The Latest
وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے 5 اگست 2019ء کی مناسبت سے اپنے بیان میں کہا ہے کہ یہ دن ہندوستان کے مکروہ چہرے کو دنیا کے سامنے عیاں کرتا ہے، یہ یوم استحصال ہے جس کی شدید الفاظ میں مذمت کرتا ہوں، تحریک آزادی کشمیر کی خاطر اپنی جانوں کا نذرانہ پیش کرنے والے لاکھوں شہداء کو خراج عقیدت و سلام پیش کرتا ہوں، پوری قوم کشمیر کے غیور اور بہادر عوام کے ساتھ کھڑی ہے، جو سالہاسال سے بھارتی ظلم و استبداد کے سامنے ڈٹے ہوئے ہیں، یہ وہ دن ہے جب بھارت نے کشمیری عوام پر اپنے غیر معمولی ظلم وبربریت کی انتہاء کر دی، دنیا بھارتی مظالم سے تو پہلے ہی واقف تھی لیکن کشمیری عوام کا محاصرہ کرکے اس نے حد کردی، قابض فورسز نے شب و روز کشمیری عوام کو اپنے مظالم کا نشانہ بنایا ہوا ہے، روزانہ گھر گھر تلاشی اور جیلوں میں کئی بے گناہ جوانوں کو بے دردی سے شہید کر دیا جاتا ہے۔
انہوں نے کہا کہ بھارت نے چار سالوں کے دوران مقبوضہ کشمیر میں آبادی کے تناسب کو بگاڑنے کی شرمناک کوشش کی ہے، آرٹیکل 370 اور A-35 غیر منصفانہ اور جنیوا کنونشن 4 کے آرٹیکل 49 کی کھلم کھلا خلاف ورزی ہے، مودی سمیت بھارت کی تمام حکومتوں نے اقوام متحدہ کی قراردادوں کو اپنے پاؤں تلے روندہ ہے، انسانی حقوق کی سنگین خلاف ورزیوں کے باوجود عالمی برادری کی مسلسل خاموشی افسوسناک ہے، انسانی حقوق کی پامالیوں کا سلسلہ کشمیر سمیت پورے ہندوستان میں جاری ہے، مغربی میڈیا نے جب بھارتی عیاری اور مکاری کو آشکار کیا تو اس پر قدغنیں لگا دی گئیں، ہمارے حکمران دنیا کے سامنے کشمیری عوام کے مضبوط موقف کو پیش کرنے سے قاصر ہیں، جس کی بدولت ہندوستان اپنے ناجائز قبضے کو تقویت دے رہا ہے۔
وحدت نیوز(کوئٹہ)مجلس وحدت مسلمین کوئٹہ کے صدر ارباب لیاقت علی ہزارہ نے کہا ہے کہ پولیس کے ہوتے ہوئے بلوچستان میں ایف سی کو لانا خود ادارے پر ایک سوال ہے۔ ہزارہ قوم پر ایف سی کی موجودگی میں بڑے سانحات ہوئے ہیں۔ لشکر جھنگوی اور جو دیگر جعلی تنظیمیں ہیں۔ ہمیں بے وقوف نہ بنایا جائے۔ ان خیالات کا اظہار انہوں نے کوئٹہ میں پریس کانفرنس کرتے ہوئے کیا۔ انہوں نے کہا کہ مجلس وحدت مسلمین ایک ملک گھیر جماعت ہے۔ ہم نے روز اول سے اتحاد بین المسلمین کا بہترین مظاہرہ کیا ہے۔ شیعہ اور سنی مسالک سے تعلق رکھنے والے افراد ہماری جماعت سے تعلق رکھتے ہیں۔ انہوں نے کہا کہ بلوچستان اور خیبر پختونخوا کو تجربہ گاہ بنایا گیا ہے۔ ہمیں تجربہ کیلئے استعمال کیا جاتا ہے اور ہم لاشیں اٹھاتے آئے ہیں۔
