وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری کاایران کے شہر کرمان میں ہونے والے جان لیوابم دھماکوں کی شدید مذمت کرتے ہوئے واقعے میں قیمتی جانوں کے نقصان پر گہرے دکھ اور افسوس کا اظہار،انہوں نے شہداء کے خاندانوں سے دلی تعزیت اور زخمیوں کی جلد صحت یابی کیلئے دعا کرتے ہوئے شہید ق ا س م س ل ی م ان ی کے مرقد کے قریب عام شہریوں پر ہونے والی کاروائی کو بزدلانہ فعل قرار دیا ہے۔

علامہ راجہ ناصرعباس نے اپنے مذمتی بیان کہا کہ اسلامی مزاحمت کا سامنا نہ کر سکنے والا دشمن پیٹھ پیچھے وار کرنے پر اتر آیا ہے، معصوم افراد کی جانوں سے کھیلنے والے بوکھلاہٹ کا شکار ہیں، دونوں دھماکے سردار محاذ استقامت شہید جنرل ق اس م سلی مانی پر کرنا سوچی سمجھی کاروائی کا حصہ ہیں، گلزار شہداء میں بہت بڑی تعداد میں عوام کا موجود ہونا ہی اصل ٹارگٹ تھا، دشمن کی کاروائیاں شہید پرور قوم کے حوصلے پست نہیں کر سکتیں، ان کاروائیوں سے صہیونی و استعماری قوتوں کے غزہ میں شکست کا واضح اثرات نمایاں ہیں۔

انہوں نے کہا کہ اس دلخراش اور اندھوناک سانحے پر امام زمان عج اور نائب برحق رہبر معظم انقلاب آیت اللہ خامنہ ای سمیت ملت اسلامی ایران کی خدمت میں ملت پاکستان کی جانب سے ہدیہ تعزیت و تسلیت پیش کرتے ہیں، انشاءاللہ ولی امر مسلمین کی قیادت میں اسلامی مقاومت عالمی استعمار امریکہ و اسرائیل کو جلد بدترین شکست اور تباہی کا تحفہ دے گی۔

وحدت نیوز(اسلام آباد)محاذ مقاومت کے عظیم کمانڈر شہید جنرل قاسم سلیمانی کی شہادت کو چار سال کا عرصہ گزرنے کے باوجود ان کی کوششیں پوری امت مسلمہ ، فلسطینی قوم اور اسلامی مزاحمت کے قائدین کے دلوں میں زندہ ہیں، شہید سلیمانی نے فلسطین کی اسلامی مزاحمت کو ہر طرح سے مسلح کرنے میں اہم کردارادا کیا اور بہت سے علاقائی ماہرین کا خیال ہے کہ طوفان الاقصیٰ آپریشن میں فلسطینیوں کی آج کی فتوحات شہید قاسم سلیمانی کے منصوبوں کی مرہون منت ہیں، اس مسئلے پر فلسطینی اسلامی مزاحمت کے رہنماؤں کے بیانات میں واضح طور پر روشنی ڈالی گئی ہے۔

شہید راہ قدس سردار رشید اسلام حاج قاسم سلیمانی ؒ کی چوتھی برسی کی مناسبت سے مہر کے نامہ نگار نے مجلس وحدت مسلمین پاکستان کے سربراہ علامہ راجہ ناصر عباس جعفری سے گفتگو کی جو درج ذیل ہے۔

علامہ راجہ ناصر عباس جعفری نے مہر نیوز سے گفتگو میں کہا کہ شہید قاسم سلیمانی رضوان اللہ علیہ رہبر معظم کی حکمت عملی کو خطے میں ان کی منشا اور آرزو کے مطابق عملی کرتے تھے۔ وہ ولی فقیہ زمان میں ذوب تھا اسی لئے مکتب سلیمانی کہا گیا۔ ولی فقیہ کے آرمانوں اور آرزوں کو عملی شکل دینے کے لئے وہ مکتب بن گئے۔ ولایت فقیہ کے نفوذ کے راستے میں حائل رکاوٹوں کو ہٹاتے تھے۔ یمن، لاطینی امریکہ یعنی براعظموں کو عبور کیا۔ ولی فقیہ کے نظام کا فرماندہ تھا۔ وہ ولی فقیہ کا ہمطراز تھا۔ ولایت فقیہ اس کی روح میں تھی۔ ایک دفعہ ملنے کے بعد ان کو نہیں بھول سکتے ہیں۔ مجھے اللہ نے بہت دفعہ ان سے ملاقات کی توفیق دی جو کئی گھنٹوں پر مشتمل ہوتی تھی۔ وہ جذاب شخصیت کے مالک تھے۔ ملکوں کے کلچر اور روایات سے آگاہ تھے۔ مسلمانوں اور غیر مسلمانوں سے بات کرنا جانتے تھے۔ ولی فقیہ کے ساتھ مرتبط ہونے کی وجہ سے ان کے سامنے کوئی ابہام نہیں تھا۔

