The Latest
وحدت نیوز(گلگت) مجلس وحدت مسلمین کے صوبائی رہنما اوروزیر زراعت گلگت بلتستان محمد کاظم میثم نے وزیر سیاحت راجہ ناصر عبداللہ کے ہمراہ وزیر صحت گلگت بلتستان حاجی گلبر خان سے ملاقات کی۔ ملاقات میں گلگت بلتستان میں صحت کے ایشوز اور مختلف امور پر تبادلہ خیال ہوا۔
اس موقع پر آر ایچ کیو سکردو اور بے نظیر ہسپتال گمبہ سکردو اور دیگر ہسپتالوں کے ایشیوز پر بحث ہوئی۔ وزیر صحت سے حلقہ دو سکردو میں جاری سکیموں بلخصوص ٹین بیڈ ہسپتال بشو اور دیگر بی ایچ یوز کو مزید فعال کرنے نیز کچورا میں دس بیڈ ہسپتال کے قیام کے حوالے سے گفت و شنید ہوئی۔
وزیر صحت گلگت بلتستان نے کہا کہ پورے خطے میں ڈاکٹرز کی کمی کو پورا کرنے سہولتیں فراہم کرنے کے حوالے سے تاریخی اقدامات اٹھائے گئے ہیں اور مزید بہتری آئے گی۔اسکے علاوہ روندو حلقہ دو سکردو سمیت بلتستان کے تمام پسماندہ علاقوں میں طبی سہولت بلخصوص روندو زلزلہ زدگان کے لیے طبی سہولیات پر بھی گفتگو ہوئی۔ روندو تیس بیڈ ہسپتال کو اپگریڈ کرکے پچاس بیڈ کرنے کے حوالے سے بھی ضروری اقدامات کی یقین دہانی کی۔
وحدت نیوز(سکھر) مجلس وحدت مسلمین ضلع سکھر کے سیکریٹری جنرل چوہدری اظہر حسن نے کہا ہے کہ کل 27 رمضان المبارک جمعتہ الوداع کو دنیا بھر کی طرح پاکستان کے شہر سکھر میں بھی عالمی یوم القدس کی مناسبت سے ایم ڈبلیو ایم کے تحت عالمی یوم القدس ریلی نکالی جائے گی۔
سکھر پریس کلب میں صحافیوں سے گفتگو کرتے ہوئے ان کا کہنا تھا کہ موجودہ عالمی حالات میں عالمی یوم القدس کی اہمیت اور بھی بڑھ جاتی ہے جب متعدد عرب ممالک اسرائیل کے ساتھ تعلقات استوار کرکے فلسطین اور کشمیر کے مسئلے کو نارمل کرنے کی کوشش کررہے ہیں، جس کی ہم شدید مذمت کرتے ہیں۔
چوہدری اظہر کا کہنا تھا کہ امریکا اسرائیل کی سازشیں اسلامی ممالک میں کھل کر سامنے آچکی ہے، ملت اسلامیہ عرب ممالک کے اسرائیل کے ساتھ تعلقات کو ہرگز قبول نہیں کرتی، امام خمینیؒ نے 40 سال قبل ان شیاطین کیخلاف نعرہ لگایا تھا جس نے آج پوری دنیا کو بیدار کردیا ہے۔
وحدت نیوز(لاہور)مجلس وحدت مسلمین پنجاب سیکرٹریٹ میں پریس کانفرنس سے خطاب کرتے ہوئے ممبر متحدہ علماء بورڈ، ڈپٹی سیکرٹری جنرل مجلس وحدت مسلمین پنجاب علامہ سید حسن رضا ہمدانی نے کہا ہے کہ 27 رمضان المبارک جمعہ کے روز اسرائیلی جارحیت کیخلاف دنیا بھر میں یوم القدس منایا جائے گا اور فلسطین ،کشمیر و یمن کے مظلومین سے اظہار یکجہتی کیلئے بھرپور انداز میں ریلیاں نکالی جائیں گی۔ لاہور کی مرکزی القدس ریلی مسجد صاحب الزمان حیدر روڈ اسلام پورہ سے پنجاب اسمبلی حال تک نکالی جائے گی۔ ریلی کی قیادت مرکزی ڈپٹی سیکرٹری جنرل مجلس وحدت مسلمین پاکستان علامہ احمد اقبال رضوی، صدر امامیہ سٹوڈنٹس آرگنائزیشن پاکستان لاہور ڈویژن حیدر ثقفی و دیگر قائدین کریں گے۔ انہوں نے کہا کہ فلسطین کے مظلومین کی حمایت میں علامہ اقبال اور قائد اعظم کے نظریات ہمارے لیے بہترین لائحہ عمل ہیں، القدس مسلکی مسئلہ نہیں بلکہ امت مسلمہ کا باہمی مسئلہ ہے، کشمیر و فلسطین و یمن میں انسانی حقوق کی پامالی کے بدترین واقعات رقم کئے جا رہے ہیں، جن کیخلاف اقوام عالم کو انسانی اور اخلاقی بنیادوں پر آواز بلند کرنی چاہئے۔
