The Latest
وحدت نیوز(لاہور)مجلس وحدت مسلمین شعبہ خواتین کی مرکزی سیکرٹری جنرل و رکن پنجاب اسمبلی سیدہ زہرا نقوی نے کہا کہ بھارت کی ریاستی دہشت گردی عروج پر ہے کشمیر بھی فلسطین کی طرح جل رہا ہے امریکہ اور مغرب کی حکومتیں بھارت کو دنیا کی نمبر ایک جمہوریت قرار دیتے ہیں یہ مغربی دنیا کی حکومتوں کا دوہرا معیار ہے جو فلسطین کے بعد کشمیر میں نظر آتا ہے۔
انہوں نے کہا کشمیر میں بے گناہ قتل ہورہے ہیں معصوم بچوں کو درندگی کا نشانہ بن رہے ہیں اور خواتین کی عصمت دری کی جارہی ہے لیکن انسانی حقوق کی مغربی تعریف بھارت جیسے ریاستی دہشتگرد کے لیے علیحدہ بنائی گئی ہے۔ انہوں نے کہا مغربی کی حکومتوں نے اپنے اسی دوہرے معیار کی بدولت دنیا بھر میں نہ صرف ذلت اور رسوائ حاصل کی ہے بلکہ دنیا کی تمام اقوام اور بالخصوص خود مغربی دنیا کی غیور اور با شعور عوام بھی اپنی ان حکومتوں اور ان کی دوہری پالیسیوں کی وجہ سے نفرت کرتے ہیں۔
ان کا مذید کہنا تھا خطے میں امن کے قیام کے لیے مسئلہ کشمیر کا حل ہونا لازم ہے کشمیری عوام اپنا حق خودارادیت حاصل کرنے کے لیے ہمیشہ سے قربانیاں دیتے آئے ہیں لیکن اپنے حق سے پیچھے نہیں ہٹے ان شاء اللہ وہ دن اب دور نہیں جب ظلمت کے اندھیرے چھٹیں گے ظالم رسوا اور تباہ ہونگے اور مظلومین جہاں کو غلبہ اور طاقت حاصل ہوگی۔
وحدت نیوز(لاہور)مجلس وحدت مسلمین شعبہ خواتین لاہور کی جانب سے چیمبر الیکشن آفس جیل روڈ لاہور میں سیرت النبی ص کانفرنس کا انعقاد کیا گیا کانفرنس کا آغاز اور نظامت کے فرائض ایم ڈبلیو ایم شعبہ خواتین لاہور کی سیکرٹری جنرل محترمہ حنا تقوی نے انجام دیے جبکہ مرکزی سیکرٹری جنرل ایم ڈبلیو ایم شعبہ خواتین و رکن پنجاب اسمبلی محترمہ سیدہ زہرا نقوی نے کانفرنس کی صدارت کی اور خصوصی خطاب کیا ۔
محترمہ نجبہ علوی نے کانفرنس کا باقاعدہ آغاز تلاوت کلام پاک سے کیا بعد ازاں محترمہ افشاں اور محترمہ حلیمہ نے شان رسالت مآب ص میں نذرانہ عقیدت پیش کیے ذات گرامی جناب محمد مصطفی صل اللہ علیہ وآلہ وسلم کے ذکر سے منور اس محفل میں شہر لاہور کی نامور شخصیات نے شرکت کی اور خطاب کیا سیرت النبی ص کانفرنس سے معلمات میں محترمہ عصمت زہرا، محترمہ معصومہ محقق ، محترمہ فرحانہ فصاحت ، ڈپٹی سیکرٹری جنرل ایم ڈبلیو ایم شعبہ خواتین لاہور محترمہ عظمی نقوی ، محترمہ نسیم زہرا ، فلحیہ نقوی اور زینب حسنین جبکہ پروفیشنلز میں سے ڈاکٹر معصومہ ، محترمہ فاطمہ قمر پریذیڈنٹ اردو تحریک ، محترمہ روزی رضوی جرنلسٹ ایجوکیشنل اور محترمہ ثنا پولیٹیشن نے خطاب کیا۔
