وحدت نیوز(کوئٹہ)مجلس وحدت مسلمین کوئٹہ سٹی کے صدر ارباب لیاقت علی ہزارہ نے اپنے بیان میں نہتے ہزارہ طلباء و طالبات کے قتل عام اور مقتدر قوتوں کی مجرمانہ خاموشی کو افسوسناک قرار دیتے ہوئے کہا ہے کہ گزشتہ روز کابل کے ایک تعلیمی ادارے میں امتحان کے دوران ہزارہ طلباء و طالبات پر ہونے والے خود کش حملے کی تمام تر ذمہ داری نام نہاد اسلامی حکومت متنازعہ اسلامی امارات کی نااہل طالبان حکومت پر عائد ہوتی ہے۔

اقوام متحدہ پرامن ہزارہ قوم پر جاری مظالم بند کرنے میں کردار ادا کرے۔ ارباب لیاقت علی ہزارہ نے کہا کہ افغانستان میں بیرونی قوتوں کی مداخلت کی بنیادی وجہ وہاں آباد اقوام کی ایک دوسرے کے مسلمہ حقوق تسلیم نہ کرنا، بے جا اختلافات، نسلی لسانی مسلکی تعصبات اور جہالت ہے۔ انقلاب ثور کے خاتمے کے بعد چالیس سالوں سے جاری کشت و خون کے نتیجے میں یوں تو سبھی اقوام ناقابل تلافی نقصانات اٹھا چکی ہیں۔

لیکن آبادی کے لحاظ سے کم تر فارسی زبان اہل تشیع ہزارہ اور برادران اہل سنت کے ازبک، تاجک کے ساتھ سب سے زیادہ ظلم اور نا انصافیاں ہوئی ہیں۔ حامد کرزئی کی لیبرل ڈیموکریسی حکومت اور امریکی نواز اشرف غنی یا نام نہاد اسلامی حکومت طالبان ہر دور حکومت میں اقلیتوں بلخصوص ہزارہ قوم کا قتل عام افغانستان کی تاریخ کا سیاہ ترین باب کا حصہ ہے۔ ستم بالائے ستم یہ ہے کہ اب تک اقوام عالم ظلم و جبر استحصال اور قتل عام کے تسلسل روکنے کیلئے کوئی عملی اقدام کرنے میں سنجیدہ نہیں ہیں۔

وحدت نیوز(شکارپور)مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا ہے کہ حکومت سیلاب متاثرین کو راشن ٹینٹ سمیت تمام سہولیات فراہم کرنے میں ناکام رہی ہے ہیں، صوبائی حکومت اور ڈپٹی کمشنرز روزانہ کی بنیاد پر تقسیم کئے جانے والے راشن اور خیموں کی تعداد کے حوالے سے پریس ریلیز جاری کریں تاکہ عوام کو معلومات مل سکیں، مچھر دانیاں اور ٹینٹ مستحق لوگوں تک نہیں پہنچے، راشن اور امدادی سامان کی تقسیم کا عمل شفاف طریقے سے ہونا چاہیئے۔ ان خیالات کا اظہار انہوں نے گڑھی یاسین پریس کلب میں پریس کانفرنس کرتے ہوئے کیا۔ پریس کانفرنس میں ایم ڈبلیو ایم ضلع شکار پور کے صدر اصغر علی سیٹھار اور تحصیل صدر مستنصر مہدی بھی ہمراہ تھے۔ علامہ مقصود ڈومکی نے کہا کہ پاکستانی قوم کبھی بھی غاصب اسرائیل کو تسلیم نہیں کرے گی، جس نے غاصب اسرائیل کو تسلیم کرنے کی بات کی اسے امت مسلمہ اور پاکستان کا غدار تصور کیا جائے گا۔

انہوں نے کہا کہ عزاداروں کے خلاف مقدمات غیر قانونی ہیں، آئی جی پنجاب کے غیر قانونی خط کو کورٹ میں چیلنج کریں گے، ملک بھر میں اہل تشیع مسلمانوں کے خلاف عبادت اور ذکر حسین علیہ السلام کو جرم قرار دے کر درج مقدمات فی الفور واپس لئے جائیں۔ انہوں نے کہا کہ عید میلاد النبی صلی اللہ علیہ وآلہ وسلم اور ہفتہ وحدت کے موقع پر شیعہ سنی مسلمان مل کر جشن آمد رسولؐ منائیں گے، اہل سنت ہمارے بھائی اور ہماری جان ہیں، اتحاد بین المسلمین قرآن کریم اور رسول اسلام صلی اللہ علیہ وآلہ وسلم کی تعلیمات کا حصہ ہے، عالمی استکباری قوتوں کی شیعہ سنی کے درمیان تفرقہ اور انتشار کی ہر سازش کو ہم مل کر ناکام بنادیں گے۔