انہوں نے گزشتہ دنوں کوئٹہ میں دہشتگردی کے واقعات کی مذمت کرتے ہوئے کہا کہ جب لشکر جھنگوی کے نام سے حملے کئے جاتے ہیں تو ہمارے سکیورٹی ادارے، پولیس اور ایف سی کیا کر رہی ہوتی ہے۔ انہوں نے کہا کہ کوئٹہ کے حساس حالات کے باوجود ہزارہ قوم سے تعلق رکھنے والے پولیس اہلکاروں کو ان مقامات پر بھیجا گیا جہاں انہیں خطرہ ہے۔ انہوں نے ہزارہ ٹاؤن میں پیش آنے والے واقعات پر بھی تشویش کا اظہار کرتے ہوئے کہا کہ ہزارہ ٹاؤن میں ایف سی اہلکار کی جانب سے کمسن بچے کو ہراساں کیا گیا تو چوبیس گھنٹے گزرنے کے باوجود ایف آئی آر، جو ہمارا بنیادی حق ہے، سے ہمیں محروم رکھا گیا۔ پولیس کے ہوتے ہوئے بلوچستان میں ایف سی کو لانا خود ادارے پر ایک سوال ہے۔ پولیس کو اختیارات فراہم کئے جائے۔ انہوں نے کہا کہ ہزارہ کمیونٹی پر ہمیشہ ایف سی کی موجودگی میں سانحات ہوئے ہیں۔
ایف سی کے جو افسران کسی واقعہ میں ملوث ہے تو اسکی وجہ سے پورے ادارے کی امیج خراب نہ کرے۔ انہوں نے کہا کہ اگر ہزارہ کلینگ پالیسی کا حصہ ہے تو اس دور میں یہ پالیسی کامیاب نہیں ہونے والی، گزشتہ 23 سال سے یہی کیا گیا۔ انہوں نے کہا کہ اہل تشیع نے ہمیشہ پاکستان کی بہتری کیلئے کام کیا ہے۔ مگر اسکے باوجود ہمیں ہی مارا جا رہا ہے۔
انہوں نے کہا کہ ہم سب جانتے ہیں کہ کون کیا کر رہا ہے۔ انہوں نے کہا کہ پاکستان کی سالمیت کیلئے سکیورٹی ادارے اقوام کو آپس میں لڑوانا بند کرے۔ لشکر جھنگوی اور جو دیگر جعلی تنظیمیں ہیں۔ ہمیں بے وقوف نہ بنایا جائے۔ انہوں نے صوبائی حکومت کو بھی تنقید کا نشانہ بناتے ہوئے کہا کہ حکومت کی کوئی کارکردگی ہے ہی نہیں، ان سے کوئی توقع نہیں رکھتے۔ ہم چیف آف آرمی اسٹاف اور کور کمانڈرز سے یہی چاہتے ہیں کہ اس ملک میں ہمیں تحفظ دیا جائے۔
وحدت نیوز(جیکب آباد)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے شہدائے کربلا کی یاد میں منعقدہ مجلس عزا سے خطاب کرتے ہوئے کہا ہے کہ شہداء کربلا نے دین اسلام کی بقاء اور سر بلندی کے لئے دشت کربلا میں جو بے مثال قربانی دی وہ بقاء اسلام کی ضمانت ہے۔ شہدائے کربلا نے ظلم و استبداد کی فضاء میں حق و صداقت اور پرچم اسلام کو بلند کرتے ہوئے یزیدی سلطنت کے مکروہ چہرے کو بے نقاب کیا۔انہوں نے کہا کہ عصر حاضر کی یزیدیت کو رسوا کرنے کے لئے ہمیں حضرت امام حسین علیہ السلام کے نقش قدم پر چلنا ہوگا کربلا ہر دور کے انسانوں کے لئے نظام حیات اور بہترین درسگاہ ہے۔
