وحدت نیوز(خیرپور)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے ضلع خیرپور کی تحصیل کوٹ ڈیجی پہنچ کر سیلاب متاثرین کی خیمہ بستی کا دورہ کیا اور سیلابی پانی کی تباہ کاریوں کا جائزہ لیا۔ اس موقع پر ایم ڈبلیو ایم تحصیل کوٹ ڈیجی کے آرگنائزر سرفراز علی ملاح، ایم ڈبلیو ایم کے رابطہ سیکرٹری مہتاب حسین ذاکر حسین، محمد باقر انیل حسین و دیگر تنظیمی کارکن ان کے ہمراہ تھے۔ اس موقع پر متاثرین سیلاب سے اظہار یکجہتی کرتے ہوئے ایک سو متاثر خاندانوں میں راشن اور امدادی سامان تقسیم کیا گیا۔

اس موقع پر گفتگو کرتے ہوئے علامہ مقصود علی ڈومکی نے کہا کہ متاثرین سیلاب کی مشکلات ابھی کم نہیں ہوئیں کیونکہ سردی کا موسم شروع ہوتے ہی گرے ہوئے مکانات میں رہنے والوں کو خیمے اور کمبل کی ضرورت ہے۔ لوگوں کی زراعت تباہ ہونے کے سبب انہیں آٹے اور راشن کی اشد ضرورت ہے۔ انہوں نے کہا کہ حکومت بتائے کہ عوام کو امداد کیوں نہیں ملی؟ اور آخر بلند و بالا دعووں کے باوجود حکومت متاثرین سیلاب کی مدد کرنے میں کیوں ناکام رہی؟ انہوں نے کہا کہ ضلع خیرپور کا تحصیل ہیڈکوارٹر کوٹ ڈیجی سیلاب کے باعث تباہی کا منظر پیش کر رہا ہے مگر سندھ حکومت کی جانب سے اسے مکمل طور پر نظر انداز کیا گیا۔ حکومت اور فلاحی ادارے متاثرین سیلاب کو گندم کے بیج اور کھاد کی فراہمی میں مدد کریں۔

وحدت نیوز(لاہور) امامیہ اسٹوڈنٹس آرگنائزیشن پاکستان کے سالانہ مرکزی کنونشن کے دوران تعمیر وطن کانفرنس سے خطاب کرتے ہوئے مجلس وحدت مسلمین کے سربراہ علامہ راجہ ناصر عباس جعفری نے کہا کہ یہ پہلا موقع ہے کہ پوری قوم امریکہ مخالف اور آزاد پاکستان بیانیہ کے تحت متحد ہوچکی ہے، ملت تشیع پاکستان کو اپنا کلیدی کردار ادا کرنا ہوگا۔

انہوں نے کہاکہ مادر وطن استعماری قوتوں کے ناپاک شکنجے میں ہو اور ہم اس وطن کے باوفا بیٹے الگ تھلگ اور لاتعلق ہوکر بیٹھے رہیں یہ ہمارے شہید قائد علامہ عارف حسین الحسینی ؒ کی تربیت نہیں ہے، پاکستان تاریخ کے نازک ترین دوراہے پر کھڑا ہے۔ یہی وقت ہے کہ جب ہمیں اپنی درست سمت کا تعین کرنا ہے۔

ملک کے 22 کروڑ عوام کی اکثریت نے بیرونی غلامی کے طوق کو اپنے پیروں سے اتار پھینکنے کا تہیہ کرلیا ہے، شیعیان حیدر کرارؑ اس ملک کا اہم حصہ ہیں جن کی تاریخ قربانیوں سے لبریز ہے، آئی ایس او نے پاکستان میں نا صرف نوجوانوں میں بلکہ قوم کے ہرفرد میں انقلاب اور وطن سے محبت کا جذبہ بیدار کیا ، شہداء کے مقدس لہو کی پاسبان تنظیم نے ہر دور میں سختیوں اور مشکلات کے باوجود وطن سے محبت کا راستہ ترک نہیں کیا ۔امید ہے کہ یہ کاروان اسی طرح تاظہور امام حجت ؑ رواں دواں رہے گا۔

وحدت نیوز(جعفرآباد)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے ضلع جعفر آباد کے سیلاب متاثرہ گاؤں اللہ آباد کا دورہ کیا اور متاثرین سیلاب میں راشن اور کمبل تقسیم کئے۔ اس موقع پر انہوں نے خواتین کی کشیدہ کاری اور سلائی کڑھائی کا کام کرنے والوں کی تعریف کی، جو سیلاب جیسی مصیبت کے دوران بھی سلائی کڑھائی کے کام میں مصروف رہیں۔

