وحدت نیوز (گلگت) مجلس وحدت مسلمین گلگت بلتستان کے صدر سید علی رضوی نے کہا ہے کہ وحدت مسلمین اپنے قیام کے بعد سے بلا تفریق مظلوم طبقات کی نمائندگی کرتی رہی ہے۔ ہم اپنے اس نصب العین سے ایک انچ بھی پیچھے نہیں ہٹیں گے۔ دنیا کے جس کونے میں بھی ظلم ہوگا مجلس وحدت مسلمین اپنا کردار ادا کرتی رہے گی۔ گلگت بلتستان کے عوام کے بنیادی حقوق ملنے تک ہماری جدوجہد جاری رہے گی۔ ان خیالات کا اظہار مجلس وحدت مسلمین گلگت بلتستان کے صدر نے وحدت ہاؤس گلگت میں صوبائی شوریٰ کے اجلاس کے دوران کیا۔
 
 انہوں نے کہا کہ مجلس وحد ت مسلمین فقط ایک سیاسی جماعت نہیں بلکہ اس جماعت کا بنیادی ہدف محکوموں اور مظلوموں کو ان کے بنیادی حقوق دلانا ہے، جی بی میں آج مغربی افکار کی یلغار ہے اور پرنٹ، الیکٹرانک اور سوشل میڈیا (سوفٹ وار) کے ذریعے استعماری طاقتیں دنیا پر حکمرانی کے خواب دیکھ رہی ہیں۔ ہمارے جوان مکتب اہل بیت کے پروردہ ہیں اور استعماری سازشوں کو بخوبی جانتے ہیں اور ان شاءاللہ ہمارے جوان پوری طاقت سے ان کے عزائم خاک میں ملا دیں گے۔ انہوں نے کہا کہ گلگت بلتستان کے عوام غیور ہیں اور اپنے حقوق حاصل کرنے کیلئے پر عزم ہیں۔ حکمرانوں کو چاہئے کہ اس خطے کی حساسیت کے پیش نظر عوامی حقوق سلب کرنے سے گریز کریں اور کئی دہائیوں پر محیط محرومیوں کا ازالہ کریں۔
 
انہوں نے کہا کہ جی بی کے تعلیمی اداروں میں مداخلت برداشت نہیں کی جائیگی اور ہماری نئی نسل جو اعلیٰ تعلیم سے آراستہ ہیں ان کو تعلیمی اداروں میں ان کی صلاحیت کے مطابق مواقع فراہم کیا جائے۔ انہوں نے مزید کہا کہ تعلیمی اداروں میں بے راہ روی کو روکا جائے اور نئی نسل کی اپنے اسلاف کے افکار و نظریات کے مطابق تربیت کی جائے تاکہ یہ نوجوان نسل معاشرے کی ترقی میں مثبت کردار ادا کر سکیں۔
 
مجلس وحدت مسلمین گلگت بلتستان کے صوبائی شوریٰ کے اجلاس میں شیخ نیئر عباس مصطفوی رکن جی بی کونسل شیخ احمد نوری، معاون خصوصی وزیر اعلیٰ گلگت بلتستان محمد الیاس صدیقی، رکن جی بی اسمبلی شیخ اکبر علی رجائی کے علاوہ گلگت بلتستان کے جید علمائے کرام اور صوبائی و ضلعی عہدیدارشریک رہے۔ اجلاس میں مجلس وحدت مسلمین گلگت بلتستان کے صوبائی عہدیداروں کا چناؤ بھی عمل میں لایا گیا اور شوریٰ کے اراکین نے اکثریت رائے سے صوبائی کابینہ کے نامزد اراکین کی توثیق کر دی جن سے صوبائی صدرعلامہ آغا سید علی رضوی نے حلف لیا۔

وحدت نیوز(خوشاب ) مجلس وحدت مسلمین ضلع خوشاب کی شوریٰ کااجلاس منعقد ہوا، اجلاس میں ایم ڈبلیوایم کے مرکزی معاون سیکریٹری امور تنظیم سازی آصف رضا ایڈوکیٹ اور مرکزی معاون سیکریٹری امور تربیت مولانا ظہیرالحسن کربلائی نے خصوصی شرکت کی ۔

اراکین ضلعی شوریٰ ایم ڈبلیوایم خوشاب نےکثرت رائے سے مولانا سید عمار یاسر صاحب کو ضلع خوشاب کا ضلعی صدر منتخب کرلیا۔ نومنتخب ضلعی صدر سے آصف رضا ایڈوکیٹ نے حلف لیا۔

