وحدت نیوز(گجرات)مجلس وحدت مسلمین پاکستان صوبہ پنجاب کے صوبائی صدرعلامہ سید علی اکبر کاظمی کا گجرات کادورہ۔ گجرات میں محرم الحرام کے ایام میں مختلف مقامات پر بانیان مجالس کے خلاف ٹائم کی پابندی نہ کرنے ، شورٹی بانڈز نہ دینے  اور مخالفین کی شکایات کو  بہانے بنا کر ایف آئی آر ز درج کی گئی ہیں ۔ علاقے کے مومنین اور بانیان مجالس نے ملکر ضلعی صدر مجلس وحدت مسلمین پاکستان ضلع گجرات سے کہا کہ صوبے یا مرکز کی سطح پر رابطہ کریں تاکہ ان بے بنیاد ایف آئی آرز کاخاتمہ کیا جاسکے۔

ضلعی صدر سید اظہر شاہ جعفری سے جیسے ہی مومنین کرام اور بانیان مجالس نے رابطہ کیا انہوں نے وقت ضائع کیے بغیر رات ہی علامہ سید اکبر علی کاظمی صوبائی صدر مجلس وحدت مسلمین صوبہ پنجاب سے رابطہ کیا ۔ اور گجرات کی صورتحال سے آگاہ کیا ۔صوبائی صدر نے صوبائی عزاداری سیل کے معزز ممبران سے رابطہ کیا اور مشاورت کی ۔ صوبائی صدر مجلس وحدت مسلمین صوبہ پنجاب جناب علامہ سید علی اکبر کاظمی مورخہ 4 اگست کو صبح ظہیر کربلائی صوبائی آفس سیکرٹری و ممبر عزاداری سیل پنجاب کے ہمراہ گجرات پہنچ گئے جہاں پر انہوں نے علاقے کے مومنین کرام اور بانیاں مجالس جن کے خلاف ایف آئی آرز کا اندراج کیا گیا تھا سے ملاقاتیں کی  اور ساری صورتحال سے آگاہی حاصل کی اور وہاں پر موجود مومنین کرام سے خطاب فرمایا کہ ہم تو چودہ سو سال سے اپنا حق مانگ رہے ہیں جو نہیں دیا جارہا ۔ نہ یہ پہلی ایف آئی آرز ہیں نہ آخری ۔ جب تک ہم کربلا والوں کا ذکر کرتے رہیں گے اور نواسہ رسول کی مجالس عزاء برپا کرتے  رہیں گے ۔ نسل یزید کو تکلیف ہوتی رہے گی ۔ہم گجرات کے مومنین کے ساتھ کھڑے ہیں ہائی کورٹ لاہور کا واضح فیصلہ موجود ہے ۔عزاداری سید الشہداء پر قدغن نہیں لگائی جاسکتی۔ ہم قانونی راستہ اپنائیں گے ۔ تنظیمی سطح پر گجرات کی آواز کو صوبائی سطح پر اٹھائیں گے ۔

پنجاب میں کئی مقامات پر اسی طرح کی ایف آئی آرز درج ہوئی ہیں ۔ہم ان سب کا کیس لڑیں گے ۔ہم ہمیشہ عزاداروں کے ساتھ کھڑے ہیں ۔ ہمیں عزاداری کے راستے میں مختلف حربے بہانے اور رکاوٹیں بالکل قابل قبول نہیں ہیں ۔ ہم مومنین کرام بانیاں مجالس کے خلاف بے بنیاد اور جھوٹی ایف آئی آرز کے سلسلے میں ، علاقے کے مومنین سے ہمدردی کرنے یہاں پر آئے ہیں ۔ ہماری پوری کوشش ہوگی کہ ہم آخر تک آپ کا ساتھ دیں۔ اس سلسلے میں کچھ مومنین کرام نے قبل از گرفتاری ضمانتیں بھی کروا رکھی ہیں ۔اب سوموار کو مجلس وحدت مسلمین پاکستان صوبہ پنجاب کے صوبائی نائب صدر جناب حاجی مشتاق ورک، صوبائی ڈپپٹی جنرل سیکریٹری ایم ڈبلیو ایم صوبہ پنجاب جناب سید منتظر مھدی ،ضلعی صدر ایم ڈبلیو ایم جناب سید اظہر شاہ جعفری ایک بھاری بھرکم وفد ہمراہ گجرات کے ڈی سی اور ڈی پی او گجرات سے ملے گا ۔

 امید ہےعزاداری کے سلسلے میں کی گئی بوگس ایف آئی آرز کا مسئلہ مقامی سطح پر ہی حل کرلیا جائے گا ۔ان شاءاللہ۔علاقے کے مومنین اور بانیان مجالس نے صوبائی وفد مجلس وحدت مسلمین پاکستان صوبہ پنجاب کا خصوصی شکریہ ادا کیا اور قبلہ علامہ راجہ ناصر عباس جعفری چیئرمین مجلس وحدت مسلمین پاکستان کی صحت وسلامتی کے لئے دعائیں کیں ۔

وحدت نیوز(اسلام آباد) چیئرمین مجلس وحدت مسلمین پاکستان علامہ راجہ ناصر عباس جعفری نے میڈیا سیل سے جاری اپنے بیان میں عمران خان کی گرفتاری کو سیاسی انتقام کی بدترین مثال قرار دیتے ہوئے اس کی شدید الفاظ میں مذمت کی ہے، اس مضحکہ خیز اقدام سے ملکی عدالتی نظام کی قلعی کھل گئی ہے، قانونی تقاضوں کو پورا کرنے کے برعکس عجلت میں فیصلہ سنایا ہے، جس کا صرف اور صرف مقصد عمران خان کو راستے سے ہٹانے کے سوا کچھ نہیں، 5 اگست جہاں کشمیری عوام کے محاصرے اور استحصال کا دن ہے وہاں پاکستانی عوام کے بنیادی جمہوری و آئینی حقوق کی پامالیوں کا دن بھی ہے، عدالتی فیصلہ آنے سے کئی گھنٹے پہلے پولیس اہلکاروں کا گرفتاری کے لیے زمان پارک پہنچنا ساری منصوبہ سازی کو عیاں کرتا ہے۔

انہوں نے کہا کہ امپورٹڈ حکومت اپنی نااہلی اور نالائقیوں کی خفت سے بچنے کے لیے انتقامی کارروائیوں پر اتر آئی ہے، یہ چوروں کا ٹولہ اپنی کرپشن اور لوٹ کھسوٹ پر پردہ ڈالنے کی خاطر مفاد پرستانہ اور بزدلانہ حرکتوں پر اتر آیا ہے، آج انتقام پرست ٹولے نے سابق وزیراعظم کو ذاتی اناء کی بھینٹ چڑھایا ہے، اس بلا جواز گرفتاری کے ملکی معیشت اور سیاست پر منفی اثرات مرتب ہوں گے، یہ فیصلہ ملکی معیشت کی زبوں حالی کا باعث بنے گا، اس سے صاف ظاہر ہوتا ہے کہ جمہوری نظام و اقدار کی کوئی وقعت و اہمیت نہیں، آئندہ شفاف اور بروقت الیکشنز کے انعقاد میں تاخیری حربے استعمال کیے جانے کا قوی امکان ہے، عوامی عدالت میں موجودہ حکمرانوں کو سبکی کا سامنا کرنا پڑے گا، الیکشنز جب بھی منعقد ہوئے، ذلت آمیز شکست ان کا مقدر ٹھہرے گی۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے 5 اگست 1988ء قائد شہید علامہ سید عارف حسین الحسینی کی 35 ویں برسی کی مناسبت سے اپنے پیغام میں تمام فرزندان اسلام و ولایت کی خدمت میں تعزیت و تسلیت عرض کرتے ہوئے کہا ہے کہ علامہ سید عارف حسین الحسینی پاکستان میں اتحاد بین المسلمین کے حقیقی داعی اور علمبردار تھے، آپ حقیقی معنوں میں فرزند کربلا تھے، آپ ایک شجاع اور مبارز شخصیت کا متحرک اور عملی نمونہ تھے، شہید قائد نے ہمیشہ اجتماعی زندگی کو اپنی ذاتی زندگی پر ترجیح دی، قوم و ملت کے سچے دردمند ہونے کے ناطے قومی مفادات اور سربلندی کی راہ پر گامزن رہے، دین ناب کی ترویج اور عوامی حقوق کے لیے مسلسل کوشاں رہے, آپ رہبر کبیر حضرت امام خمینی رح کے سچے عاشق تھے، جن کی شہادت پر امام راحل نے تعزیتی پیغام بھیجا، آپ نے ملت پاکستان کو کبھی تنہاء نہیں چھوڑا، قوم کے وارث ونگہبان آپ کی محبت ہمارے دلوں کا سرمایہ اور روحوں کی پاکیزگی کا سامان ہے۔