انہوں نے کہا کہ ظالموں کی مخالفت اور مظلوموں کی حمایت ایک شرعی تقاضا ہے۔امریکہ، بھارت اور اسرائیل دور عصر کے سب سے بڑے ظالم اور غاصب ہیں۔ ان کے خلاف ملت تشیع بھرپور انداز میں احتجاج جاری رکھے گی۔ انہوں نے کہا کہ القدس پر اسرائیل کے غاصبانہ تسلط کے خاتمے کا وقت بہت قریب ہے۔ القدس کی آزادی کو اب دنیا کی کوئی طاقت نہیں روک سکتی۔ فلسطین کی وہ قوم جو کل تک اسرائیلی ٹینکوں کا مقابلہ پتھروں سے کرتی تھی آج جدید ٹیکنالوجی سے لیس ہے۔ عوامی مزاحمت نے اسرائیل کو عملی اور فکری طور پر شکست فاش سے دوچار کیا ہے۔امریکہ کے کندھے پر سوار ہو کر اسرائیل زیادہ دیر تک اپنی بقاء کی جنگ نہیں لڑ سکے گا۔ فلسطین کی اس ترقی نے اسرائیل اور اس کے حواریوں کو خوفزدہ کر رکھا ہے۔ اپنے وسعت پسندانہ عزائم کی تکمیل کیلئے دیکھے جانیوالے گریٹر اسرائیل کے خواب آج چکنا چور ہو چکے ہیں اور صیہونی اپنے غاصب حصے پر قبضہ برقرار رکھنے کیلئے بوکھلاہٹ میں ہاتھ پاوں مار رہے ہیں۔ اسرائیل کی اس ناکامی کا سارا کریڈٹ امام خمینی کو جاتا ہے جنہوں نے انقلاب ایران کے بعد القدس کے مسئلے کو زندہ رکھنے کیلئے بھرپور آواز بلند کی۔
انہوں نے کہا کہ انقلاب ایران کے بعد امام خمینی نے جمعة الوداع کے موقع پر پوری دنیا کے اندر یوم القدس منانے کا اعلان اس وقت کیا جب عالمی قوتیں اسرائیل کو ایک اٹل حقیقت منوانے پر تلی ہوئی تھیں۔ انہوں نے کہا وہ عالمی استکباری قوتیں جو فلسطینیوں سے ان کا آبائی علاقہ چھیننا چاہتی ہیں، آج ہمارے وطن عزیز کی سلامتی و استحکام کو بھی تباہ کرنے پر تلی ہوئی ہیں۔ امریکہ پاکستان کا بدترین دشمن ہے اور اس کی سالمیت کو نقصان پہنچانے کیلئے ایڑی چوٹی کا زور لگا رہا ہے۔ دہشتگردوں کے ذریعے وطن عزیز کو عدم استحکام کا شکار کرنے کے ایجنڈے پر بڑی تیزی سے کام ہو رہا ہے، دہشتگردی کیخلاف جنگ میں اس قوم نے پہلے ہی بہت نقصان اٹھایا ہے۔ ہمارا ملک مزید کسی آزمائش کا متحمل نہیں۔ وطن عزیز کی سلامتی کو یقینی بنانے کیلئے بیرونی مداخلت کا مکمل خاتمہ ناگزیر ہے۔ ملک کے حساس معاملات میں امریکی مداخلت پر ہماری خاموشی وطن عزیز کیلئے سنگین خطرہ ثابت ہو سکتی ہے۔
پریس کانفرنس میں علامہ عاصم مخدوم، سید حسین زیدی، صدر امامیہ سٹوڈنٹس آرگنائزیشن لاہور ڈویژن حیدر ثقفی، مولانا سید حسین نقوی، مولانا علام عباس شیرازی، شیخ عمران اور نجم جعفری و دیگر عہدیدار شریک ہوئے۔
