وحدت نیوز(جھل مگسی) مجلس وحدت مسلمین بلوچستان کی جانب سے گنداواہ ضلع جھل مگسی میں آغا سھیل اکبر شیرازی صوبائی نائب صدر مجلس وحدت مسلمین بلوچستان ،ضلعی صدر حبیب اللہ ضلعی نائب صدر سید وفا عباس شاہ بخاری ،ضلعی سیکرٹری جنرل گہنور خان نجف اورضلعی سیکرٹری تبلیغات مولانا گلزار حسین کلواڑ نے گنداواہ کے سیلاب وبارش متاثرین میں ایک سو بیگ راشن 200جوڑے کپڑے تقسیم کئے۔

 اس موقع پر آغا سہیل اکبر شیرازی نے بات چیت کرتے ہوئے کہا کہ ضلع جھل مگسی سیلاب اور بارشوں سے بہت زیادہ متاثر ہوا ہے کچھ علاقوں میں ابھی تک پانی موجود ہے اس ضلع میں  مزید راشن ودیگر گھریلو اشیاء کی اشد ضرورت ہے تاکہ جو متاثرین رہ گئے ہیں ان میں بھی راشن وغیرہ تقسیم کیا جاسکے اس لیے مخیرین حضرات سے تعاون کی اپیل کی جاتی ہے۔

وحدت نیوز(کراچی)مجلس وحدت مسلمین پاکستان کراچی ڈویژن کے صدر شیخ مولانا صادق جعفری نے کراچی پریس کلب میں کانفرنس سے خطاب کرتے ہوئے کہا کہ پے در پے پاکستانی وفود کا دورہ اسرائیل اور ان وفود میں شامل افراد کے خلاف کاروائی نہ کرنا حکومت کے اسرائیل سے خفیہ روابط کی نشاندہی کرتا ہے،قطر میں وزیر اعظم شہباز شریف کی موساد رہنماؤں سے ملاقات سے متعلق خبروں کی بھی کسی قسم کی حکومتی تردید کا نہ آنا حکومتی بد نیتی کو آشکار کرتا ہے۔پریس کانفرنس میں ان کے ہمراہ مولانا حیات عباس نجفی،مولانا محمد عباس مطہری،مولانا بشیر انصاری،مولانا ملک عباس،جناب میر تقی ظفر صاحب بھی موجود تھے  ۔

رہنماؤں نے کہا کہ پاکستان کرکٹ بورڈ کے اہم عہدے پر کام کرنے والے نسیم اشرف اور مشہور معروف ٹی وی چینلز سے تعلق رکھنے والے صحافیوں کا دورہ اسرائیل پاکستان کی سالمیت کو نقصان پہنچانے اور پاکستان کے نظریاتی استحکام کے خلاف سازش کا حصہ ہے۔ ایم ڈبلیو ایم کے رہنماؤں نے حکومت سے مطالبہ کیا کہ حکومت ایسے تمام شہریوں کے خلاف سخت کاروائی عمل میں لائے جو ماضی اور حال میں غاصب صہیونی ریاست اسرائیل کا دورہ کر چکے ہیں اور فلسطینی عوام کے قاتل صدر اور عہدیداروں سے ملاقات کی ہے۔ ان کا کہنا تھا کہ مسلسل پاکستانی صحافیوں کا اسرائیل جانا قائد اعظم محمد علی جناح کی جدوجہد اور افکار کی توہین کے مترادف ہے۔ بانی پاکستان قائد اعظم نے دو ٹوک موقف دیتے ہوئے اسرائیل کو غاصب اور ناجائز ریاست قرار دیا تھا تاہم کوئی بھی حکومت یا فرد قائد اعظم کے بنیادی اصولوں کو تبدیل نہیں کر سکتا۔

انہوں نے کہا کہ متحدہ عرب امارات کی ایک تنظیم پاکستان کے صحافیوں کو مسلسل اسرائیل کا دورہ کروانے میں سرگرم عمل ہے اور پاکستان کے حکمران خاموش تماشائی بنے ہوئے ہیں یا پھر یوں کہا جائے کہ اس جرم میں حکومتی و ریاستی ادارے بھی ملوث ہیں۔

رہنماؤں کا کہنا تھا کہ پاکستان ایک آزاد اورخود مختار ریاست ہے اور کسی بھی عرب ریاست کو یہ حق نہیں دیا جائے گا کہ پاکستان کو عرب  مفادات کی خاطر اسرائیل کے ساتھ نتھی کیا جائے۔رہنماؤں نے پاکستان آرمی چیف اور چیف جسٹس آف پاکستان سے اپیل کی ہے کہ پاکستان سے مسلسل اسرائیل دورہ کرنے کی خبروں پر سنجیدگی سے نوٹس لیا جائے اور ملک میں ایسے اقدامات کی روک تھام کے لئے باقاعدہ قانون سازی کو یقینی بنایا جائے۔ رہنماؤں نے پاکستانی صحافیوں اور دیگر افراد کے اسرائیل دورہ پر شدید تشویش کا اظہار کیا اور عوام سے اپیل کی کہ خیانت کاروں کے خلاف آواز بلند کریں۔