اس موقع پر گفتگو کرتے ہوئے علامہ مقصود علی ڈومکی نے کہا کہ سیلاب کی مشکلات کا ہمارے با ہمت لوگوں نے خندہ پیشانی سے مقابلہ کیا اور ہماری خواتین نے گھر کے کام کاج کے ساتھ ساتھ سلائی کڑھائی پر توجہ دی جو کہ لائق صد تحسین عمل ہے۔ انہوں نے کہا کہ سیلاب کئی دردناک کہانیاں چھوڑ کر گیا۔ متاثرین سیلاب نے عزم و ہمت سے اس دردناک صورت حال کا مقابلہ کیا اور اب تعمیر نو کا آغاز کیا ہے۔ حکومت اور فلاحی ادارے متاثرین سیلاب کی بحالی کے عمل میں ان کا ساتھ دیں۔ انہوں نے کہا کہ حکومت سیلاب کی تباہ کاریوں کا ازالہ کرنے کے ساتھ ساتھ اس کے علل و اسباب کا بھی جائزہ لے کہ آخر اتنی بڑی تباہی کا ذمہ دار کون ہے؟

وحدت نیوز (اسلام آباد) چیئرمین پاکستان تحریک انصاف و سابق وزیر اعظم پاکستان عمران خان کا چیئرمین مجلس وحدت مسلمین پاکستان علامہ راجہ ناصرعباس جعفری سے ٹیلیفونک رابطہ، عمران خان نے علامہ راجہ ناصرعباس جعفری کی خیریت دریافت کی ، چیئرمین پی ٹی آئی کی جانب سے علامہ راجہ ناصرعباس جعفری کوحقیقی آزادی لانگ مارچ میں شرکت کی دعوت۔

تفصیلات کے مطابق چیئرمین پی ٹی آئی عمران خان نے کچھ دیر قبل چیئرمین ایم ڈبلیوایم علامہ راجہ ناصرعباس جعفری کو ٹیلیفون کرکے ان کی احوال پرسی کی اور ان کی جلد صحت یابی کی دعا کے ساتھ انہیں داخلی خودمختاری ، آزاد خارجہ پالیسی ، یکساں نظام انصاف، اور استعماری قوتوں سے حقیقی آزادی کیلئے لاہور سے اسلام آباد تک نکالے گئے لانگ مارچ میں شرکت کی دعوت بھی دی ۔

ذرائع کے مطابق علامہ راجہ ناصرعباس جعفری نے احوال پرسی پر عمران خان کا شکریہ ادا کیا اور کہا کہ وطن کے استحکام اور استقلال کی خاطر بیرونی طاقتوں کی غلامی سے نجات کا حصول ہمارے شہید قائد علامہ عارف حسین الحسینیؒ کی کی دیرینہ آرزو تھی ۔ ہم اپنے قائد کے افکار ونظریات کی پیروی کرتے ہوئے وطن عزیز میں بیرونی مداخلت اور عدم استحکام کا راستہ روکنے کی ہر کوشش کا ساتھ دیں گے ۔

 علامہ راجہ ناصرعباس جعفری نے عمران خان کی جانب سے حقیقی آزادی لانگ مارچ میں شرکت کی دعوت کو قبول کرلیا ہے، انہوں نے کہا کہ ہم آزاد خارجہ پالیسی ، داخلی خودمختاری اور ملک دشمن استعماری قوتوں کی غلامی کے خلاف جدوجہد میں پاکستان تحریک انصاف کے ساتھ کھڑے ہیں ، ہم حقیقی آزادی مارچ کی مکمل حمایت کرتے ہیں اور انشاءاللہ بھرپور شرکت کریں گے ۔

واضح رہے کہ علامہ راجہ ناصرعباس جعفری کو گرجانے کے سبب پاؤں میں چوٹ لگنے کی وجہ سے زخم آئے تھے آپ گذشتہ کئی روز سے علیل ہیں اور گھر ہی میں آرام فرما ہیں۔ عمران خان نے علامہ راجہ ناصرعباس جعفری کی جانب سے لانگ مارچ میں شرکت کی یقین دہانی پر ان کا شکریہ ادا کیا ہے۔