The Latest

وحدت نیوز(جیکب آباد) جامع مسجد امام حسن مجتبیٰ ؑ جیکب آباد میں منعقدہ تقریب سے خطاب کرتے ہوئے مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ سردار قاسم سلیمانی امت مسلمہ کے ہیرو ہیں انہوں نے اپنے ساتھیوں کے ساتھ مل کر داعش جیسی دہشت گرد تنظیم کو عبرتناک شکست دی۔ امریکہ اسرائیل اور اس کے اتحادیوں کے ناپاک عزائم کو خاک میں ملا دیا ۔

انہوں نے کہا کہ عراق کے عظیم مجاہد کمانڈر ابو مہدی المہندس اور حشد الشعبی کے جوانوں کے ساتھ مل کر شہید سردار قاسم سلیمانی نے عراق میں موجود سامراجی دہشت گردوں کو شکست سے دوچار کیا اس لیے امریکا اور اس کے حواری جنرل قاسم سلیمانی سے خوفزدہ تھے اور انہوں نے رات کی تاریکی میں ایک بہادر جرنیل پر حملہ کرکے اسے شہید کردیا۔انہوں نے کہا کہ سردار قاسم سلیمانی نے جس مزاحمتی تحریک کا آغاز کیا تھا وہ ان کی شہادت سے ایک مکتب میں تبدیل ہوگئی ہے جو اس خطے سے امریکی سامراج کے مکمل خاتمے اور غاصب اسرائیل کی مکمل نابودی پر منتج ہوگی۔

انہوں نے کہا کہ جنرل قاسم سلیمانی کی پہلی برسی کے موقع پر پر پوری امت مسلمہ کو چاہیے کہ وہ اس اسلامی ہیرو کی خدمات اور جدوجہد کو خراج عقیدت پیش کریں جو اتحاد امت کا علمبردار مظلوموں کا حامی اور ظالموں کے لئے خوف کی علامت تھا۔ امریکہ کی خوشنودی کے لیے جس طرح سے عرب ممالک نے غاصب اسرائیل کو تسلیم کرنے کا سلسلہ شروع کیا ہے یہ امت مسلمہ سے خیانت کے مترادف ہے عالم اسلام کو آج بھی جنرل قاسم سلیمانی جیسے بہادر مجاہد کی ضرورت ہے جو شیعہ سنی مسلمانوں کو اکھٹا کرکے اسلام دشمن سامراجی قوتوں کے جارحانہ اور غاصبانہ عزائم کو ناکام بنا دے۔

اسرائیل از نظر قرآن

وحدت نیوز(آرٹیکل) ہر مسلم کی زندگی کا آئین قرآن ہے اور اس آئین کی اولین شق یہی ہے کہ ایک ایسا معاشرہ تشکیل دیا جائے جس میں ظلم و زیادتی کا سد باب ہو.انبیاء کرام کی بعثت کا مقصد بھی ایسے ہی متوازن معاشرے کا قیام تھا جسمیں ہر ایک کے حقوق کی پاسداری ہو اور معاشرے میں امن وسلامتی رواج پائے.موجودہ اسرائیل میں ان یہودیوں کی نسلیں آباد ہیں جو اللہ کے بھیجے ہوئے انبیاء کو قتل کرنے میں عار محسوس نہیں کرتے تھے تو ان جلادوں کی نظر میں بے گناہ فلسطینیوں کا قتل عام کیا حیثیت رکھتا ہے۔ ان کی رگوں میں فرعون کا لہو گردش کر رہا ہے۔ قرآن پاک نے ان جلادوں کی تاریخ کو بے نقاب کیا ہے۔ قرآن پاک میں بنی اسرائیل کی عبرتناک کہانیوں کے مخاطب اس وقت کے کفار مکہ تھے اور آج بھی مدعا یہ ہے کہ جو شخص ، گروہ یا قوم قرآن سے سبق حاصل نہ کرے اور راہ راست پر نہ آئے تو اسے پھر ان سزاؤں کے لئے تیار رہنا چاہئے جو بنی اسرائیل نے بھگتی تھیں مگر یہ بھی تاریخ کا ہی حصہ ہے کہ ظالموں کے ساتھ مظلوم بھی مارے جاتے ہیں۔ بنی اسرائیل پر بہت زیادہ عذاب اور زوال آئے اور ہر بار اللہ تعالیٰ نے انہیں مہلت بخشی۔

