وحدت نیوز(لاہور)علامہ سید حسن رضا ہمدانی سنیئرنائب صدر مجلس وحدت مسلمین پاکستان صوبہ پنجاب و معروف خطیب نے علامہ سید علی اکبر کاظمی صوبائی صدر مجلس وحدت مسلمین پاکستان صوبہ پنجاب کے اعزاز میں اپنے گھر واقع رانا ٹائون لاہور میں ایک ضیافت(ناشتے) کا اہتمام کیا ۔سابق معاون خصوصی پولیٹیکل افیئرز وزیر اعلی پنجاب ومرکزی سیکرٹری سیاسیات برادر اسد عباس اور برادر سید حسن رضا کاظمی جنرل سیکرٹری مجلس وحدت مسلمین پاکستان صوبہ پنجاب ،برادر ظہیر کربلائی صوبائی آفس سیکرٹری نے بھی اس ضیافت میں شرکت ۔

تنظیمی موضوع پر گفتگو کی گئی ۔ ضیافت کے آخر میں علامہ سید علی اکبر کاظمی نےجناب حسن رضا ہمدانی کا شکریہ ادا کیا اور انہیں 13 رجب المرجب کی مناسبت سے مبارک باد پیش کی ۔ ضیافت کے آخر میں ایک یاد گار گروپ فوٹو سیشن ہوا ۔

وحدت نیوز(اسلام آباد)مجلس وحدت مسلمین پاکستان کے چیئرمین علامہ راجا ناصر عباس جعفری نے 13 رجب المرجب ولادت باسعادت امیر المومنین حضرت امام علی ابنِ ابی طالب علیہ السلام کے پر مسرت موقع پر تمام عالم اسلام کو دلی مبارکباد پیش کرتے ہوئے کہا ہے کہ یہ دن ہمارے لیئے سب سے بڑی عید ہے اور اس کا نفع دنیا و آخرت کے لیے ہے، تاقیامت آپ کی پاکیزہ ہستی کے فیوض وبرکات جاری رہیں گے۔ ہماری اس سے بڑھ کر اور کیا خوش قسمتی و خوش بختی ہو گی کہ بعد از نبی اکرم صلی اللہ علیہ وآلہ وسلم ہم نے اپنی رہنمائی کے لیے آپ جیسی عظیم المرتبت ہستی کا دامن پکڑا۔ یہ دن تمام عدالت خواہوں اور حریت پسندوں کے لیے مبارک کا دن ہے۔

انہوں نے کہا کہ اگر فضیلت کا معیار علم قرار پائے گا تو آپ علیہ السلام رسول خدا صلی اللہ علیہ وآلہ وسلم کے شہر علم کا دروازہ ہیں اور ایسے خطیب ہیں کہ جو کہہ رہے ہیں مجھ سے جو پوچھنا چاہتے ہو پوچھ لو میں زمین سے زیادہ آسمانوں کے بارے میں زیادہ جانتا ہوں۔اگر بندگی خدا ذرالجلال معیار فضیلت ہے تو آپ جیسا عابد خدا کوئی نہیں، تمام عاشق و عارف خدا اپنے سلسلوں کو آپ کی ذاتِ عظیم المرتبت سے جوڑنے میں فخر محسوس کرتے ہیں،اگر شجاعت و جواں مردی معیار فضیلت ہے تو آپ جیسا شجاع کوئی نہیں یعنی شیر خدا لقب پایا۔ ایثار و قربانی میں بھی سب کچھ اللہ کی راہ میں قربان کر دیا۔ فضیلت کے جتنے بھی معیارات ہیں ان سب میں آپ کی ذاتِ اقدس کامل و اکمل ہے۔

انہوں نے کہا کہ آپ کی پاکیزہ سیرت و کردار پر عمل پیرا ہو کر پوری انسانیت کامیاب و کامران ہو سکتی ہے، عادل ترین ہستی جنہیں مغربی اسکالر کے مطابق کہ علی ابن ابی طالب اس قدر عادل تھے کہ جنہیں شدت عدالت کی وجہ سے قتل کر دیا گیا، تمام صاحبان عدالت کے لیے عدل علی ع مشعلِ راہ ہے،آپ کے نزدیک حصول اقتدار کا مقصد صرف اور صرف حق کا قیام اور باطل کے غرور کو خاک میں ملانا تھا، آپ الہیٰ حاکم کا اعلیٰ ترین نمونہ تھے جو اپنی رعایا کے بے کس افراد کے لیے رات کی تاریکی میں پیٹھ پر اناج اٹھا کر انکی دہلیز پر پہنچاتے ہیں۔ آج بھی انسانیت کی تمام تر مشکلات کا حل آپ کی سیرت و کردار میں پنہان ہے۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجا ناصر عباس جعفری نے آج یوم یکجہتی کشمیر کی مناسبت سے اپنے پیغام میں کہا ہے کہ 5 فروری کے دن ہم اس عزم کا اعادہ کرتے ہیں کہ اپنی حمایت دل وجان سے جاری و ساری رکھیں گے، کشمیر ہماری شہ رگ ہے جسے ہر صورت بھارتی شکنجے سے حاصل کر کے دم لیں گے اور اپنی اصولی حمایت سے ہرگز پیچھے نہیں ہٹیں گے، کشمیری عوام نسل درنسل بھارتی جبرواستبداد برداشت کر رہے ہیں لیکن وہ اپنے حق خودارادیت کے حصول کے مطالبے سے دستبردار نہیں ہوئے۔

انہوں نے کہا کہ پون صدی گزرنے کے باوجود بھی اقوام متحدہ کشمیریوں کو اپنی قراردادوں کے مطابق حق خودارادیت دلوانے میں ناکام ہے، دوغلے معیار کی وجہ سے یو این اپنی غیر جانبدارانہ حیثیت کھو چکا ہے۔ کشمیر کا مسئلہ تقسیم ہند کا نامکمل ایجنڈا ہے اسے مکمل کیے بغیر جنوبی ایشیاء میں امن کا قیام ناممکن ہے، موجودہ حکومت کشمیر کے ایشو کو اولین ترجیح دیتے ہوئے کشمیری عوام کے بنیادی حقوق کو صلب کیے جانے سے بھارت کو روکے اور ان سنگین جرائم کو عالمی برادری اور فورمز پر اْجاگر کرنے میں کوئی کسر اٹھا نہ رکھی جائے کہ جس سے مودی سرکار کا بھیانک چہرہ بےنقاب ہو۔

انہوں نے کہا کہ ہم کشمیر و فلسطین سمیت دنیا کے ہر خطے میں رہنے والے مظلومین کی حمایت جاری رکھیں گے اور ظالم و جابر قوتوں کے خلاف آواز بلند کرتے رہیں گے، بھارتی فورسز چاہے جس قدر کشمیر کے بہادر اور پرعزم عوام پر اپنے ظالمانہ ہتھکنڈے استعمال کر لے وہ اپنے مذموم مقاصد میں کامیاب نہیں ہو سکتیں۔پوری پاکستانی قوم کے دل اپنے کشمیری بھائیوں کے ساتھ دھڑکتے ہیں لہذا یہ جدوجہد آزادی کا سفر کامیابی کے حصول تک جاری رہے گا۔