تمام مقررین نے نے سیرت مبارکہ رسول دو عالم ص کو مشعل راہ قرار دیتے ہوے معاشرے میں امن ، اتحاد رواداری اور بھائ چارے کے جذبے کو فروغ دینے کی ضرورت پر زور دیا ، مقررین کا کہنا تھا کہ آج عالم اسلام ایک کٹھن دور میں داخل ہوچکا ہے صیہونی اور طاغوتی طاقتیں دیں اسلام کو زک پہنچانے کے لیے سرگرم عمل ہیں جبکہ مسلمان نہ صرف خواب غفلت میں گھرے ہوئے ہیں بلکہ بدترین تفرقے کا شکار ہیں تمام مسالک کے علماے کرام حکم قرآن اور تعلیمات نبوی کے مطابق عوام کی راہنمائی کریں اور وحدت کی فضا قائم کریں۔
کانفرنس میں مختلف شعبہ ہائے زندگی سے تعلق رکھنے والی شخصیات نے شرکت کی جن میں انٹیلیجنس آفیسر محترمہ ثمینہ ، ائیرفورس سے منسلک محترمہ ہما ، سی ای او ڈور آ اوئیرنس محترمہ رباب، محترمہ راحیلہ بزنس وومن ، اور محترمہ بشری انیس پرنسپل لائزیم سکول شامل ہیں ۔اس عمدہ کانفرنس کے انعقاد کے انتظامات و مہمانان گرامی کی خاطر تواضع میں ایم ڈبلیوایم شعبہ خواتین لاہور کی کابینہ اراکین محترمہ نیر زہرا نقوی ،محترمہ عالیہ رضوی، محترمہ عندلیب ،محترمہ رضوانہ اور محترمہ ساجدہ نے بہترین خدمات انجام دیں۔
بنی کریم ؐ کے فرزند امام جعفرصادقؑ اپنےجد محمد مصطفیٰ ؐ کے فضائل وکمالات کے وارث ہیں، سیدہ زہرا نقوی
وحدت نیوز(لاہور) میلاد با سعادت جناب ختمی مرتبت حضرت محمد صل اللہ علیہ وآلہ وسلم و فرزند رسول خدا (ص) امام جعفر صادق علیہ سلام کے پر مسرت موقع پر حجت حق آقا امام زمان عج و تمام مسلمانان عالم کی خدمت میں ھدیہ تبریک و تہنیت پیش کرتی ہوں پیغمبر اکرم حضرت محمد مصطفی (ص)کی ذات اقدس ، خداوند عالم کا مکمل آئینۂ جمال و کمال ہے اور پرودگارعالم نے کہ جوتمام خوبیوں اور اچھائیوں کا خالق ہے اپنی عظیم کتاب قرآن مجید میں اپنے اس عظیم پیغمبر(ص)کی مدح و ثنا کرتے ہوئے انہیں تمام مخلوقات عالم کے لئے باعث رحمت قرار دیا ہے آپ (ص) کے فرزند امام جعفر صادق علیہ سلام آپ کے فضائل و کمالات کے وارث ہیں ان خیالات کا اظہار مرکزی سیکرٹری جنرل ایم ڈبلیو ایم شعبہ خواتین و رکن پنجاب اسمبلی محترمہ سیدہ زہرا نقوی نے 17 ربیع الاول روز ولادت صادقین (ع) کے موقع پر جاری ایک بیان میں کیا۔
انہوں کہا رسول رحمت صلی اللہ علیہ وسلم کی زندگی دنیائے بشریت کے لئے اسوئہ حسنہ اور الٰہی فیوض و ہدایات و احکام کا ایسا مفید وگہرا چشمہ ہے جو کبھی خشک ہونے والا نہیں ہے آپ صلی اللہ علیہ وسلم کی زندگی نورخداوندی کا ایسا مرکز ہے جہاں تاریکی کا گذر نہیں اور مکروفریب کی تاریکیوں سے بھری ہوئی اس دنیا میں زندگی بسر کرنے والے لوگ اگر سیرت نبوی کو اپنے لئے نمونہٴ عمل بنالیں تو دنیا و آخرت کی کامیابی ان کے قدم چومے گی انہوں نے کہا رسول اللہ (ص) کے فرزند امام جعفر صادق علم و کمال ، اخلاق کردار اور سیرت و عمل میں اپنے جد کی شبیہ تھے آپ علیہ سلام کے زمانے کو علمی اِرتقاء اور ترقی کا زمانہ کہا جاسکتا ہے کیونکہ عوام و خواص ہر ایک اس زمانے میں تحصیلِ علم کی طرف متوجہ تھا۔ اور اس زمانے کا ماحول کاملاً اسرارِ قرآنی کی تبلیغ اور انکشاف کے لئے سازگار تھا۔
ان کا کہنا تھا امام جعفر صادق علیہ السلام سے کسب فیض کرنے والے شاگردوں کی تعداد ہزاروں میں ہے جن میں ہر مکتب فکر سے تعلق رکھنے والے لوگ شامل ہیں انہوں نے مزید کہا ملت اسلامیہ اسی وقت اپنا کھویا ہوا مقام حاصل کر سکے گی جب وہ سیرت محمد و آل محمد ص کے مطابق اپنی زندگیوں کو ڈھالے اور انکے نقش قدم پر چلتے ہوے معاشرے میں اپنا کردار ادا کریں گی۔
پیغمبر اعظم ص مرکز وحدت مسلمین کانفرنس کے حوالے سے گفتگو کرتے ہوئے انہوں نے کہا آج امت مسلمہ جس زبوں حالی اور کسمپرسی کا شکار ہے اس کی وجہ اتحاد و وحدت کا فقدان اور اختلافات کا دشمنی میں بدل جانا ہے وقت کی ضرورت ہے ایسی عظیم الشان کانفرنسز اور اجتماعات منعقد کیے جائیں تاکہ شیعہ سنی وحدت قائم کی جاسکے انہوں نے تمام شیعہ سنی مرد و خواتین سے اپیل کی کانفرنس میں اپنی شرکت کو یقینی بناتے ہوے ملی وحدت و یکجہتی کے لیے اپنا عملی کردار پیش کریں۔
وحدت نیوز(لاہور) جشن عید میلاد النبی صل اللہ علیہ وآلہ وسلم کے پر مسرت موقع پر مجلس وحدت مسلمین شعبہ خواتین کی مرکزی سیکرٹری جنرل و رکن پنجاب اسمبلی محترمہ سیدہ زہرا نقوی نے اپنے تہنیتی پیغام میں کہا کہ پیغمبر اسلام (ص)کی شخصیت عالم خلقت کا نقطہ کمال اور عظمتوں کی معراج ہے۔ آپ صلی اللہ علیہ وآلہ وسلم کی شخصیت ایسی ہمہ گیر اور جامع شخصیت ہے کہ اس کے تمام پہلؤں کا احاطہ ناممکن ہے۔
انہوں نے کہا عید میلاد النبی ص کا جشن شایان شان انداز اور دینی جوش و جزبہ کیساتھ منانا چاہیے لیکن اس مناسبت کا سب سے اہم پہلو سیرت نبوی (ص) کو زندہ کرنا ہے عید میلاد النبی ص کی محافل میں تعلیمات و سیرت رسول اللہ صل اللہ علیہ وآلہ وسلم بیان کی جاے جو کہ اسلامی معاشرے کی تربیت کے لیے ناگزیر ہیں۔
انہوں نے کہا کہ مسلم امہ کے لئے اہم ہے کہ وہ اسلام اور پیغمبر(ص)کی زیادہ سے زیادہ شناخت و معرفت حاصل کریں، آج دنیائے اسلام کا سب سے بڑا درد فرقہ واریت ہے عالم اسلام کی یکجہتی اور اتحاد کا محور پیغمبراسلام(ص)کا مقدس وجود ہے جن پر تمام مسلمانوں کا ایمان ہے اور جو تمام انسانوں کے احساسات کا مرکزی نقطہ ہیں۔