 حضرت مسیحؑ کی پیدائش سے ایک سو ستر سال پہلے یہ واقعہ پیش آیا کہ ایک بادشاہ نے یہودیوں کو پانچویں مرتبہ برباد کر کے رکھ دیا۔ ان کے علاقے پر چڑھائی کر دی، چالیس ہزار یہودیوں کو قتل کیا، چالیس ہزار کو قیدی اور غلام بنا کر اپنے ساتھ لے گیا اور مسجد اقصیٰ کی پانچویں مرتبہ بے حرمتی کی گئی۔ اسرائیلیوں کے اعمال بد اور نافرمانیوں کی وجہ سے ہیکل سلیمانی کی بے حرمتی کا سلسلہ جاری رہا۔ کچھ عرصہ بعد بیت المقدس پر سلاطین روم کی حکومت قائم ہو گئی، انہوں نے مسجد کو پھر درست کیا اور اس واقعہ کے آٹھ سال بعد حضرت عیسٰیؑ پیدا ہوئے۔ حضرت عیسٰیؑ کے دنیا سے اٹھائے جانے کے چالیس برس بعد یہ واقعہ پیش آیا کہ یہودیوں نے حسب فطرت اپنے حکمران سلاطین روم سے بھی بغاوت کر ڈالی، رومیوں نے شہر اور مسجد تباہ کر کے وہی حالت بنا دی جو پہلے تھی۔ یہاں تک کہ خلیفہ وقت نے اس کی تعمیر کروائی۔ بیت المقدس پر یہودیوں کا قبضہ اور مسلمانوں کا بے دریغ قتل نام نہاد اُمتِ مسلمہ کی نافرمانیوں اور گناہوں کا نتیجہ ہے. جب عذاب نازل ہوتے ہیں تو گُھن کے ساتھ گیہوں بھی پستا ہے۔

 مقام عبرت ہے کہ ڈیڑھ ارب کی تعداد میں مسلمانوں پر چند لاکھ یہودی غالب آ گئے۔ اِنا للہ و اِنا اِلیہ راجعون۔ مسلمانوں پر ایک ایسی قوم غالب آ گئی جو دنیا میں سب سے زیادہ ذلیل و خوار سمجھی جاتی ہے۔ اس پر مزید یہ کہ یہ قوم نہ تعداد میں مسلمانوں کے ہم پلہ ہے اور نہ مال و اسباب میں مسلمانوں کے مقابلے میں کوئی حیثیت رکھتی ہے۔ آج فلسطین کے مسلمانوں پر جو مظالم ڈھائے جا رہے ہیں بجائے اسکے کہ مسلمان غیرت ایمانی کا اظہار کریں ، قرآنی اصول کو  اپنائیں ، اسرائیل(یہودی)ظالم ریاست سے تعلقات ختم کریں اور ان دشمنان خدا کو تنہا کر دیں اس ظالم ریاست کو تسلیم کیا جا رہا ہے اور اسکو مظلوم ثابت کر کے دنیا میں اسکے حقوق کی پائمالی کا ڈھنڈورا پیٹا جا رہا ہے. کبھی کوئی صحافی اسرائیل کی مظلومیت ثابت کرنے کی کوشش کرتا ہے تو کبھی کوئی مولانا اسرائیل کو تسلیم کروانے کی خاطر قرآن کی تفسیر بالرائے سے کام لیتا ہے جبکہ قرآن مجید میں یہود و نصاری کی مذمت واضح طور پر موجود ہے ارشاد ہوتا ہے "یا ایھا الذین آمنو لا تتخذوا اليهود و النصاری اولیاء بعضهم اولیاء بعض" (اے اہل ایمان یہود و نصاری کو کبھی دوست نا بنانا وہ ایک دوسرے کے دوست ہیں تمہارے دوست ہرگز نہیں بن سکتے.)

اسی تناظر میں کہ یہودیت ہمیشہ سے اسلام اور امن کیلئے اوچھے ہتھکنڈے اپناتی رہی ہے مگر کبھی مسلمانوں کیلئے نرم گوشہ نہیں دکھایا. افسوس ہوتا ہے جب امت مسلمہ اپنی ذاتی خواہشات کی خاطر یہودیت کی طرف دوستی کا ہاتھ بڑھاتی ہے.آیت کا اگلا حصہ ان لوگوں کی سرزنش کر رہا ہے جو یہودیوں کے ساتھ تعلقات بنانے کو اپنی عزت افزائی اور اپنی ملکی ترقی کا راز سمجھتے ہیں. ارشاد باری تعالی ہے "ومَن یتولهم منكم فانه منهم" جو یہود و نصاری کو دوست بناۓ گا وہ انہی میں سے ہوگا. یہ قرآنی اصول ہے کہ لاکھ کلمے پڑھتا رہے اور خدمت دین کی باتیں کرتا رہے اگر یہود و نصاری کیطرف دوستی کا ہاتھ بڑھاتا ہے تو وہ درحقیقت انہی میں سے ہے.

