک انصاف کے پی حکومت کے درمیان باضابطہ مذاکرات کا آغاز ہوگیا۔

ایم ڈبلیو ایم کے صوبائی صدر علامہ جہانزیب جعفری , مرکزی راہنما علامہ سید عبدالحسین الحسینی، صوبائی جنرل سیکرٹری شبیر ساجدی کی بیرسٹر محمد علی سیف صوبائی وزیر اطلاعات و مشیر خاص وزیر اعلیٰ کے درمیان مذاکرات کا آغاز ہوگیا ہے ۔

مذاکرات میں صوبے بھر کے مسائل پر سیر حاصل بحث ہوئی ۔ ایم ڈبلیو ایم کے صوبائی صدر وجنرل  سیکریٹری نے واضح کر دیا کہ پاراچنار ، ہنگو ،کوہاٹ، ڈی آئی خان،  پشاور اور ہزارہ ڈویژن کے مسائل حل کئے بغیر پی ٹی آئی کے ساتھ چلنا مشکل ہوگیا ہے ۔

وفد نے کہا کہ ایم ڈبلیوایم کے منتخب تحصیل میئر کے فنڈز روک کر صوبائی حکومت نے اہلیان کرم پر ظلم وزیادتی کی ہے، کوٹلی امام حسینؑ کی اراضی پر قبضے کا معاملہ بھی تاحال حل نہیں کیا گیا،ہم پہلے اپنی کمیونٹی کے مسائل کا حل چاہتے ہیں اس کے بعداتحاد پر بات آگے بڑھےگی ۔

ایم ڈبلیوایم کے وفد کی جانب سے تحفظات اور شکایات سننے کے بعد بیرسٹر محمد علی سیف نے کہا کہ میں ایک ہفتے کی مہلت دیں میں وزیراعلیٰ خیبرپختونخواہ محمودخان تک آپ کے تمام مطالبات پہنچاکر تفصیلی بات کرکے آپ سے دوبارہ رابطہ قائم کروں گا۔

وحدت نیوز(پشاور)مجلس وحدت مسلمین خیبر پختونخوا کے نائب صدر علامہ ارشاد علی نے اپنے ایک بیان میں کہا ہے کہ پی ٹی آئی حکومت نے ملت جعفریہ کو مایوسی کے سوا کچھ نہیں دیا، ہنگو میں عوامی فلاح و بہبود کے اہم اداروں کو معتصابہ رویئے کے تحت ہمارے ایریا سے دور دارز علاقوں میں شفٹ کر دیا گیا ہے۔ ایک مخصوص مکتب فکر کو ہر لحاظ سے دیوار سے لگایا گیا، جن علاقوں میں طالبان قابض ہوئے تھے وہاں کے لوگوں کو بے دخل کر کے گھروں کو مسمار کیا تھا وہاں حکومت نے ان مکینوں کو آباد کر کے نئے گھر بنائے۔ مگر ہمارے صرف ایک علاقہ شاہوخیل کے مکین آج بھی مسمار گھروں میں رہنے پر مجبور ہیں۔ انہوں نے کہا کہ مجلس وحدت مسلمین کے پی ٹی آئی حکومت کے ساتھ صف اول میں کھڑے ہونے کے باوجود کوہاٹ، پاراچنار، ڈی آئی خان سمیت تمام اضلاع میں مسائل جوں کے توں ہیں۔

انہوں نے کہا کہ وزیر اعلٰی سے ملاقات کے علاوہ مرکزی قائدین سے فون کرانے کے باوجود صوبائی حکومت جان بوجھ کر ہمارے مسائل حل نہیں کررہی ہے جس سے یہ واضح تاثر ملتا ہے کہ صوبائی حکومت کسی کی ایماء پر ہمارے مطالبات ماننے کو تیار نہیں ہے لہذا ہم بھی صوبائی حکومت پر واضح کرنا چاہتے ہیں کہ جب تک ہمارے بنیادی حقوق ہمیں فراہم نہیں کئے جاتے ہمارا احتجاج جاری رہے گا۔ ہمارے ساتھ دیگر سیاسی جماعتوں کے نمائندے بھی رابطے کررہے ہیں ان پر بھی غور و فکر جاری ہے۔ علامہ ارشاد علی نے کہا کہ جو بھی عمران خان کے ویژن کو اگر نقصان پہنچا رہے ہیں تو پی ٹی آئی کے چیئرمین کو بھی چاہیئے کہ انکے خلاف ایکشن لیں اور پارٹی کو پہنچنے والے نقصان سے روکیں۔ عمران خان کو جو نقصان بیرونی دشمن نہیں پہنچا سکے وہ نقصان اندر والے اپنے پہنچارہے ہیں۔

وحدت نیوز (لاہور) غلامی سے انکار، آزاد خارجہ پالیسی، داخلی خودمختاری ہماری پاک سرزمین پر غیر ملکی فوجی اڈوں کی مخالفت، پاکستان کے فیصلے پاکستان میں ہی ہونگے، یہ پاکستان کی عوام کا بیانیہ، ہمارا بیانیہ ہے اور پی ٹی آئی کا بیانیہ ہے جو دین اسلام کا حکم بھی ہے، ہم اس بیانیے پر آخری سانس تک ثابت قدم رہیں گے۔ ان خیالات کا اظہار چیئرمین مجلس وحدت مسلمین پاکستان علامہ راجا ناصر عباس جعفری نے وفد کے ہمراہ پی ٹی آئی چیئرمین عمران خان سے زمان پارک میں ملاقات کے بعد میڈیا سے گفتگو کرتے ہوئے کیا۔