انہوں نے ملک بھر میں دھشت گردی کے واقعات کی شدید الفاظ میں مذمت کرتے ہوئے کہا کہ وقفے کے بعد ایک مرتبہ پھر کوئٹہ میں ہزارہ شیعہ نسل کشی کا آغاز کیا جا رہا ہے ملک بھر میں ایک سازش کے تحت کالعدم دہشت گرد تنظیموں کی سرپرستی کرتے ہوئے فرقہ وارایت اور نفرت کو ہوا دی جا رہی ہے۔ ریاستی ادارے ملک میں دھشت گردی کی نئی لہر کو روکیں۔
وحدت نیوز(اسلام آباد) چیئرمین مجلس وحدت مسلمین پاکستان علامہ راجہ ناصر عباس جعفری نے اپنے بیان میں کہا ہے کہ چند روز کی مہمان حکومت نے قانون سازی کی لوٹ سیل لگائی ہوئی ہے، انسانی حقوق آئین کا سب سے اہم ترین اور بنیادی حصہ ہوتے ہیں، آئین وقانون سے بالاتر کسی قانون سازی کا عمل عوام کے بنیادی جمہوری حقوق کی سنگین خلاف ورزی ہے، حکومت جاتے جاتے ایسی قانون سازیاں نہ کرے جن کی زد میں کل وہ خود بھی پھنسے، اس حوالے سے اپوزیشن کی رائے کو بھی خاطر میں نہیں لایا جا رہا، بدقسمتی کی بات ہے کہ نہ تو مسودہ جات پڑھنے دیئے گئے ہیں اور نہ ہی اس پر بحث کی بنیادی ضرورت کو پورا کیا گیا ہے، جس طرح عجلت میں حکومت قانون سازی کر رہی ہے وہ کسی طور پر بھی ملک وقوم کے مفاد میں نہیں ہے، انتہائی متنازع قانون سازی کرنے والے حکمران ووٹ کو عزت دو کا نعرہ کس منہ سے لگائیں گے، پی ڈی ایم کا ٹولہ جمہوریت کی بالادستی پر ڈھکے چھپے انداز میں سمجھوتہ کر چکا ہے۔
انہوں نے کہا کہ نااہل حکمران عوام کو ریلیف فراہم کرنے کی بجائے غیر جمہوری قانون سازی سے انکی زندگیوں کے گرد سخت شکنجے کس رہے ہیں، جلد بازی میں منظور کیئے گئے بلز کی تمام تر ذمہ داری موجودہ حکمران جماعتوں پر ہے، ان قانون سازیوں کے اثرات ان سب کو بھگتنا پڑیں گے، انتہائی افسوس ناک بات ہے کہ ایک ہی دن میں چوبیس یونیورسٹیوں کی منظوری ہوئی، جن کے مالک بااثر کاروباری افراد، ممبرز پارلیمنٹ اور انکے قریبی رشتے دار ہیں، پیر، میڈیا مالکان اور مدارس والے بھی بہتی گنگا سے ہاتھ دھو رہے ہیں، شعبہ تعلیم کے ماہرین بھی اس حوالے سے حیران ہیں، عالمی رینکنگ میں ہماری یونیورسٹیاں اور معیار تعلیم پہلے ہی نچلی سطح پر ہے، یہی صورتحال رہی تو تعلیم کی بے قدری مزید بڑھ جائے گی، ارکان اسمبلی کی کم تعداد میں موجودگی کے باوجود ان قوانین کی منظوری شرمناک حرکت ہے اور اس ساری بندر بانٹ کو عوام دیکھ رہے ہیں، عوامی حقوق پر ڈاکہ ناقابل قبول ہے۔