 بقول علامہ اقبال (رہ):

بادہ آشام نئے ‘ بادہ نیا ‘خم بھی نئے
حرم کعبہ نیا‘بت بھی نئے‘تم بھی نئے.

جو یہود کے ہم نوالہ و ہم پیالہ بننے کے خواہاں ہیں درحقیقت انہوں نے بیت اللہ کو کعبہ نہیں مانا بلکہ اپنا قبلہ و کعبہ یہود کو قرار دیا ہے اور اسی کے گرد طواف کو اپنا دھرم سمجھتے ہیں.اگر حرم خدا کی عزت و ناموس کا پاس رکھا جاتا تو اسطرح دنیا میں یہود و نصاری گردی نا ہوتی۔

تحریر:مرتجز حسین بلوچ

وحدت نیوز(گلگت)مجلس وحدت مسلمین کے مرکزی معاون سیکرٹری شعبہ تربیت و رکن تنظیم ساز کونسل جناب شیخ جان حیدری اور مرکزی تربیتی کونسل کے رکن جناب ڈاکٹرمشتاق حکیمی نے ایم ڈبلیو ایم شعبہ خواتین گلگت کی سیکرٹری جنرل محترمہ سائرہ ابراہیم سے ان کی رہائشگاہ پر ملاقات کی اس موقع پر صوبائی رہنما برادر محمد ابراہیم بھی موجود تھے ۔

ملاقات میں گلگت میں شعبہ خواتین کے تنظیمی سٹرکچر کو مضبوط بنانے اور خواہران کے لیے مختلف پراجیکٹس پر کام کرنے کے حوالے سے گفتگو کی گئی نشست میں شرکاء نے اظہار خیال کرتے ہوئے کہا کہ ایم ڈبلیو ایم مذہبی اور سیاسی جماعت ہے لھذا خواتین کو بھی دینی اور سیاسی میدان میں سرگرم اور فعال رہنے کی ضرورت ہے۔

 اس موقع پر محترم جان حیدر ی صاحب نے کہا کہ 23 مارچ کو ورکر کنوشن منعقد کیا جاۓ گا جسے کامیاب بنانے کے لیے مل کر کام کرنا ہوگا۔ محترمہ سائرہ ابراہیم نے گلگت میں انجام دی گئی گزشتہ سات سال کی کارکردگی پیش کی۔

وحدت نیوز(لاہور)حضرت عیسیٰ علیہ السلام کی ولادت کے موقع پر مجلس وحدت مسلمین شعبہ خواتین لاہور کے وفد نے گیٹ فار نیشین چرچ ماڈل ٹاون لاہور میں ہونے والی کرسمس جی تقریب میں بھر پور شر کت کی چرچ کے چیئرمین صادق پال جو کہ اس وقت آسٹریلیا میں ہیں ان کی خصوصی ھدایت پر وائس چیئرپرسن پروین اختر اور اسسٹنٹ پاسٹرنسیم برکت نے وفد کا بھرپور استقبال کیا۔

محتر مہ حنا تقوی سیکرٹری جنرل ایم ڈبلیو ایم وومن ونگ لاہور نے اس موقع پر اپنا پیغام دیتے ہوۓ کہا کہ ہم سب کو ایک دوسرے کی خوشیوں میں شریک ہو کر دنیا کو امن و آشتی کا گہوارہ بنانے کے لیے کردار ادا کرنا چاہیے۔ ان کا کہنا تھا کہ ہمیںخوشی ہے کے ہم آج اس قوم کے ساتھ کھڑے ہیں جنہوں نے عزاداری امام حسین علیہ السلام کے لیے اپنی عبادت گاہوں کے دروازے کھول دیے تھے۔

محترمہ عظمیٰ نقوی ڈ پٹی سیکرٹری جنرل اور محترمہ عالیہ رضوی سیکرٹری فلاح و بہبود نے مسیحی برادری کے ساتھ ان کی دعائیہ محفل میں شرکت کر کے ملک و قوم کی ترقی کی خصوصی دعا کی اور ایم ڈبلیو ایم کی جانب سے خواتین اور بچوں میں تحائف تقسیم کیے مسیحی برادری نے سال گزشتہ کی طرح اس سال بھی ایم ڈبلیوایم اورمحترمہ حنا تقوی کی کرسمس کے موقع پر کی گئی کاوشوں کو سراہا۔