وحدت نیوز(کوئٹہ) مجلس وحدت مسلمین کے مرکزی ڈپٹی سیکرٹری جنرل اور سابق وزیر قانون بلوچستان آغا رضا، ایم ڈبلیو ایم کوئٹہ کے ڈپٹی سیکرٹری شیخ ولایت حسین جعفری اور دیگر نے کوئٹہ پریس کلب میں ایک پریس کانفرنس سے خطاب کرتے ہوئے کہا ہے کہ جمعہ کے روز ملک بھر میں یوم القدس منایا جائے گا اور فلسطین، کشمیر و یمن کے مظلومین سے اظہار یکجہتی کے لیے بھرپور انداز میں ریلیاں نکالی جائیں گی۔ موجودہ ملکی و بین الاقوامی صورتحال اور خطے کے حالات ملک میں مزید ناامنی کی طرف اشارہ دے رہے ہیں۔ امریکہ اسرائیل اور سعودی عرب سمیت تمام اسلام دشمن اور ملک دشمن قوتیں تیزی سے اپنے شیطانی ایجنڈے پہ عمل پیرا ہیں۔ ان حالات میں بروز جمعہ وطن عزیز میں یوم القدس یقینا بہت اہمیت کا حامل ہے۔ فلسطین کے مظلومین کی حمایت میں علامہ اقبال اور قائداعظم کے نظریات ہمارے لیے بہترین لائحہ عمل ہیں۔ القدس مسلکی مسئلہ نہیں، بلکہ امت مسلمہ کا اور انسانیت کا باہمی مسئلہ ہے۔ کشمیر و فلسطین میں انسانی حقوق کی پامالی کے بدترین واقعات رقم کئے جا رہے ہیں۔ جن کے خلاف اقوام عالم کو انسانی اور اخلاقی بنیادوں پر آواز بلند کرنی چاہئے۔ ظالموں کی مخالفت اور مظلوموں کی حمایت ایک شرعی تقاضا ہے۔ امریکہ، بھارت اور اسرائیل دور عصر کے سب سے بڑے ظالم اور غاصب ہیں۔ ان کے خلاف ملت تشیع بھرپور انداز میں احتجاج جاری رکھے گی۔
آغا رضا نے مزید کہا کہ القدس پر اسرائیل کے غاصبانہ تسلط کے خاتمے کا وقت بہت قریب ہے۔ القدس کی آزادی کو اب دنیا کی کوئی طاقت نہیں روک سکتی۔ فلسطین کی وہ قوم جو کل تک اسرائیلی ٹینکوں کا مقابلہ پتھروں سے کرتی تھی، آج جدید ٹیکنالوجی سے لیس ہے۔ عوامی مزاحمت نے اسرائیل کو عملی اور فکری طور پر شکست فاش سے دوچار کیا ہے۔ امریکہ کے کندھے پر سوار ہو کر اسرائیل زیادہ دیر تک اپنی بقا کی جنگ نہیں لڑسکے گا۔ فلسطین کی اس ترقی نے اسرائیل اور اس کے حواریوں کو خوفزدہ کر رکھا ہے۔ اپنے وسعت پسندانہ عزائم کی تکمیل کے لیے دیکھے جانے والے گریٹر اسرائیل کا دیرینہ خواب آج چکنا چور ہو چکا ہے اور صیہونی اپنے غاصب حصے پر قبضہ برقرار رکھنے کے لیے بوکھلاہٹ میں ہاتھ پاؤں مار رہے ہیں۔ اسرائیل کی اس ناکامی کا سارا کریڈٹ امام خمینی کو جاتا ہے، جنہوں نے انقلاب ایران کے بعد القدس کے مسئلے کو زندہ رکھنے کے لیے بھرپور آواز بلند کی۔ امام خمینی نے جمعة الوداع کے موقع پر پوری دنیا کے اندر یوم القدس منانے کا اعلان اس وقت کیا جب عالمی قوتیں اسرائیل کو ایک اٹل حقیقت منوانے پر تلی ہوئی تھیں۔