انہوں نے کہا کہ شہید قائد علامہ سید عارف حسین الحسینی نے ملک کے چپے چپے کے دورے کیئے اور کونے کونے میں لبیک یاحسین ع کی صدائیں گونج اٹھیں، کہ اس وقت کی طاغوتی و استعماری قوتیں بھی آپ کے فکری عزم سے خائف تھیں، شہید قائد بصیرت و شجاعت کا اعلیٰ ترین نمونہ تھے، آپ کا ساڑھے چار سالہ دور قیادت، ملت کے لیے قیمتی سرمایہ ہے، عارف زمان، بابصیرت، شجاع، جذبہ شہادت سے سر شار، مجاہد اور وارث کربلا تھے، جس نے پاکستان کے مظلوم عوام کی قیادت کی اور اسی راستے میں جام شہادت نوش کیا لیکن ایک انچ بھی پیچھے نہ ہٹے، شہید عارف حسین الحسینی نے امام خمینی رح کے پیغام وحدت کا علم اٹھایا شہادت تو قبول کی لیکن اسے جھکنے نہیں دیا، خط ولایت پر عمل پیرا ہو کر استقامت کے ساتھ جد وجہد کی عملی تصویر بن گئے، پیکر تسلیم و رضا، منبع اخلاص، عارف الٰہی، مجسمہ عقیدہ و عمل اور نڈر قائد محبوب علامہ سید عارف حسین الحسینی کی شان میں ہماری زبان بولنے سے قاصر ہے، آپ کی ذات بارے لکھنے کے لیے قلم میں تاب نہیں، لیکن ہمارے دل شہید کی یاد اور محبت سے سرشار ہیں۔

وحدت نیوز(جیکب آباد)مجلس وحدت مسلمین شعبہ خواتین ضلع جیکب آباد کے زیر اہتمام قائد شہید علامہ عارف حسین الحسینی رحمۃ اللہ علیہ کی 35 ویں برسی کی مناسبت سے مدرسہ خدیجہ الکبریٰ ع میں مجلس عزاء منعقد ہوئی۔ مجلس عزا سے خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا ہے کہ قائد شہید علامہ عارف حسین الحسینی مجاہد فی سبیل اللہ عابد شب زندہ دار اور محروموں اور مظلوموں کے طرف دار تھے۔ آپ نے اسلام ناب محمدی اور فکر امام خمینی کی روشنی میں پاکستانی قوم کی رہنمائی کی۔ آپ نے عالمی استکباری قوتوں امریکہ اور اسرائیل کو للکارا ۔

انہوں نے کہا کہ 35 سال گذر جانے کے باوجود قائد شہید علامہ عارف حسین الحسینی آج بھی عوام کے دلوں میں زندہ ہیں۔ قائد شہید کے افکار اور تعلیمات آج بھی پاکستانی قوم کے رہبر و رہنما ہیں۔ حضرت امام خمینی رحمۃ اللہ علیہ نے قائد شہید کی شہادت پر پاکستانی قوم کے نام جو پیغام دیا وہ آج بھی ہمارے مسائل کا حل ہے۔انہوں نے کہا کہ مجلس وحدت مسلمین قائد شہید کے پیروکاروں کی جماعت ہے ہم قائد شہید کے افکار و تعلیمات کو اپنا منشور سمجھتے ہیں۔ اس عظیم قائد کے نظریات کی روشنی میں وطن عزیز پاکستان کی سربلندی اور ملت جعفریہ کے حقوق کی جدوجہد جاری رکھیں گے۔اس موقع پر برسی قائد شہید سے مجلس وحدت مسلمین شعبہ خواتین کی رہنما محترمہ رقیہ سلطانہ نے بھی خطاب کیا۔