وحدت نیوز(قم) سیکرٹری امور خارجہ مجلس وحدت مسلمین پاکستان و سربراہ مجلس علماء امامیہ پاکستان ڈاکٹر سید شفقت حسین شیرازی نے کوئٹہ میں یکے بعد دیگرے شیعہ پولیس ملازمین کے قتل پر تشویش کا اظہار کرتے ہوئے کہا کہ شیعہ پروفیشنلز کا قتل دراصل سیکورٹی اداروں کی نااہلی کا منہ بولتا ثبوت ہے۔ کوئٹہ میں کئی دہائیوں سے شیعہ عام افراد اور بالخصوص شیعہ ملازمین کے قتل عام کا سلسلہ جاری ہے اور ریاست اپنی عوام اور بالخصوص اپنے ملازمین تک کو تحفظ دینے میں ناکام نظر آتی ہے اور قانون نافذ کرنے والے ادارے اپنی آئینی و قانونی ذمہ داریوں کو پورا کرنے میں کوتاہی برتنے کی وجہ سے دہشتگردوں کے سہولت کار بن چکے ہیں۔ علمدار روڈ اور ہزارہ ٹاؤن قبرستان ریاستی غفلت و ناہلی کے غماز ہیں۔ شہید پرور ہزارہ قوم کا جرم فقط اور فقط وطن سے وفاداری ہے۔
یاد رہے کوئٹہ میں چوبیس گھنٹوں کے دوران تین شیعہ پولس اہلکاروں کو ڈیوٹی کے دوران شہید کر دیا گیا ہے۔ انسداد پولیو مہم کے دوران ڈیوٹی پر مامور دو ہزارہ برادری کے پولیس اہلکار سید مہدی اور شوکت حسین شہید ہوئے ہیں جبکہ دوسری کاروائی اسپینی روڈ پر ہوئی جس میں پولیس اہلکار محمد جواد کو فائرنگ کر کے شہید کر دیا گیا۔ ملک میں جاری خود کش دھماکوں کے ساتھ ساتھ شیعہ ٹارگٹ کلنگ کے واقعات انتہائی تشویشناک ہیں۔علاوہ ازیں سیکرٹری امور خارجہ ایم ڈبلیو ایم نے شہداء کے خانوادگان کے ساتھ اظہار تعزیت کرتے ہوئے کہا کہ پوری شیعہ قوم شہداء کے خانواده کے ساتھ کھڑی ہے اور قاتلوں کی فوری گرفتاری کا مطالبہ کرتی ہے۔
وحدت نیوز(وزیر آباد) مجلس وحدت مسلمین کی ایک اور کاوش وزیر آباد جامکے چھٹہ گاوں میں مومنین کرام کےدیرینہ مسائل کو حل کرلیا گیا ہے ۔ جامکے چٹھہ میں میزائل موٹر کی تنصیب سے پانی کی قلت دور ہوگئی مسجد کیلئے اراضی،فری ڈسپنسری اور تجہیز و تکفین کے منصوبہ جات کا آغازدکھی انسانیت کی خدمت ہماری اولین ترجیح ہے ایم ڈیبلیو ایم پنجاب کے سیکرٹری سیاسیات سید حسین زیدی کا اظہار خیال معاشرے کے بے سہارا اور محروم طبقوں کی خدمت کرنا مجلس وحدت مسلمین کی اولین ترجیحات میں سے ایک ہے۔
ان خیالات کا اظہار ایم ڈبلیوایم پنجاب کے سیکرٹری سیاسیات سید حسین زیدی نے ضلع گوجرانوالہ کے یونٹ جامکے چٹھہ سے کارکنا ن سے کیا۔انہوں نے جامکے چٹھہ میں پانی کی قلت دور کرنے کے لئے450 فٹ گہریں کنویں کی کھدائی اور میزائل موٹر کی تنصیب اور تکمیل سے اہلِ علاقہ کو دیگر مسائل حل کروانے کی بھی یقین دہانی کروائی۔
سید حسین زیدی نے کہا کہ کنویں کی کھدائی سے اہلِ علاقہ بلاتفریق مستفید ہوں گے۔انہو ں نے مزید بتایا کہ جامکے چٹھہ میں مرکزی جامع مسجد القائم کی توسیع کے پیش نظر 2 مرلے اراضی خریدی جس پہ اہلِ علاقہ شکرگزار ہیں۔ مسجد کے قریب فری ڈسپنسری کا منصوبہ بھی جلد پایہ تکمیل تک پہنچے گا۔مقامی علاقے وزیر آباد میں فوت شدگا ن کیلئے تجہیز و تکفین کے اموربھی ایم ڈبلیوایم کے صوبائی سیکریٹری سیاسیات اور انکی مخلص مخیرین کی ٹیم کے تحت انجام دئیے جارہے ہیں۔سید حسین زیدی کا مزید کہنا تھا کہ دکھی انسانیت کی خدمت ہماری اولین ترجیح ہے۔ مفلس اور درد مندخاندانوں کے دکھوں پر مرہم کا کام کریں گے۔