وحدت نیوز(لاہور)رکن پنجاب اسمبلی اور مجلس وحدت مسلمین شعبہ خواتین کی سینیئر رہنما سیدہ زہرا نقوی نے افغانستان کے دارالحکومت کابل میں ایک بار پھر شیعہ برادری کو دہشتگردی کا نشانہ بنانے کی سخت الفاظ میں مذمت کرتے ہوئے کہا ہے کہ افغانستان شیعہ برادری کے لئے غیر محفوظ بنتا جا رہا ہے اور طالبان حکومت انہیں تحفظ دینے میں سنجیدہ نہیں ہے، پے در پے تعلیمی اداروں اور مساجد پر حملے سیکڑوں معصوم جانوں کی شہادتوں کا باعث بنے لیکن ان کے تحفظ کے لئے  اقدامات نہیں کئے جارہے۔ ان کا کہنا تھا کہ دھماکے میں شہید ہونے والے طلباء و طالبات افغان قوم و ملک کا تابناک مستقبل اور اپنے والدین کا سہارا اور امید تھے، اس دل دہلانے والے واقعے اور شیعہ نسل کشی پر عالمی برادری کی خاموشی حیرت انگیز ہے۔

انہوں نے کہا کہ وہ میڈیا اور ادارے جو ایک ایرانی خاتون مہسا امینی کی اچانک موت کو قتل کا پروپگینڈہ بنا کر پوری دنیا کے میڈیا پر واویلا کر رہے تھے، وہ کابل میں شہید ہونے والی طالبات کے لئے آواز کیوں نہیں اٹھا رہے، انسانی حقوق کی تنظیموں اور عالمی برادری کے اس منافقانہ رویہ کی جتنی مذمت کی جائے کم ہے۔ واضح رہے کہ کل افغانستان کے دارالحکومت کابل کے مغربی علاقے میں کاج تعلیمی سینٹر میں ہونے والے دہشت گردانہ خودکش  دھماکے میں بتیس سے زائد افراد شہید اور پینتیس دیگر زخمی ہوئے۔ شہید ہونے والوں میں زیادہ تر طالبات ہیں۔ دھماکے کی ذمہ داری تاحال کسی گروپ نے قبول نہیں کی ہے۔

وحدت نیوز(اسلام آباد)  چیئرمین مجلس وحدت مسلمین پاکستان علامہ راجا ناصر عباس جعفری کے زیر صدارت مرکزی کابینہ شعبہ خواتین کا  اہم اجلاس منعقد ہوا ۔جس میں مستقبل کا لائحہ عمل طے کیا گیا نیز شعبہ خواتین کے حوالے سے اہم فیصلہ جات ہوئے ۔علامہ راجہ ناصرعباس  نے فرمایا کہ ملک میں درپیش مسائل کا حل یہ ہےکہ ہم اپنی تزویرات تبدیل کریں۔ ظالم حکومت میں کام کرنےسے دین ہمیں منع نہیں کرتا اگر یہ کام اللہ کی رضا کی خاطر ہو اور اس کام کے نتیجے میں مظلومین کی مدد ہو رہی ہونیز مظلومین کے حقوق دلوانے کے لیے آواز بلند کی جائے۔ دلوانے کے لیے انکےہم آ واز بنیں ۔

انہوں مزید کہا کہااگر ہم اپنے ملک وقوم کے لیے کچھ کرنا چاہتے ہیں تو پہلے مرحلے میں لوگوں کو مجتہدین کا مقلد بنائیں دوسرے مرحلے میں انہیں مجتہدین کی پیروی کے بعد ولایت فقیہ کی محبت سے جوڑ دیں انشاء اللہ اس طرح ہم بہترین معاشرہ اور بہترین ملک بنا سکتے ہیں جو راہ امام وقت عج کے ظہور کے مقدمات ہموار کرنے کے لیے زمینہ ساز ہوں گی۔

اس کے علاوہ شعبہ خواتین کے حوالے سے صدروومن ونگ کو خاص ہدایات دی گئیں اور آئین نامے کی تیاری کے لیے خصوصی سفارش کی گئی ۔بہت جلد خواتین کا آئین نامہ آپ حضرات کے سامنے آ جائے گا ۔صدروومن ونگ نے اپنی چار ماہ کی کارکردگی رپورٹ پیش کی ۔نیز ایک روزہ ورکشاپ کے حوالے سے علامہ صاحب نے خصوصی دروس دیے۔ان دروس کا موضوع حالاتِ حاضرہ کے موضوعات پر مبنی تھا۔