وحدت نیوز(مشہد مقدس)مجلس وحدت مسلمین (مشہد مقدس ) کے زیراہتمام 25 دسمبر یوم پیدائش بانی پاکستان قائداعظم محمد علی جناح کے موقع پر موسسہ شہید عارف حسین الحسینی(دفتر مجلس وحدت مسلمین) میں تقریب منعقد ہوئی، جس کی صدارت سیکرٹری جنرل ایم ڈبلیو ایم مشہد مقدس حجتہ الاسلام والمسلمین آقائی عقیل حسین خان نے کی۔

جبکہ تقریب میں حجتہ الاسلام عارف حسین تھہیم، حجتہ الاسلام والمسلمین آزاد حسین، حجتہ الاسلام سید منور حسین نقوی، حجتہ الاسلام ظہیر عباس مدنی، حجتہ الاسلام مظہر عباس جوادی، راشد عباس، ملک رب نواز، ایزد علی خان اور سید عارف موسوی سمیت دیگر طلاب بھی موجود تھے۔

تقریب میں بانی پاکستان کی سالگرہ کا کیک کاٹا گیا، بانی پاکستان قائداعظم محمد علی جناح اور وطن عزیز پاکستان کی سلامتی سمیت عالم اسلام کے لیے خصوصی دعائیں کی گئیں۔

 تقریب کے شرکاء نے بانی پاکستان کے کردار اور نظریات پر روشنی ڈالی، رہنمائوں کا کہنا تھا کہ پاکستان ایک اسلامی ملک ہے جس نے ہمیشہ اسلامی ممالک کی حمایت اور ساتھ دیا، یہی وجہ ہے کہ آج بھی اسرائیل کے لیے ہماری نفرت سرعام ہے، ہمارے سبز پاسپورٹ پر اسرائیل سے نفرت کا اعلان درج ہے۔ ہم ہر ظالم کے خلاف ہیں اور ہر مظلوم کے حامی ہیں۔

وحدت نیوز(دیامر) منسٹر ایگریکلچر گلگت بلتستان و رہنما مجلس وحدت مسلمین گلگت بلتستان محمد کاظم میثم کی پاکستان تحریک انصاف گلگت بلتستان کے قائم مقام صدر شاہ ناصر سے ملاقات۔ملاقات میں سیاسی اور دیگر امور پر تبادلہ خیال کیا۔

شاہ ناصر نے مہمانوں کی میزبانی کرتے ہوئے کہا کہ وزرات زراعت کی طرف سے اپنے دورے کا آغاز دیامر سے بلخصوص تانگیر سے کرنا انتہائی نیک شگون ہے اور اس سے اندازہ ہوتا ہے کہ موجودہ حکومت کے اراکین بلخصوص وزیر زراعت علاقے کے ساتھ ہمدردی بھی رکھتے ہیں اور ویژن بھی رکھتے ہیں ساتھ ہی ساتھ محروم خطے کو محرومی سے نکالنے کے لیے پر عزم ہیں۔ہمیں اپنی حکومت کے اسٹریٹجی پر حمایتی ممبران پر فخر ہے اور ہمیں یقین ہے کہ ہماری حکومت ہی گلگت بلتستان کے دیرینہ مسائل حل کر کے دم لے گی۔

اس موقع صوبائی وزیر زراعت کاظم میثم نے کہا کہ پاکستان تحریک انصاف کے ویژن کی گلگت بلتستان میں عکاسی انشاء اللہ موجودہ حکومت کر کے دکھائے گی۔انہوں نے کہا کہ وزیر اعلیٰ بیرسٹر خالد خورشید اور انکی ٹیم میں اتنی توانائی،بصیرت اور صلاحیت موجود ہے کہ وہ گلگت بلتستان کے عوام کو محرومی سے نکالنے میں کلیدی کردار ادا کرے گی۔

انہوں نے مزید کہا کہ وزیر اعظم پاکستان نے بلین ٹری سونامی کے زریعے خطے میں انقلابی اقدام اٹھایا اور اس میں محکمہ زراعت کا بھی بڑا حصہ ہے۔محکمہ زراعت کی طرف سے علاقے کو ترقی کی راہ پر گامزن کرنے کے لئے انقلابی اقدامات اٹھا رہے ہیں اور دیامر ریجن میں محکمہ زراعت کی طرف سے بڑے پیمانے پر کام ہو رہے ہیں۔اس میں مزید تیزی اور بہتری لائی جائے گی تاکہ اس شعبے کے ذریعے روزگار میں اضافہ ہو اور علاقہ سر سبز و شاداب ہو۔