ان کا مذید کہنا تھا امام خمینی رضوان اللہ علیہ نے بارہ تا سترہ ربیع الاول کو ہفتہ وحدت کا عنوان دیا جسکا مقصد یہ ہے کہ امت مسلمہ اپنی صفوں میں اتحاد پیدا کرے محبت اور بھائی چارے کے جذبے کو فروغ دے مسلمانوں کو ایک دوسرے کے مدمقابل لانے والی طاغوتی قوتیں پوری طرح سرگرم ہیں ان باطل پرستوں کو شکست دینے کا واحد ذریعہ اتحاد امت ہے۔ ان کا مذید کہنا تھا کہ یہ شیعہ سنی علماء و مشائخ کی ذمہ داری ہے کہ قوم کی فکری و شعوری تربیت کریں اور تعلیمات محمدی ص اس تاریک معاشرے کو منور کریں۔
وحدت نیوز(اسلام آباد)عشق پیغمبر اعظم مرکزوحدت مسلمین کانفرنس جہاں برادران اس پروگرام کو کامیاب بنانے کے لئے دن رات ایک کیے ہوئے ہیں وہیں مجلس وحدت مسلمین پاکستان کی خواہران بھی اپنی تنظیمی اور اخلاقی ذمہ داری سمجھتے ہوئے اپنے برادران کے ہمراہ اس عظیم اجتماع کی کامیابی کے لئے پیچھے نہیں ۔
مجلس وحدت مسلمین پاکستان شعبہ خواتین کے ایک مرکزی وفد جس میں ضلع راولپنڈی اور اسلام آباد کی فعال خواہران شریک تھیں ،نے مجلس وحدت مسلمین پاکستان کے مرکزی ڈپٹی سیکریٹری جنرل برادر ناصر عباس شیرازی سے مرکزی سیکریٹریٹ اسلام آباد میں ملاقات کی برادر ناصر عباس شیرازی نے خواہران کے وفد کو عشق پیغمبر اعظم مرکزوحدت مسلمین کانفرنس کے حوالے سے اور اس کی ضرورت اور اہمیت کے بارے بریف کیا اور کہا کہ اس عظیم پروگرام میں خواہران کی شرکت بےحد ضروری ہے ۔ کم از کم 500 کے قریب خواتین اس پروگرام میں شریک ہوں اور وہ آپ کی ہمت اور کاوش سے ممکن ہے ۔ 3000 افراد کے لگ بھگ کنونشن سنٹر اسلام آباد میں لوگوں کے بیٹھنے کی گنجائش ہے ۔لہذا خواتین اس پروگرام میں بھرپور شریک ہوں ۔
خواہران کی جانب سے محترمہ نرگس سجاد مرکزی سیکریٹری سیاسیات وتربیت نے یقین دلایا کہ جو خواہران آج یہاں پر موجود ہیں وہ سب فعال خواہران ہیں اور ہم نے اس سلسلے میں اپنی فعالیت کا آغاز کر دیا ہے ۔ ان شاءاللہ جس ہستی کے نام پر پاکستان کی تاریخ میں پہلی مرتبہ یہ اتنا بڑا وحدت واتحاد کا اجتماع ہونے جا رہا ہے۔اسی ہستی کے صدقے ہم اپنی تمام تر توانائیوں کو بروئے کار لاتے ہوئے خواتین کی شرکت اور دیئے گئے 500 کے ٹاسک کو پورا کریں گی ۔بلکہ امید سے زیادہ شرکت ہوگی ان شاءاللہ۔
خواہران کے اس وفد میں خواہر بینا شاہ مرکزی آفس سیکریٹری ،خواہر قندیل زہراء مرکزی سیکریٹری یوتھ ، خواہر کنیز فاطمہ صوبائی سیکریٹری گلگت بلتستان کے علاوہ راولپنڈی اور اسلام آباد کی ذمہ دار خواہران بھی اس ملاقات میں موجود تھیں ۔ آخر میں ناصر عباس شیرازی نے خواہران کے عزم وحوصلے کو سراہا اور اطمینان کا اظہار کیا ۔اور شکریہ ادا کیا ۔