انہوں نے کہا ہے کہ وزیر اعلیٰ پنجاب چوہدری پرویز الٰہی نے ہمارے ساتھ امتیازی سلوک روا رکھا ہے جو وعدے کیئے گئے تھے وہ پورے نہیں ہوئے۔ قرآن بورڈ اور امن کمیٹیوں میں نظر انداز کیا گیا اور عزاداری کے جلوسوں پر کاٹی گئی ایف آئی آرز بھی خارج نہیں کی گئی ہیں۔

انہوں نے کہا ہے کہ ہمارے پاس صوبائی اسمبلی کا ووٹ عمران خان کی امانت ہے وہ جہاں کہیں گے ہم دے دیں گے کسی کے کال کرنے سے نہیں اور نہ ہی ہمیں کوئی کال کرنے کی جرآت کر سکتا ہے۔ چیئرمین تحریک انصاف عمران خان نے ہمارے تحفظات کو سنا ہے اور درست قرار دیا ہے اور یقین دہانی کرائی ہے کہ بہت جلد مجلس وحدت مسلمین کوپنجاب اور خیبرپختونخواہ میں درپیش مسائل کو حل کر دیا جائے گا۔

واضح ریے کہ اس ملاقات میں چیئرمین سنی اتحاد کونسل صاحبزادہ حامد رضا ، ایم ڈبلیوایم کے رہنما سید ناصرعباس شیرازی ، اسدعباس نقوی اور دیگر بھی موجود تھے، ایم ڈبلیوایم نے عمران خان کی یقین دہانی کے بعد ووٹ ان کے کہنے پر پرویز الہیٰ کو دینے کا یقین دلایا دیا ہے ۔

وحدت نیوز (اسلام آباد) چیئرمین مجلس وحدت مسلمین پاکستان علامہ راجا ناصر عباس جعفری نے ایم ڈبلیو ایم گلگت بلتستان کے رہنماؤں کے ہمراہ اہم پریس کانفرنس میں پنجاب حکومت کی موجودہ سیاسی صورتحال کے حوالے سے خطاب کرتے ہوئے کہاہے کہ ہمارے تحفظات چوہدری پرویز الٰہی کی طرز حکومت پر ہیں ابھی تو کمزور حیثیت میں پرویز الٰہی یہ سب کچھ کر رہے ہیں اگر پاورفل ہو جاتے ہیں تو پھر کیا ہوگا، ہم عمران خان کے پاس جا کر استعفیٰ تو دے سکتے ہیں لیکن کسی کا پریشر ڈالنا برداشت نہیں کریں گے اور نہ ہی ہمیں کوئی دباؤ میں لانے کا سوچے۔

انہوں نے کہا کہ بلتستان کے عوام کا سب سے بڑا مطالبہ ہے کہ پہلے نمائندگی دی جائے پھر ٹیکسز ادا کریں گے وفاقی حکومت کی طرف سے جی بی کے فنڈز میں کٹوتی، گندم کی فراہمی اور سبسڈی میں کمی کرنا، خالصہ سرکار کے نام پر عوام کی زمینیں ہتھیانہ انتہائی افسوس ناک اور غیر منصفانہ عمل ہے ایسے اقدامات سے قومیں جڑتی نہیں تقسیم ہوتی ہیں۔ ہم عوامی زمینیوں کو جبری چھینے کی مزمت کرتے ہیں فیڈرل گورنمنٹ نے بیس ارب کے فنڈز روک رکھے ہیں اور عوام کو اشتعال دلاکر اس طرف لے جایا جا رہا ہے جو کہ خطرناک ہو سکتا ہے۔

انہوں نے کہا کہ گزشتہ چھ دنوں سے منفی درجہ حرارت میں احتجاجی دھرنا جاری رکھے ہوئے ہیں عوام سات دہائیوں سے چیخ رہے ہیں کہ ہمیں پاکستان کا آئینی حصہ بنایا جائے عوامی حقوق کے لئے دئیے جانے والے دھرنے کی حمایت کرتے ہیں ہم نے اپنے صوبائی اسمبلی کے ممبران کو ان مسائل کے حل کے لئے خصوصی ہدایات دے رکھی ہیں ہم عوام کے ساتھ کھڑے ہیں گلگت بلتستان کے معاملات اور حالات دیکھ رہے ہیں جلد فیصلہ کریں گے۔

انہوں نے کہا کہ ہم نے کرم ایجنسی میں انتخابات جیتے ہیں آج تک صوبائی حکومت نے کرم ایجنسی کے چیئرمین کو فنڈز جاری نہیں کیئے، کرم کی عوام کی ترقی کے عمل کا روکا جانا کسی صورت قبول نہیں ہے، ہمارا خیبر پختونخواہ کے وزیر اعلیٰ سے بھی شکوہ ہے لیکن ہم امید کرتے ہیں کہ وہ ہمارے معاملات درست کرنے کے لیے جلد عملی اقدامات اٹھائیں گے۔