انہوں نے کہا کہ شہید قاسم سلیمانی نے خود کو ولی فقیہ کے اندر فنا کردیا تھا۔ انہوں نے مقاومت کو بہت طاقت دی۔ مچھلی دینے کے بجائے جال بنانا سکھادیا۔ آج غزہ میں مقاومت بہت طاقتور ہے۔ غزہ میں اسرائیل ہی نہیں بلکہ مغرب اور امریکہ سارے مل کر لڑرہے ہیں لیکن سارے ہار رہے ہیں۔ شہید سلیمانی نے ان کو ٹریننگ دی، ڈرون بنانا اور ٹنل بنانا سکھادیا۔ خود غزہ جاتے تھے۔ جب حاج قاسم شہید ہوئے تو اسماعیل ہنیہ نے ان کے جنازے پر کہا تھا کہ وہ القدس کے راستے کے شہید ہیں اور سید مقاومت سید حسن نصراللہ نے ان کو شہید طریق القدس کہا تھا۔ انہوں نے حزب اللہ کو طاقتور بنادیا۔ اسرائیل آج اس سے خوفزدہ ہے۔ عراق اور شام میں امریکہ نے اربوں ڈالر لگادئے لیکن شکست ہوگئی۔ شہید سلیمانی میدان جنگ میں اولین صف میں ہوتے تھے۔ امریکی جنرل کی طرح آرام دہ کمرے میں رہ کر کمانڈ نہیں کرتے تھے۔ اتنی ہیبت تھی کہ جب ان کا نام سنتے تھے تو بھاگ جاتے تھے۔ یمنیوں کو اتنا طاقتور بنادیا کہ بڑے دشمن اور کئی ملکوں کے اتحاد کے سامنے پابرہنہ کھڑے ہوکر شکست دی آج اتنے طاقتور ہیں کہ یمن سے اسرائیل کو مارتے ہیں۔ سمندر کو اسرائیل کے لئے ناامن کردیا۔ حاج قاسم نے مقاومت کے سلسلے کو آپس میں جوڑا ہے۔

مجلس وحدت مسلمین پاکستان کے سربراہ نے مزید کہا کہ حاج قاسم واقعا ایک عظیم انسان تھے۔ افغانستان ہو یا دیگر ممالک ان کو تحریک کو منظم کرنے کا فن آتا تھا۔ ایک دفعہ مل جائے تو سارا دن ساتھ بیٹھنے کا دل کرتا تھا۔ بہت جذاب شخص تھے۔ اب الحمداللہ ان کے جانشین جنرل اسماعیل قاآنی بھی ان کی طرح ہیں۔ آج جو کچھ ہورہا ہے اس کی کمانڈ وہی کررہے ہیں۔ بہت خاشع و خاضع انسان ہیں۔ اتنے سال حاج قاسم کے ماتحت رہ کر کام کیا۔ مجھے امید ہے کہ وہ ان کو آگے بڑھائیں گے۔ ایک دن آئے گا کہ ہم اسرائیل کا خاتمہ اور امریکہ کو ٹوٹتا دیکھیں گے۔ ہمیں یقین کرنا ہوگا کہ رہبر معظم نے جو کہا وہ ہوکر رہے گا۔ دنیا پر نیا نظام رائج ہوگا۔ امریکہ اور اسرائیل کا خاتمہ ہوکر رہے گا۔ ان کی حالت سوویت یونین سے بھی بدتر ہوگی۔ ان شاء اللہ

وحدت نیوز(اسلام آباد) سربراہ مجلس وحدت مسلمین پاکستان علامہ راجہ ناصر عباس جعفری نےوفد کے ہمراہ اسلام آباد پریس کلب پر جاری بلوچ مسنگ پرسنز فیملیزکے احتجاجی دھرنے میں شرکت کی ۔

اس موقع پر انہوں نے ڈاکٹر ماہ رنگ بلوچ سے ملاقات کی اور دھرنے کے شرکاء سے مکمل اظہار یکجہتی کیا۔انہوںنے کہا کہ مشکل کی اس گھڑی میں ہم آپ کے شانہ بشانہ کھڑے ہیں۔

انہوںنے کہا کہ انصاف کا حصول ہر شہری کا حق ہے، ریاست ماں کا کردار ادا کرے،بلوچوں کے زخموں پر مرحم رکھنے کی ضرورت ہے ، وہ ایک محب وطن قوم ہے۔

ڈاکٹر ماہ رنگ بلوچ نے علامہ راجہ ناصرعباس جعفری کی آمد پر مسرت کااظہار کیا اوربلوچ مسنگ پرسنزفیملیزکے ساتھ اظہار یکجہتی کرنے پر شکریہ ادا کیا۔

میڈیا سے گفتگو میں علامہ راجہ ناصر عباس جعفری کا کہنا تھا کہ یہ ہماری بیٹیاں ہیں عوام انکا ساتھ دے اور ثابت کرے ہم مظلوموں کے ساتھ ہیںاور ظالم کے خلاف ہیں۔

 انہوں نے مزید کہا کہ خواتین پہ ظلم قابل مذمت ہے یہ پاکستان کا قتل کرنے کے مترادف ہے ۔یہ پاکستان کی بیٹیاں ہیں ہمیں انکا احترام کرنا چاہئے۔

اس دوران مظاہرین میں شامل ایک جوان نے انکشاف کیا کہ اسلام آباد انتظامیہ نے ہماری مدد کے لئے آنے والے شہریوں کو روکنا شروع کردیا ہے۔

ہمیں کھانے پینے کی اشیاء اور گرم بستروں کی فراہمی روک دی گئی ہےاور ہر قسم کے ضروری سامان کی آمد بند کردی گئی ہے جس سے مائیں بہنیں مشکل کا شکار ہیں۔
علامہ راجہ ناصر عباس جعفری نے بلوچ دھرنے میں شامل اس نوجوان کارکن کا ہاتھ پکڑ کر کہا یہ ہمارے بھائی ہیں ہم ان کے ساتھ ہیں ، راولپنڈی اسلام آباد کے عوام ان ماؤں بہنوں کی مہمان نوازی کریں یہ ہمارے مہمان ہیں،دیکھتے ہیں کون روکتا ہے، دھرنے کے شرکا کو کھانا اور موسمی شدت سے بچنے کیلئے بستر بھی فراہم کریں گے۔