وحدت نیوز(کراچی)المجلس ڈیزاسٹرمینجمنٹ سیل شعبہ فلاح وبہبودمجلس وحدت مسلمین کراچی ڈویژن کے ڈائریکٹر سید زین رضا رضوی نے کہا ہے کہ سالہائے گذشتہ کی طرح اس سال بھی اے ڈی ایم سی کراچی بھرمیں جشن عید میلاد النبی ؐ کے موقع پر استقبالیہ کیمپس اور سبیلوں کا اہتمام کرے گی۔
انہوں نے کہا کہ سربراہ ایم ڈبلیوایم قائد وحدت علامہ راجہ ناصرعباس جعفری کی خصوصی ہدایت پر شہر قائد کے تمام اضلاع میںلگائےگئے استقبالیہ کیمپس اور سبیلوں پر کارکنان وعہدیداران شرکائے جلوس میلادالنبیؐ کابھرپور استقبال کریں گے اور ان کی ٹھنڈے مشروبات اور نیاز سے تواضع کریں گے۔
وحدت نیوز(لاہور) مجلس وحدت مسلمین شعبہ خواتین کی مرکزی سیکرٹری جنرل اور رکن پنجاب اسمبلی سیدہ زہراء نقوی نے عظیم سائنسدان و محسن پاکستان ڈاکٹر عبدالقدیر خان کے انتقال پر گہرے دکھ کا اظہار کرتے ہوئے کہا ہے کہ پاکستان کو ایٹمی قوت اور ناقابل تسخیر بنانے والے ملک و قوم کے محسن ڈاکٹر عبدالقدیر خان کی رحلت پر ہر دل غمزدہ اور ہر آنکھ اشک بار ہے، انہوں نے ملک و قوم کے لیے عظیم خدمات انجام دیں، آج پاکستان کا دفاع ناقابل تسخیر ہے تو یہ ڈاکٹر عبدالقدیر خان مرحوم کے انتھک محنت اور عظیم جدوجہد کا نتیجہ ہے۔
انہوں نے کہا کہ پاکستان کو عالمی سطح پر استحکام دینے اور ایٹمی قوت بنانے والے ڈاکٹر عبدالقدیر خان اور ان کی ٹیم کو ہمیشہ قومی ہیرو کے طور پر یاد رکھا جائے گا۔ انہوں نے مزید کہا کہ ڈاکٹر عبدالقدیر خان کی وفات ملک و قوم اور ان کے اہلخانہ کے لیے ناقابل تلافی نقصان ہے۔ رنج و غم کی اس گھڑی میں سوگوار خاندان کے ساتھ برابر کے شریک ہیں اور خداوند عالم سے دعاگو ہیں کہ مرحوم کی بے لوث خدمات کی بدولت انہیں اجر کثیر عطا فرمائے اور ان کی اگلی منازل آسان فرمائے۔
وحدت نیوز(اٹک) بی بی زینب ع ایسی شخصیت کی مالک ہیں کہ انہوں نے امام حسین علیہ السلام کی شہادت کے بعد پیام حق دنیا تک پہنچایا اور شہادت امام حسین علیہ السلام کی قربانی کا مقصد بیان کیا ۔محترمہ چمن بی بی نے مجلس وحدت مسلمین شعبہ خواتین شین باغ یونٹ ضلع اٹک کے زیر اہتمام منعقدہ مجلس عزا بسلسلہ شہادت حضرت زینب ع سے خطاب کرتے ہوئےکہا کہ دور حاضر میں ہم خواتین کو کردار زینبی پر عمل پیرا ہوتے ہوئے زندگی بسر کرنی چاہیے تاکہ امام وقت کے ظہور کے لیے زمینہ سازی کی جاسکے،مجلسِ کے آخر میں تابوت بی بی زینب ع بھی برآمد کروایا گیا۔