وحدت نیوز(کوئٹہ)مجلس وحدت مسلمین کوئٹہ نے ہزارہ قوم سے تعلق رکھنے والے افراد کی ٹارگٹ کلینگ پر تشویش کا اظہار کرتے ہوئے مطالبہ کیا ہے کہ دہشتگردی کے واقعات میں ملوث عناصر کے خلاف جلد از جلد کارروائی کی جائے۔
کوئٹہ سے اپنے جاری کردہ بیان میں مجلس وحدت مسلمین کوئٹہ کے صدر ارباب لیاقت علی ہزارہ نے کہا کہ سکیورٹی فورسز کو لاء اینڈ آرڈر اور کوئٹہ کے حالات پر نظرثانی کی ضرورت ہے۔ دہشتگردانہ واقعات میں ملوث عناصر کو جلد از جلد گرفتار کیا جائے۔
انہوں نے کہا کہ کوئٹہ کے مصروف علاقوں میں دن دھاڑے فائرنگ کرکے بے گناہ افراد کو شہید کرنے والے عناصر کا فرار ہوجانا ایک سوالیہ نشان ہے۔ ہمارے قتل عام میں ملوث عناصر کو ماضی میں بھی گرفتار نہیں کیا گیا۔ حالیہ واقعات اور شہادتوں پر قانون نافذ کرنے والے اداروں کی خاموشی برداشت نہیں کی جائے گی۔
وحدت نیوز(اسلام آباد)وائس چیئرمین مجلس وحدت مسلمین پاکستان علامہ سید احمد اقبال رضوی نے اپنے بیان میں کوئٹہ میں چوبیس گھنٹوں کے دوران تین شیعہ پولیس اہلکاروں کے بہیمانہ قتل کی شدید مذمت کرتے ہوئے قاتلوں کی فوری گرفتاری کا مطالبہ کیا ہے اور شہداء کے لواحقین سے دلی تعزیت اور ہمدردی کا اظہار کیا ہے، مشکل کی اس گھڑی میں ہم متاثرہ خاندانوں کے ساتھ کھڑے ہیں، انسداد پولیو مہم کے دوران ڈیوٹی پر مامور دو ہزارہ برادری کے پولیس اہلکار سید مہدی اور شوکت حسین شہید ہوئے ہیں اور دوسری کاروائی اسپینی روڈ پر ہوئی جس میں پولیس اہلکار محمد جواد کو فائرنگ کرکے شہید کیا گیا ہے، خود کش دھماکوں کے ساتھ ہی ٹارگٹ کلنگ کا سلسلہ شروع ہونا انتہائی تشویشناک ہے۔
انہوں نے کہا ہے کہ پارہ چنار کے اساتذہ اور ہزارہ قبیلے کے پولیس اہلکاروں کو سکیورٹی خدشات کے باوجود تھریٹ والے علاقوں میں بھیجنا کئی سوالات کو جنم دیتا ہے، حکومت وقت بلوچستان اور خیبرپختونخواہ میں بڑھتے ہوئے دہشت گردی کے واقعات پر قابو پانے میں مکمل طور پر ناکام ہو چکی ہے، حکومتی ٹولہ اپنے مفادات سمیٹنے میں مصروف ہے، ملک دشمن عناصر کی بزدلانہ کارروائیوں کو روکنے کے لیے ٹھوس اور نتیجہ خیز کاروائی ہی اس ناسور سے نجات کا واحد حل ہے، دونوں صوبوں میں دہشت گردی کے واقعات روز بروز بڑھ رہے ہیں، دہشتگردوں کا انکے سرپرستوں اور ٹھکانوں سمیت خاتمہ ملکی سالمیت کے لیے ناگزیر ہے، جن کے ساتھ آہنی ہاتھوں سے نمٹا جائے۔
