وحدت نیوز(اسلام آباد)سینیٹ اجلاس سے خطاب کرتے ہوئے مجلس وحدت مسلمین پاکستان کے سربراہ سینیٹر علامہ راجہ ناصرعباس جعفری نے کہا کہ اسلام نے خواتین کو ان کے حقوق فراہم کیے ہیں اور اگر ہم خواتین کے وراثتی حق کو سلب کرتے ہیں تو ہم ظالم ہیں۔ خواتین پر ہونے والے مظالم کی بنیادی وجہ قانون کی حکمرانی کا فقدان ہے۔ تاریخ میں بدترین ظلم اس وقت غزہ کی مظلوم خواتین پر ہو رہا ہے اور ان پر ظلم ڈھانے والے وہی ہیں جو خود کو خواتین کے حقوق کے علمبردار کہتے ہیں۔ یاد رکھیں، کبھی بھی ظالموں پر اعتماد نہ کریں۔ امریکہ ہمیشہ اپنے مفادات کے لیے ہمیں استعمال کرتا ہے، اور ہمیں اپنی خودمختاری اس کے ہاتھ میں نہیں دینی چاہیے۔

انہوں نے مزید کہا کہ اس ملک کا ایک بڑا المیہ منافقت ہے۔ ضلع کرم کی صورت حال دیکھیں آج بھی وہاں ظلم ہو رہا ہے۔ 1500 دہشت گردوں نے وہاں کی خواتین اور عوام کو یرغمال بنا رکھا ہے۔ پاراچنار کی موجودہ صورت حال پاکستان میں ایک اور غزہ کی مانند ہے۔ ضلع کرم میں مجلس وحدت مسلمین کے تحصیل چیئرمین، مزمل فصیح، جو امن اور بھائی چارے کے سفیر تھے، کو جھوٹے دہشت گردی کے مقدمات میں قید کر دیا گیا ہے۔ ہمیںتمام مظلوموں کے حق میں بولنا چاہیے، چاہے وہ کسی بھی مکتبۂ فکر سے تعلق رکھتے ہوں ۔پاراچنار کے محاصرے کو چھ ماہ ہو چکے ہیں، لیکن صوبائی و مرکزی حکومت اور سیکیورٹی ادارے اس ظلم و بربریت کے ذمہ دار ہونے کے باوجود خاموش ہیں۔

وحدت نیوز(اسلام آباد) سفیرانقلاب ،بانی آئی ایس او پاکستان شہید ڈاکٹر محمد علی نقویؒ کی 30ویںبرسی کے موقع پر سربراہ مجلس وحدت مسلمین پاکستان سینیٹر علامہ راجہ ناصر عباس جعفری نے اپنےسماجی رابطے کے ایکس اکاؤنٹ سے تعزیتی پیغام جاری کیا ہے جس کا متن پیش خدمت ہے ۔

بسم اللہ الرحمن الرحیم

‏“وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ”

‏“اور جو لوگ اللہ کی راہ میں قتل کیے گئے انہیں ہرگز مردہ نہ سمجھو، بلکہ وہ زندہ ہیں، اپنے رب کے ہاں رزق پا رہے ہیں۔” (آل عمران: 169)

‏آج 7 مارچ، شہید ڈاکٹر محمد علی نقوی کی برسی کے موقع پر ہم اس عظیم رہنما کو خراجِ عقیدت پیش کرتے ہیں، جنہوں نے اپنی زندگی اسلام، حق و صداقت، اور مستضعفین کی خدمت کے لیے وقف کردی۔ شہید نقوی ایک فکر، ایک مشن، اور ایک نظریہ تھے، جو آج بھی نوجوانوں کے دلوں میں زندہ ہے۔

‏انہوں نے امامیہ اسٹوڈنٹس آرگنائزیشن کی بنیاد رکھ کر نوجوانوں کو بیداری، خودسازی اور سماجی خدمت کا درس دیا۔ وہ نہ صرف ایک مثالی انقلابی تھے بلکہ اتحادِ امت کے سچے داعی بھی تھے۔ ان کی شہادت ہمارے لیے ایک پیغام ہے کہ ہم بھی اپنی زندگی کو دینِ حق کی خدمت، علم کی روشنی پھیلانے، اور مظلوموں کے دفاع میں وقف کریں۔

‏شہداء کا خون کبھی رائیگاں نہیں جاتا، بلکہ وہ ایک ایسی روشنی ہے جو رہنمائی کرتی ہے اور آنے والی نسلوں کے لیے چراغ راہ بنتی ہے۔ آج ہم عہد کرتے ہیں کہ شہید محمد علی نقوی کے مشن کو جاری رکھیں گے ان شااللہ وطن عزیز کی سربلندی اور اسلام کی حقیقی تعلیمات کو عام کرنے میں اپنا کردار ادا کریں گے۔

‏اللّٰہ تعالیٰ شہید کے درجات بلند فرمائے اور ہمیں ان کے نقشِ قدم پر چلنے کی توفیق عطا کرے۔ الہی آمین!

‏شہداء کی یاد ہمیشہ زندہ رہتی ہے!