انہوں نے کہا وہ عالمی استکباری قوتیں جو فلسطینیوں سے ان کا آبائی علاقہ چھیننا چاہتی ہیں، آج ہمارے وطن عزیز کی سلامتی و استحکام کو بھی تباہ کرنے پر تلی ہوئی ہیں۔ امریکہ پاکستان کا بدترین دشمن ہے اور اس کی سالمیت کو نقصان پہنچانے کے لیے ایڑی چوٹی کا زور لگا رہا ہے۔ دہشت گردوں کے ذریعے وطن عزیز کو عدم استحکام کا شکار کرنے کے ایجنڈے پر بڑی تیزی سے کام ہو رہا ہے۔ دہشت گردی کے خلاف جنگ میں اس قوم نے پہلے ہی بہت نقصان اٹھایا ہے۔ ہمارا ملک مزید کسی آزمائش کا متحمل نہیں ہوسکتا۔ وطن عزیز کی سلامتی کو یقینی بنانے کے لیے بیرونی مداخلت کا مکمل خاتمہ ناگزیر ہے۔ ملک کے حساس معاملات میں امریکی مداخلت پر ہماری خاموشی وطن عزیز کے لیے سنگین خطرہ ثابت ہو سکتی ہے۔
وحدت نیوز(کراچی) مجلس وحدت مسلمین پاکستان کے زیر اہتمام فلسطینی شہداء کی یاد میں کراچی پریس کلب پر چراغاں و تصویری نمائش کا انعقاد کیا گیا، جس میں ایم ڈبلیو ایم کے مرکزی ڈپٹی سیکرٹری جنرل علامہ احمد اقبال، پاکستان عوامی تحریک کے رہنما راؤ کامران، جماعت اسلامی کے رہنما محمد اسماعیل، فلسطین فاونڈیشن کے سیکرٹری جنرل صابر ابو مریم، علامہ صادق جعفری، علامہ مبشر حسن، علی حسین نقوی سمیت مختلف سیاسی و مذہبی جماعتوں کے رہنماؤں نے شرکت کی اور خطاب کیا۔
رہنماؤں نے مظلوم فلسطینی شہداء کو خراج عقیدت پیش کرنے کیلئے شمع روشن کی اور ان کی بلندی درجات کیلئے دعائیں کیں۔ اس موقع پر خطاب کرتے ہوئے علامہ احمد اقبال رضوی نے کہا کہ فلسطینی عوام بلخصوص شہداء مسجد الاقصٰی کی قربانیاں رائیگاں نہیں جائیں گی، پاکستانی عوام اپنے مظلوم فلسطینی غیور مسلمانوں کے ساتھ کھڑے ہیں، اسرائیل ایک غیر آئینی غاصب ریاست ہے، اسے ہرگز تسلیم نہیں کیا جائے گا۔ انہوں نے کہا کہ مسئلہ فلسطین کے حل کیلئے عالمی برادری کا کردار مجرمانہ ہے، کشمیر و فلسطین میں بے گناہ عوام کو جارحیت کا نشانہ بنایا جا رہا ہے، عالمی برادری خاموش تماشائی بنی ہوئی ہے۔
علامہ احمد اقبال رضوی نے کہا کہ او آئی سی و عرب لیگ صہیونی مظالم پر چپ سادے ہوئے ہیں، چند عرب ممالک نے اسرائیل کو تسلیم کرکے امت مسلمہ کی پیٹھ پر خنجر گھونپا ہے، فلسطین فلسطینیوں کی سرزمین ہے، اگر ان کا حق نہ دیا گیا تو ان خائن ممالک کی بادشاہتوں کو بھی صہیونی گرا دیں گے۔
انہوں نے کہا کہ مملکت خداداد پاکستان کی غیور عوام کشمیر و فلسطینی بھائیوں کے شانہ بشانہ کھڑے ہیں، قبلہ اول بیت المقدس کی آزادی کیلئے جمعۃ الوداع عالمی یوم القدس کے دن ملک بھر میں غاصب اسرائیل کے خلاف احتجاج کیا جائے گا، آئمہ جمعہ و جماعت اسرائیلی جارحیت و دہشتگردی کے خلاف اور مظلوم فلسطینیوں کی حمایت میں خطبہ جمعہ دیں گے اور ان کیلئے خصوصی دعائیں کی جائیں گی، جبکہ بعد نماز ملک کے تمام چھوٹے بڑے شہروں، اضلاع میں احتجاجی ریلیاں و مظاہرے کئے جائیں گے۔ انہوں نے کہا کہ شر قائد میں ایم ڈبلیو ایم کا مرکزی احتجاجی مظاہرہ بعد نماز جمعہ جامع مسجد نور ایمان ناظم آباد کے سامنے کیا جائے گا۔