وحدت نیوز(لاہور) پنجاب اسمبلی کے اجلاس کے دوران پوائنٹ آف آرڈر پرمجلس وحدت مسلمین پاکستان شعبہ خواتین کی مرکزی سیکریٹری جنرل و رکن پنجاب اسمبلی سید زہرا نقوی نے وزارت اوقاف اور وزارت مذہبی امور پنجاب سے سوال کیا کہ سرکاری فہرست کے علاوہ موجودغیر رجسٹرڈ دینی مدارس کی تفصیلات سے ایوان کو آگاہ کیا جائےکہ وہ کس کی زیر نگرانی فعال ہیں؟
ان کا کہنا تھا کہ دینی مدارس میں رائج نصاب کی تفصیلات سے ایوان کو آگاہ کیا جائے، نفرت انگیزاور تکفیر آمیز مواد پر مشتمل نصاب کے حوالے سے بھی معززایوان کو آگاہ کیا جائے، انہوں نے کہا کہ پنجاب میں مزارات اولیاء کی سکیورٹی میں تو کافی بہتری آئی ہے لیکن مزارات کے اندر اور اطراف ایسے شرپسند عناصر کی موجودگی تشویش ناک ہے جو سادہ لوح زائرین کی برین واشنگ میں مصروف ہیںاور عوام کو دین کے نام پرگمراہ کرنے میں مصروف ہیں، جعلی پیر نفرت پھیلانے اور ایسے نظریات کے پرچارمیں مصروف ہیں جواولیائے کرام ؒ کی تعلیمات کے سراسر منافی ہیں۔
انہوں نے کہا کہ متعلقہ حکام اس پرتفصیلات سے آگاہ کریں اوران اعتراضات پر ایوان کو جواب دیں کہ حکومت نے اس حوالے سے کیا اقدامات اٹھائے ہیں، جس پر ایک سیکریٹری صاحب کے غیر اطمینان بخش جواب کے علاوہ کوئی جواب موصول نہیں ہوا۔
وحدت نیوز(لاہور) شہداے کربلا و نواسہ رسول (ص) امام حسین (ع) کے چہلم کے موقع پر مجلس وحدت مسلمین شعبہ خواتین کی مرکزی سیکرٹری جنرل و رکن پنجاب اسمبلی محترمہ سیدہ زہرا نقوی نے اپنے پیغام میں کہا کہ امام حسین علیہ سلام نے ریگزار کربلا میں یزیدی عزائم کو بے نقاب کرکے اسلام کو درپیش خطرات سے امت کو آگاہ کیا اور اپنی عظیم قربانی پیش کی جو کہ دین اسلام کی بقا کا باعث بنی آج بھی دنیا کے مختلف کونوں سے یزیدیت مختلف صورتوں میں سر اٹھا رہی ہے ہمیں حسینی بن کر ان یزیدی صیہونی اور استعماری سازشوں کا مقابلہ کرنا ہوگا ۔
انہوں نے کہا کہ دنیا کا ہر کلمہ گو حسینی ہے اس لئے اس کی ذمہ داری ہے کہ یزیدیت کے خلاف ایک دوسرے کے شانہ بشانہ کام کرے اور سیرت امام حسین علیہ سلام کو اپنے کردار پر نافذ کرتے ہوئے پیغام حسینیت دنیا کے کونے کونے میں پہنچائے ان کا کہنا تھا اربعین حسینی فقط سرزمین عراق تک محدود نہیں رہا بلکہ ایک عالمی نہضت و تحریک کی صورت اختیار کر گیا ہے اور پوری دنیا کے حسینی اربعین کے موقع پر ایک لشکر کی شکل میں گھروں سے باہر نکلتے ہیں اور یہ پیغام دیتے ہیں کہ ہم منتظر و آمادہ ہیں اس الہی رہبر و منجی عالم بشریت کے لیے جو اس پوری دنیا میں ظلم و جور کا خاتمہ کریں گے اور نظام عدل قائم کریں گے ۔