 رہنماؤں نے علماء کرام سے اپیل کی ہے جمعہ نماز کے خطبوں میں اسرائیل جانے والے خیانت کاروں کے چہروں کو عوام کے سامنے آشکار کیا جائے۔یاد رہے کہ اسرائیل لاکھوں فلسطینی مسلمانوں کے خون سے ہولی کھیل کر غاصبانہ قبضہ کرکے بنائی گئی ناجائز ریاست ہے جسے کسی صورت تسلیم نہیں کیا جائے گا۔مسئلہ فلسطین عربوں کا نہیں بلکہ اسلام اور امت مسلمہ کا مسئلہ ہے۔اگر تمام عرب ریاستیں اسرائیل کے سامنے گھٹنے ٹیک دیں تب بھی پاکستاناور دنیا بھر کے مسلمان اسرائیل کو کبھی تسلیم نہیں کریں گے۔بیت المقدس مسلمانوں کا قبلہ اول ہے اور اس پر قابض کسی بھی جعلی ریاست کو تسلیم نہیں کیا جائے گا۔اسرائیل ایک ناسور ہے اور اس کا واحد حل مقاومت ہے، رہبر معظم سید علی خامنہ ای جیسی بابصیرت قیادت اور شہید قاسم سلیمانی رح کی مجاہدانہ کوششوں کے سبب آج فلسطینی مجاہدین بہت طاقتور ہوچکے ہیں اور اب وہ اسرائیلیوں کو اسرائیل کے اندر جواب دیتے ہیں۔

وحدت نیوز(اسلام آباد)پاک فوج ہیلی کاپٹر کےحادثہ میں قیمتی جانوں کے ضیاع پرچیئرمین مجلس وحدت مسلمین پاکستان علامہ راجہ ناصر عباس جعفری کا اظہار افسوس ،ملک و قوم کے لیے جانوں کا نذرانہ پیش کرنے والوں کی قربانیاں ناقابل فراموش ہیں۔ فوجی نوجوانوں کی شہادت پر سوگواران کی خدمت میں ہدیہ تعزیت وتسلیت پیش کرتا ہوں،بلوچستان میں دو ماہ کے دوران دوسرا بڑا فضائی حادثہ تشویشناک ہے،پاک فوج کے جوان قیمتی اثاثہ ہیں۔حادثات کے محرکات کا تدارک ضروری ہے۔

وحدت نیوز(کراچی) مجلس وحدت مسلمین پاکستان کراچی ڈویژن کے زیر اہتمام یوم شہادت حضرت  امام حسنؑ کی مناسبت سے وحدت ہاؤس انچولی میں مجلس عزا کا انعقاد کیا گیا، جس سے نجف اشرف سے آئے مہمان عالم دین علامہ حیات عباس نجفی نے خطاب کیا۔ انہوں نے کہا کہ امام حسن (ع) کا ہر عمل حکمت و دانش سے بھرپور اور ہر قول اپنے اندر علم کے خزانے سمیٹے ہوئے تھا، آپؑ سراپا حق و صداقت تھے۔ انہوں نے اپنے عمل سے یہ ثابت کیا کہ ظاہری جاہ و منصب سے تو دستبرداری اختیار کی جاسکتی ہے لیکن راہ حق سے ایک لحظے کے لئے بھی پیچھے نہیں ہٹا جا سکتا۔ انہوں نے کہا کہ امام حسن علیہ السلام نے سیاسی تدبر اور حکمت عملی سے اپنے محبین کو ان کی جانوں اور ناموس کو تحفظ فراہم کیا، امام (ع) کی سیرت سے ہمیں یہ درس ملتا ہے کہ اپنی قوم کی جانوں کا دفاع ہر عہدے اور ہر اختیار پر مقدم ہے۔

ان کا مزید کہنا تھا کہ حکومت کے ہر تعلق ہر عہدے سے دستبردار تو ہوا جا سکتا ہے لیکن قوم کے حقوق کی پاسداری سے ایک انچ بھی پیچھے نہیں ہٹا جا سکتا۔ انہوں نے کہا کہ قوم کی اپنے رہبر کے ہمراہ میدان عمل میں موجودگی مقصد کی کامیابی کی ضمانت سمجھی جاتی ہے، وہ قوم کبھی باوقار مقام نہیں حاصل کر سکتی جو عمل سے کترائے اور زبانی جمع خرچ سے منزل کی جستجو کرے، اگر قوم وفا نہ کرے تو امام حسن علیہ السلام جیسے عظیم رہنما کو بھی تنہائی کا صدمہ جھیلنا پڑتا ہے اور دشمن کو اپنے مکر و فریب میں کامیابی حاصل ہوتی ہے، حق بات پر استقامت دکھانا اہل بیت اطہار علیہم السلام کا شعار ہے، ہم مظلوم کے حمایتی اور ظالم کے ہمیشہ مخالف رہیں گے۔ مجلس عزا میں علامہ صادق جعفری، ملک غلام عباس، مولانا نشان حیدر سیمت کثیر تعداد میں کارکنان و عزاداران نے شرکت کی۔