وحدت نیوز(حیدرآباد) مجلس وحدت مسلمین ضلع حیدرآباد کے ترجمان علامہ گل حسن مرتضوی کی سربراہی میں یوم القدس کے حوالے سے آئی ایس او ڈویژن حیدرآباد اور اصغریہ آرگنائیزیشن حیدرآباد کے رہنماؤں کے ساتھ مشترکہ پریس کانفرنس کا انعقاد حیدرآباد پریس کلب پر کیا گیا۔ جس میں مولانا سید ذوالفقار کاظمی، ایڈووکیٹ رحمان رضا عباسی، مولانا ملازم حسین، مولانا عمران علی دستی، فرمان حیدر بھٹی، سید قیصر رضوی اور انتظار مہدی زرداری نے شرکت کی۔
پریس کانفرنس سے خطاب کرتے ہوئے رہنماؤں نے کہا کہ اسرائیل کی جارحیت اور ظلم و جبر دنیا کے سامنے بے نقاب ہوچکا ہے، اسرائیل فلسطینی مسلمانوں پر ظلم کی تمام حدیں پار کرچکا ہے، مسلمانوں کی نسل کشی کرتے وقت تمام انسانی اقدار کو پامال کیا جا رہا ہے، معصوم بچوں جوانوں اور بوڑھوں کو بےدردی سے قتل کیا جا رہا ہے، انہیں اسیر کیا جا رہا ہے یہاں تک کہ عورت کی عزت اور حرمت کو پامال کرتے ہوئے ظلم کی تمام حدود کو پار کردیا گیا ہے۔
رہنماؤں نے کہا کہ اسلامی دنیا کے بہادر اور نڈر لیڈر امام خمینی رح نے اسرائیل کو ناسور قرار دیتے ہوئے مظلوم فلسطین اور مسجد اقصیٰ قبلہ اول بیت المقدس کی آزادی کی خاطر ہر سال ماہ رمضان المبارک کے آخری جمعہ کو یوم القدس منانے کا اعلان کیا، دنیا کے تمام مسلمان یوم القدس کے دن اپنے اپنے گھروں سے نکلیں گے اور ریلیوں کی شکل میں اسرائیل کی نابودی اور قدس کی آزادی کے لئے اپنی آواز بلند کریں گے، دنیا کے دیگر ممالک کی طرح پاکستان میں بھی امام خمینی رح کے اس حکم پر ہر شہر سے لوگ فلسطین اور بیت المقدس کی آزادی کے حق میں اور اسرائیلی مظالم کیخلاف نکلیں گے، جبکہ حیدرآباد میں قدم گاہ مولا علی علیہ السلام سے تحریک آزادی القدس کے بینر تلے احتجاجی ریلی نکالی جائیگی جو گل سینٹر چوک پر اختتام پذیر ہوگی، جس میں مختلف تنظیمی رہنما و شخصیات شرکاء سے خطاب فرمائیں گی۔
وحدت نیوز(اسلام آباد) وفاقی وزیر تعلیم رانا تنویر حسین کی یکساں نصاب پر ملت جعفریہ کے تحفظات دور کرنے کی یقین دہانی۔مجلس وحدت مسلمین پاکستان کے ایک وفد نے آج صبح وفاقی وزیر تعلیم رانا تنویر حسین سے وفاقی وزارت تعلیم کے دفتر میں ملاقات کی اور انہیں یکساں قومی نصاب پر ملت جعفریہ کے تحفظات سے آگاہ کیا۔
وفد نے وفاقی وزیر کی توجہ خاص طور پر آئین میں دی گئی مذہبی آزادیوں کی طرف دلوائی اور بتایا کہ آئین پاکستان بچوں کو ایسی مذہبی تعلیم اور ہدایات سے تحفظ فراہم کرتا ہے جن کا تعلق ان کے مذہب سے نہ ہو۔ وفد نے وفاقی وزیر کو بتایا کہ ایک مسلک کا فہمِ دین زبردستی سب بچوں کو پڑھانے سے ملک میں قائم مذہبی رواداری متاثر ہوگی اور حوالے سے اہل تشیع میں شدید تشویش پائی جاتی ہے۔
وفد نے مطالبہ کیا کہ یکساں قومی نصاب کو تمام مکاتب فکر کے لیے قابل قبول بنانے کے لیے فوری اصلاحات کی ضرورت ہے اور اصلاحات کے بغیر نصاب کا نفاذ فوری طور پر روکا جائے۔ وفاقی وزیر کو بتایا گیا کہ سابقہ وزیر تعلیم نے تحفظات دور کروانے کی یقین دہانی کروائی تھی لیکن افسوس کے ساتھ محکمہ نصابیات کی طرف سے اس پر کوئی پیشرفت نہیں ہوسکی۔