وحدت نیوز(اسلام آباد) چیئرمین سٹینڈنگ کمیٹی گلگت بلتستان کونسل جناب محمّد ایوب شاہ کی زیر صدارت کونسل سیکریٹریٹ اسلام آباد میں ایک اہم اجلاس منعقد ہوا جس میں رکن جی بی کونسل و پولیٹیکل سیکریٹری مجلس وحدت مسلمین گلگت بلتستان شیخ احمد علی نوری اور دیگر معزز ممبران کے علاوہ کونسل کے تمام ذمہ داروں نے شرکت کی میٹنگ کا آغاز تلاوت پاک سے ہوئی۔اجلاس میں باجوڑ دھماکہ کی شدید الفاظ میں مذمت کی اور شہداءکے لیے فاتحہ خوانی کی۔
اجلاس میں گزشتہ میٹنگ کے فیصلہ جات کا جائزہ لیا حالیہ سیلاب کے متاثرین کی مدد کے لیے فوری فنڈ کا اجرا کرنے کے بعد علاقے کی تعمیر و ترقی کے لیے رول ادا کرنے کا عزم کا ارادہ کیا کیوں کہ اس وقت سیلاب متاثرین انتہائی مشکلات سے دو چار ہیں ۔سلاب زدہ علاقوں کے لیے جی ۔بی کونسل سے اسپیشل پیکج کے تحت فنڈ مختص کر کے ایمرجنسی بنیادوں پر کام کرنے پر زور دیا ۔ نیز ممبر ڈویلپمنٹ فنڈ کو جاری کرنے کے لیے فوری سمری بنانے کا فیصلہ ہوا تاکہ گلگت بلتستان کی تعمیر و ترقی کے لیے کام کیا جا سکے ۔
گلگت بلتستان ایک حساس علاقہ ہے وفاق کے عدم تعاون کی وجہ سے لوگوں کے احساس محرومی میں اضافہ ہوتا جا رہا ہے ۔ لہذا وفاق حکومت گلگت بلتستان کے عوام کی تعمیر و ترقی کے لیے بر پور کردار ادا کریں ۔اور گلگت بلتستان کونسل کو ہر وقت نظر انداز کرنے کا سلسلہ ختم کیا جائے ۔۔گلگت بلتستان کونسل کی بلڈنگ بنانے کے لیے نقشہ اور اجازت نامہ کو بھی لینے کے لیے CDA کے ساتھ فوری رابطہ کرنے کا حکم دے دیا ۔
وحدت نیوز(لاہور)کربلا کے مظلوم پیاسوں کی یاد میں نو اور دس محرم الحرام کو مجلس وحدت مسلمین ضلع لاہور کے شعبہ ویلفیئر کی جانب شاہ عالم چوک لاہور میں دوروزہ سبیل کا اہتمام ۔ جس سے ہزاروں عزاداروں کے علاوہ عام لوگ بھی مستفید ہوتے رہے ۔ اگرچہ محرم الحرام کے پہلے عشرہ میں مجلس وحدت مسلمین ضلع لاہور کے زیر اہتمام پورے لاہور کے 10 ٹاونز میں مجالس عزاء کا سلسلہ جاری رہا ۔اس کے علاوہ ماتم داری کے جلوسوں میں بھی پیش پیش رہے ۔ شاہ عالم چوک لاہور کا کاروباری لحاظ سے مصروف ترین چوک شمار ہے ۔
برادر رانا کاظم ضلعی نائب صدر مجلس وحدت مسلمین ضلع لاہور کے تعاون سے برادر نقی حیدر ضلعی سیکریٹری ویلفیئر(فلاح وبہبود) ضلع لاہور نے دوروزہ سبیل امام حسین (ع) کے نام اہتمام کر کے انسانیت کی خدمت کی ۔ برادر نقی حیدر نے کہا کہ اربعین حسینی پر اور اگلے سال محرم الحرام میں بھی ان شاءاللہ بڑے پیمانے پر سبیل کا انتظام کیا جائے گا ۔