وحدت نیوز(جیکب آباد)مدرسہ خاتم النبیین صلی اللہ علیہ وآلہ وسلم جیکب آباد میں مقامی مدرسہ کے طلباء اور مومنین کے لئے درسی نشست منعقد ہوئی۔ جس کے مہمان خاص جامعہ بعثت کے علامہ سید مہدی کاظمی اور ایم ڈبلیو ایم بلوچستان کے صوبائی صدر علامہ سید ظفر عباس شمسی بھی موجود تھے۔ اس موقع پر مدرسہ المصطفیٰ خاتم النبیین کے پرنسپل اور مرکزی رہنما ایم ڈبلیوایم علامہ مقصود علی ڈومکی نے ابتدائی گفتگو کرتے ہوئے معزز مہمانوں کو خوش آمدید کہا۔ انہوں نے کہا کہ تعلیم اور تربیت کے بغیر معاشرے کی اصلاح ممکن نہیں۔ اس موقع پر علامہ سید مہدی کاظمی نے بھی گفتگو کی۔

انہوں نے کہا کہ اللہ تعالیٰ اپنے بندوں پر مہربان ہے۔ اس کی رحمت واسعہ کے زیادہ مستحق وہی بنتے ہیں جن کی زندگی اطاعت الٰہی میں گزرتی ہے۔ ہمیں خدا کا اطاعت گزار بندہ بننے کی کوشش کرنی چاہیئے۔ مجلس وحدت مسلمین کے علامہ سید ظفر عباس شمسی نے اس موقع پر گفتگو کرتے ہوئے کہا کہ مدارس دینیہ کو عصر حاضر کے تقاضوں سے ہم آہنگ ہونا چاہیے تاکہ وہ معاشرے کی ضروریات کا درست ادراک کرتے ہوئے معاشرے کی اصلاح اور معاشرتی رہنمائی کا فریضہ انجام دے سکے۔ اس موقع پر علامہ سیف علی ڈومکی، مولانا ارشاد علی سولنگی، مولانا منور علی سولنگی اور دیگر بھی موجود تھے۔

وحدت نیوز (کراچی) مجلس وحدت مسلمین صوبہ سندھ کے صدر علامہ باقر عباس زیدی نے کہا ہے کہ شہر کی ترقی و عوامی سہولیات کی فراہمی وفاقی و صوبائی حکومتوں کی ذمہ داری ہے۔۔شہر قائد بنیادی سہولیات سے محروم اشیاء خوردونوش کی فراہمی میں کمی ، پانی،گیس، بجلی سمیت دیگر بحرانوں کا شکار ہے۔دہشتگردی اور کرپشن نے ملکی جڑوں کو کھوکھلا کر دیا ہے ۔ ملک و قوم کو نقصان پہچانے والوں کو قانون کی گرفت میں لیا جائے شہر میں پانی و بجلی بحران نے عوام کا جینا دوبھر کر دیا ہے پڑھی لکھی قوم کو پینے کا صاف بھی میّسر نہیں۔ سندھ حکومت ٹینکرز مافیا کے ہاتھوں یرغمالی کا ڈرامہ بھی بند کر دے عوام کو بوندھ بوندھ پانی سے محروم کرنے والے بھی اسی حکومت کے وزیر ہیں۔

انہوں نے کہا کہ شہر کے خودساختہ بحرانوں میں ملوث مافیاز کا خاتمہ کیا جائے۔شہریوں کے مسائل صرف تجاوزات کےخاتمہ سے حل نہیں ہوں گے بلکہ مہنگائی،بے روزگاری، پانی، گیس،بجلی سمیت بنیادی سہولیات کی فراہمی پر حکومت کو توجہ دینی ہو گی۔صوبہ سندھ کے دیگر نامکمل منصوبوں کی طرح کے فور منصوبہ تاحال تاخیر کا شکارہے۔شہر بھر میں ٹینکرز مافیا کا راج ہے،پانی کے مصنوعی بحران کا فائدہ کروڑوں روپے روزانہ کی بنیاد پر شہر میں ٹیکرز مافیا اوٹھا رہی ہے اور اسےکوئی روکنے والا نہیں سندھ حکومت نے شہر کے حقوق پر ڈاکہ ڈالا ہے دیگر صوبوں  اور شہروں کی طرح کراچی کی عوام کو بھی ان کا حق دیا جائے۔

انہوں نے کہا کہ شہر کی ترقی و فلاح کیلئے متحد ہو کر مضبوط سسٹم بنانے کی ضرورت ہے حکومت محدود وسائل میں بھی مختلف ریلیف پروگراموں کے ذریعہ ترقی و خوشحالی کے بہترین مواقع میسر کر سکتی ہے۔انہوں نے وفاقی و صوبائی حکومت سے مطالبہ کیا کہ صوبہ اور بلخصوص شہر قائد میں شہر یوں کیلئے  اشیاء خوردونوش، پانی،گیس، بجلی سمیت دیگر بنیادی سہولیات میں ریلیف پیکیجز کے اعلانات کئے جائیں کراچی شہر کی ماسٹر پلان کے تحت تزئین و آرائش اور اکنامک کوریڈور پر مکمل توجہ دے کر شہریوں کو سہولیات  فراہم کی جائیں۔