وفاقی وزیر تعلیم نے نصاب پر اہلِ تشیع کے تحفظات کو جائز قرار دیتے ہوئے کہا وہ جلد نصاب کے مسئلے پر تمام اسٹیک ہولڈرز کا اجلاس کررہے جس میں اہل تشیع کے نمائندوں کو بھی بلایا جائے گا اور تمام تر خدشات کو دور کیا جائے گا۔ علاؤہ ازیں وفاقی وزیر تعلیم رانا تنویر حسین نے وفاقی سیکرٹری تعلیم ناہید درانی کو ہدایات جاری کیں کہ فوری طور پر وزارت تعلیم اور محکمہ نصابیات کی تکنیکی ٹیم اور نصاب کے ورکنگ گروپ کا اہل تشیع نمائندوں خصوصاً مجلس وحدت المسلمین کے نمائندوں کے ساتھ ایک مشترکہ اجلاس بلایا اور یکساں قومی نصاب پر اہل تشیع کے تحفظات کو دور کرنے کی تفصیلات طے کی جائیں۔
ایم ڈبلیو ایم وفد کی طرف سے وفاقی وزیر کو یکساں قومی نصاب پر ملت جعفریہ کے تفصیلی تحفظات تحریری شکل میں بھی دئیے گئے۔ایم ڈبلیو ایم کے وفد میں مرکزی ترجمان اور اصلاح نصاب کمیٹی کے کنوینئر علامہ مقصود علی ڈومکی، سید ابنِ حسن بخاری، آصف رضا ایڈووکیٹ، مولانا ضیغم عباس اور شمس الدین کامل شریک تھے۔میٹنگ میں وفاقی وزیر تعلیم کے علاوہ وفاقی سیکرٹری تعلیم ناہید درانی بھی شریک تھیں۔
وحدت نیوز(سکردو) ممبر گلگت بلتستان کونسل و ڈپٹی سیکرٹری جنرل مجلس وحدت مسلمین گلگت بلتستان شیخ احمد علی نوری نے جامعہ کراچی میں دھماکے کی شدید مذمت کی ہے۔
ممبر گلگت بلتستان کونسل نے کہا کہ جامعہ کراچی واقعہ افسوسناک ہے، دھماکے میں جاں بحق افراد کے لواحقین کے غم میں برابر کے شریک ہیں۔
انہوں نے مزید کہا کہ ایسے ناخوشگوار واقعات کا مقصد پاک چین دوستی کو متاثر کرنا ہے۔ چینی شہریوں کی ہر صورت تحفظ یقینی بنانا حکومت کی ذمہ داری ہے۔زخمیوں کی جلد صحت یابی کے لئے دعا گو ہے۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کراچی یونیورسٹی میں خودکش دھماکے کی شدید الفاظ میں مذمت کی ہے۔ انہوں نے چینی اساتذہ کو نشانہ بنائے جانے پر افسوس کا اظہارکرتے ہوئے اسے پاکستان اور چین کے برادرانہ تعلقات خراب کرنے کی سازش قرار دیا ہے۔
انہوں نے کہا کہ ملک دشمن قوتیں ارض پاک کے امن کو تباہ کرنے کا کوئی موقع ہاتھ سے جانے نہیں دیتی۔ہمیں ان عناصر سے چوکنا رہنا ہو گا جو ملکی سالمیت و بقا کے سنگین خطرات پیدا کر رہے ہیں۔ پاکستان نے دہشت گردی کے خلاف جنگ کی بھاری قیمت چکائی ہے۔عالمی استکباری طاقتیں اس خطے کو عدم استحکام کا شکار رکھنا چاہتی ہیں۔اگر ان کا راستہ نہ روکا گیا تو مادر وطن کی سالمیت و بقا کے لیے مشکلات کھڑی ہو جائیں گی۔
انہوں نے کہا کہ وطن عزیز کسی نئی آزمائش کا قطعی متحمل نہیں ہے۔امریکہ کی مداخلت کا مکمل خاتمہ ہمارے پرامن مستقبل کی ضمانت ہے بصورت دیگر اسی طرح کے بھیانک واقعات رونما ہوتے رہیں گے۔ انہوں نے کہا کہ چینی اساتذہ پر حملے کے ذمہ داران عبرتناک سزاؤں کے مستحق ہیں۔انہیں انصاف کے کٹہرے میں لایا جانا چاہیے۔