وحدت نیوز(جیکب آباد) مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ ماہ مبارک رمضان نزول قرآن کریم کا مہینہ ہے اور قرآن کریم نے ماہ مبارک رمضان کا تعارف نزول قرآن مجید سے کرایا ہے۔ ہمیں قرآن مجید اور آل محمد صلی اللہ علیہ و آلہ وسلم سے متمسک رہنا چاہئے یہی راہ نجات ہے۔ ان خیالات کا اظہار انہوں نے جامعۃ المصطفیٰ خاتم النبیین صلی اللہ علیہ وآلہ وسلم جیکب آباد میں ماہ مبارک رمضان اور شہدائے آزادی فلسطین سے تجدید عہد کے عنوان سے منعقدہ تقریب کی صدارت کرتے ہوئے کیا۔ تقریب میں حاجی شاہ مراد ڈومکی، انجینیئر عید محمد ڈومکی، احمد علی ٹالانی، زوار دلدار حسین گولاٹو، علامہ حاجی سیف علی ڈومکی، استاد عبدالفتاح، صحافی محمد صدیق ٹالانی و دیگر شریک ہوئے۔

اس موقع پر تقریب سے خطاب کرتے ہوئے علامہ مقصود ڈومکی نے کہا کہ ماہ مبارک رمضان کے آخری جمعہ کو پوری دنیا کے غیرت مند مسلمان یوم القدس کے طور پر مناتے ہیں۔ پوری دنیا کے مسلمان مسجد اقصٰی اور فلسطین کے وارث ہیں۔ ہم کسی غدار کو غزہ، مسجد اقصیٰ اور فلسطین کا سودا کرنے نہیں دیں گے۔ امریکا غزہ کے 47 ہزار مسلمانوں کے قتل عام کا براہ راست ذمہ دار ہے۔ صدر ٹرمپ کی جانب سے غزہ پر قبضے کا شیطانی منصوبہ کبھی کامیاب نہیں ہوگا۔ انہوں نے کہا کہ امریکہ، اسرائیل، برطانیہ و دیگر شیطانی طاقتوں نے شیعہ سنی کو لڑانے کے لئے اربوں ڈالر خرچ کئے۔ مگر شیعہ سنی کو لڑانے کا شیطانی منصوبہ ناکام ہو گیا۔ آج بھی شیعہ سنی مسلمان متحد ہیں۔ انہوں نے کہا کہ ہم شہدائے راہ حق شہید اسماعیل ہانیہ، سید حسن نصر اللہ اور شہید یحیٰ سنوار سے عہد کرتے ہیں کہ ان کے راستے پر چلیں گے۔ ان کا راستہ عزت و وقار اور کامیابی کا راستہ ہے۔

وحدت نیوز(جیکب آباد) مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ بلوچ من حیث القوم آل رسول (ع) کے طرف دار اور وفادار رہے ہیں۔ اہل بیت پیغمبر صلی اللہ علیہ وآلہ وسلم سے عشق اور محبت ایمان کی نشانی ہے۔ حضرت امام مہدی علیہ السلام پر ایمان امت مسلمہ کے درمیان متفقہ عقیدہ ہے۔ حضرت محمد مصطفیٰ (ص) نے منجی عالم بشریت حضرت امام مہدی علیہ السلام کے آنے کی بشارت دی۔ جس کا تذکرہ شیعہ اور سنی دونوں کتب احادیث میں موجود ہے۔ ان خیالات کا اظہار انہوں نے قادر پور میں ایک وفد کے ہمراہ کھوسہ قبائل کے سردار سخی عبدالرزاق خان کھوسہ سے ملاقات کے موقع پر گفتگو کرتے ہوئے کیا۔ علامہ مقصود ڈومکی نے ان کی والدہ کی وفات پر فاتحہ خوانی بھی کی۔ ملاقات میں سیاسی صورتحال اور دینی امور پر گفتگو ہوئی۔ انہوں نے اس موقع پر سردار سخی عبدالرزاق خان کھوسہ کو دیوبندی عالم دین مفتی نظام الدین شامزئی کی کتاب عقیدہ ظہور مہدی کا تحفہ بھی پیش کیا۔ اس موقع پر مجلس علمائے مکتب اہل بیت کے ضلعی صدر علامہ سیف علی ڈومکی، گل محمد خان ٹالانی و دیگر ان کے ہمراہ تھے۔

اس موقع پر گفتگو کرتے ہوئے علامہ مقصود علی ڈومکی نے کہا کہ حضرت امام مہدی علیہ السلام اپنے 313 اصحاب کے ساتھ آئیں گے۔ اصحاب بدر رضی اللہ عنہم اور حضرت طالوت علیہ السلام کے مخلص اصحاب کی تعداد کے برابر، ایسے 313 کہ زمین اور آسمان نے ایسے تین سو تیرہ انسان نہیں دیکھے ہوں گے۔ یہ اصحاب امام مہدی علیہ السلام تاریخ انسانی کے بے عیب اور بے مثال انسان ہوں گے، جو اپنی عظمت کردار حکمت دانائی شجاعت بہادری میں بے مثال اور اعلیٰ انسانی صفات کا عملی مظہر ہوں گے۔ انہوں نے کہا کہ جیکب آباد میں امن و امان کی صورتحال خراب ہے۔ سیاسی، سماجی، قبائلی، مذہبی رہنماؤں اور منتخب نمائندوں کو چاہئے کہ وہ عوامی مسائل پر آواز بلند کریں۔ اس موقع پر گفتگو کرتے ہوئے سردار سخی عبدالرزاق کھوسہ نے کہا کہ ہم آل محمد (ص) کے غلام اور پنجتن پاک (ع) سے محبت کرنے والے ہیں۔ آل رسول کا احترام ہمیں آباء و اجداد سے میراث میں ملا ہے۔ ہم حضرت غازی عباس علمدار علیہ السلام کے علم پاک سے عقیدت رکھتے ہیں۔ انہوں نے کہا کہ جیکب آباد کی سیاست میں ہمیں ایک دوسرے کے ساتھ مشاورت کے ساتھ اور ایک دوسرے کے ساتھ مل کر آگے بڑھنا ہے۔ انہوں نے کہا کہ یہ رابطہ اور مشاورت کا سلسلہ جاری رہے گا۔