انہوں نے مزید کہا کہ پاکستان میں عالمی یوم القدس کی مناسبت سے جمعتہ الوداع کے دن ملک بھر میں قبلہ اول کی آزادی اور مظلوم فلسطینیوں سے اظہار یکحہتی کرتے ہوئے فرزندان پاکستان صدائے احتجاج بلند کریں گے اور القدس کے عنوان سے آج ایم ڈبلیو ایم مرکزی سیکرٹریٹ سمیت تمام صوبائی دفاتر میں بھی پریس کانفرنسسز کا انعقاد کیا جائے گا۔
وحدت نیوز(کوئٹہ)ملی یکجہتی کونسل بلوچستان کے زیراہتمام مدرسہ خاتم النبیین (ص) کوئٹہ میں یکجہتی فلسطین کانفرنس کا انعقاد کیا گیا، جس میں مختلف سیاسی و مذہبی جماعتوں کے رہنماؤں نے شرکت کی۔ کانفرنس سے خطاب کرتے ہوئے مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا کہ مغربی سامراج انسانیت کا دشمن ہے۔ 39 ملکی اتحاد گذشتہ سات سال سے امریکہ کی چھتری تلے کام کر رہا ہے۔ مسلم اتحاد کے نام پر یمن میں خونریزی کی جا رہی ہے۔ مختلف ممالک میں موجود ہمارے سفارت خانوں کو فلسطین کی آزادی پر واضح موقف اختیار کرنا چاہیئے۔ ہمیں مسئلہ فلسطین اور کشمیر پر عالمی رائے عامہ کو ہموار کرنا ہوگا۔ مسئلہ فلسطین ظالم اور مظلوم کا مسئلہ ہے۔ دنیا میں کہیں بھی ظلم ہو بحیثیت مسلمان احتجاج ہمارا فرض ہے۔
تحریک اسلامی کے صوبائی رہنماء سید رضا اخلاقی نے کہا کہ مسئلہ فلسطین پر ملک کی تمام سیاسی و مذہبی جماعتیں ایک ہیں، اسرائیل ملت اسلامیہ کو کمزور کرنے کی سازش کر رہا ہے۔ دوسری جنگ عظیم کے بعد اسرائیل کو خطہ میں پلانٹ کیا گیا۔ مسئلہ فلسطین کے حوالے سے ہماری حکومت موثر کردار ادا نہیں کر رہی۔ ہم فلسطین کاز کی خاطر اپنی جان دینے کیلئے بھی تیار ہیں۔
مجلس وحدت مسلمین پاکستان کے مرکزی ڈپٹی سیکرٹری جنرل اور سابق وزیر قانون آغا رضا نے کہا کہ پوری دنیا کے مسلمان فلسطین کی آزادی کیلئے اسرائیل کے خلاف مشترکہ جدوجہد کریں۔ اسرائیل کو تسلیم کرنے والے عرب اور غیر عرب مسلم ممالک تاریخی غلطی کے مرتکب ہیں۔ پاکستانی عوام شیطان بزرگ امریکہ اور غاصب اسرائیل سے شدید نفرت کرتے ہیں۔
فلسطین کانفرنس سے خطاب کرتے ہوئے جماعت اسلامی کے صوبائی رہنماء مولانا ڈاکٹر عطاء الرحمٰن نے کہا کہ کشمیر و فلسطین میں انسانی حقوق کی بدترین پامالی کی جا رہی ہے۔ قائداعظم محمد علی جناح نے اسرائیل کو امریکہ و برطانیہ کی ناجائز اولاد قرار دیا تھا۔ ہمارے حکمران اسرائیل کو تسلیم کرنے کے خواب نہ دیکھیں، عوام اسے کبھی قبول نہیں کرے گی۔
کانفرنس سے خطاب کرتے ہوئے مجلس وحدت مسلمین پاکستان کے شیخ ولایت حسین جعفری کا کہنا تھا کہ فلسطین اور کشمیر کا مسئلہ عالم اسلام کا بنیادی مسئلہ ہے۔ امام خمینی نے ایران میں اسرائیل کا سفارتخانہ یاسر عرفات کو دیا۔ مسئلہ فلسطین کا حل عملی جدوجہد کے بغیر ممکن نہیں۔ یہود و نصاریٰ نے دنیا پر قبضہ کرنے سازش کی۔ فلسطین، شام، لبنان، ایران، پاکستان کے خلاف عالمی استعماری طاقتیں سازش کر رہی ہیں۔ چند عرب ممالک حکمران اپنی بقاء کا ضامن اسرائیل کو سمجھ رہے ہیں۔ خطے میں گریٹر اسرائیل کی سازش ناکام ہوگئی۔ لبنان اور شام سے جنگی شکست کے بعد اب اسرائیل کی سازشیں ناکام ہو رہی ہیں۔
یکجہتی فلسطین کانفرنس میں علامہ مقصود علی ڈومکی نے مشترکہ قرارداد پیش کی۔ جس میں کہا گیا کہ فلسطین فلسطینیوں کا وطن ہے۔ اسرائیل فلسطین پر قائم کی جانے والی صہیونیوں کی ایک ناجائز اور غاصب ریاست ہے۔ بانی پاکستان قائداعظم محمد علی جناح سے تجدید عہد کرتے ہوئے فلسطین کاز اور قبلہ اوّل بیت المقدس کی بازیابی کے لئے تحریک آزادی فلسطین و قدس کی حمایت جاری رکھیں گے۔ کشمیر پاکستان کی شہ رگ حیات ہے اور فلسطین عالم اسلام کا قلب ہے۔ کشمیر و فلسطین میں جاری صہیونی اور بھارتی ظلم و بربریت کے خلاف فلسطینی و کشمیری عوام کی انسانی و اسلامی بنیادوں پر حمایت جاری رکھی جائے گی۔ قرارداد میں کشمیر میں جاری بھارتی ریاستی دہشت گردی کی شدید مذمت اور کشمیری عوام کے حق خود ارادیت کی حمایت کا بھی اعلان کیا گیا۔ قرارداد میں کہا گیا کہ امریکی سرپرستی میں عرب ممالک اور اسرائیل کے مابین طے کردہ "ابراہیمی معاہدہ" فلسطین اور عرب دنیا کے لئے زہر قاتل ہے۔ عرب دنیا کے ساتھ اسرائیل کے دوستانہ تعلقات نہ صرف فلسطین بلکہ پوری مسلم اُمّہ کے ساتھ خیانت ہیں۔ بحرین، مصر، مراکش، متحدہ عرب امارات کے وزرائے خارجہ کا امریکی و صہیونی وزرائے خارجہ کے ہمراہ فلسطینیوں کے قاتل صہیونی وزیراعظم بن گوریون کی قبر پر حاضری سے پاکستان سمیت دنیا بھر کے مسلمانوں کے جذبات مجروح ہوئے ہیں۔
ہم اس اقدام کی شدید مذمت کرتے ہیں۔ مخصوص عرب اور غیر عرب ریاستوں کی جانب سے پاکستان پر اسرائیل کے ساتھ تعلقات قائم کرنے کے لئے دباؤ کی بھی مذمت کرتے ہوئے اسے مسترد کیا گیا اور کہا گیا کہ اسرائیل کے ساتھ دوستانہ تعلقات قائم کرنے والے ممالک سے مطالبہ کرتے ہیں کہ فی الفور اپنے اقدام پر نظرثانی کریں اور اسرائیل کے ساتھ تمام سفارتی و تجارتی تعلقات کو منقطع کریں۔ حکومت پاکستان ملک میں اسرائیلی لابنگ کرنے والے عناصر کی بیخ کنی کرنے کے لئے حکمت عملی وضع کرے۔ فلسطینی علاقہ غزہ کی پٹی کا محاصرہ ختم کیا جائے۔ مسئلہ فلسطین اور مسئلہ کشمیر پر عالمی برادری کے دوہرے معیار کی مذمت کرتے ہیں۔ فلسطین و کشمیر کے ساتھ ساتھ یمن، افغانستان، عراق، لیبیا اور دیگر مقامات پر عالمی اداروں کی بے حسی استعماری قوتوں کے حوصلہ کا باعث بن رہی ہے۔ اقوام متحدہ اور او آئی سی سمیت عالمی ادارے فلسطین اور کشمیر جیسے مسائل کے منصفانہ حل میں ناکام ہوچکے ہیں۔ اسرائیلی مظالم کا ڈٹ کر مقابلہ کرنے والے نہتے اور مظلوم فلسطینیوں کی مزاحمت کاری کی بھرپور حمایت کرتے ہیں۔ ہم حکومت پاکستان سے مطالبہ کرتے ہیں کہ ماہ رمضان المبارک کے آخری جمعہ کو ملک بھر میں یوم القدس کے طور پر سرکاری سطح پر منایا جائے۔