وحدت نیوز(تانگیر)منسٹر ایگریکلچر گلگت بلتستان و رہنما مجلس وحدت مسلمین گلگت بلتستان محمد کاظم میثم کی ڈپٹی جنرل سیکریٹری پاکستان تحریک انصاف دیامر محفوظ اللہ،جنرل سیکریٹری پاکستان تحریک انصاف تانگیر افتخار،ڈپٹی سیکریٹری جنرل تحریک انصاف تانگیر سلطان گل اور پاکستان تحریک انصاف کے دیگر ٹائیگرز کے ساتھ ملاقات۔تانگیر کے علاقائی اور زرعی مسائل پر گفتگو و شنید۔

تانگیر کے جوانوں کی طرف سے منسٹر ایگریکلچر کے دورے کو علاقے کے لئے نیک شگون قرار دیتے ہوئے خیر مقدم کیااور کہا کہ تانگیر کے عمائدین اور تحریک انصاف کے ٹائیگرز مل کر زرعی اصلاحات کے لئے اور زرعی شعبے میں انقلاب کے لئے جدوجہد کریں گے۔

انہوں نے مزید کہا کہ ہمیں فخر ہے کہ ہماری حکومت کی وزارت نے سب سے پہلے تانگیر کا اور اس محروم خطے کا دورہ کیا اور بلتستان کے عوام کا بھی شکریہ کہ انکے منتخب کردہ نمائندہ نے اپنے دورے کا آغاز تانگیر سے کیا اور انشاء اللہ ہمیں امید ہے کہ موجودہ حکومت گلگت بلتستان میں ہر شعبے میں انقلاب برپا کرے گی۔آخر میں منسٹر ایگریکلچر محمد کاظم میثم نے جوانوں کی جانب نے خیر مقدم اور نیک خواہشات کے اظہار پر شکریہ ادا کیا۔

وحدت نیوز(نگر) صوبائی وزیر زراعت کاظم میثم کی رہنما مجلس وحدت مسلمین گلگت بلتستان ڈاکٹر علی گوھر مرحوم کے سانحہ ارتحال پر لواحقین سے اظہار تعزیت کے لئے انکے رہائش گاہ آمد۔اس موقع پر مرحوم کے فرزندان اور دیگر لواحقین سے اظہار تعزیت کیا اور انکی بلندی درجاتِ کے لیے فاتحہ خوانی کی۔

صوبائی وزیر زراعت کاظم میثم نے کہا کہ جی بی کے لیے ڈاکٹر علی گوہر کی سماجی و مذہبی خدمات قابلِ داد ہیں۔ ان کے انتقال سے جی بی کی عوام ایسی شخصیت سے محروم ہو گئے ہیں جو قوم کا حقیقی درد رکھتی تھی۔ ان کی کمی کو کبھی پورا نہیں کیا جا سکتا۔ڈاکٹر علی گوھر کی خدمات کو مدتوں یاد رکھا جائے گا۔ مرحوم کی بلندی درجات اور پسماندگان کے صبر کے لیے دعاگو ہیں۔

وحدت نیوز(چلاس) صوبائی وزیر زراعت و رہنما مجلس وحدت مسلمین گلگت بلتستان محمد کاظم میثم کی گونر فارم چلاس آمد پر چلاس کے عمائدین،زعماء اور محکمہ زراعت کے سٹاف سے ملاقات۔

ملاقات میں گفتگو کرتے ہوئے صوبائی وزیر زراعت نے کہا کہ زراعت ہماری معیشت میں ریڑھ کی ہڈی کے مانند ہیں،زراعت کا پیشہ مقدس پیشہ ہے اور انبیاء علیہم السلام کا پیشہ رہا ہے۔زراعت کے زریعے جہاں پر ہم معاشی بہتری لا سکتے ہیں وہاں پر یہ نیکی اور حسنہ ہیں۔

انہوں نے مزید کہا کہ سر سبز و شاداب اور ہریالی کے لئے کمیونٹی اور متعلقہ محکمے کو پہلے سے زیادہ محنت کرنی پڑے گی تاکہ یہ علاقہ جو کہ زرعی میدان میں پوٹینشل رکھتا ہے زیادہ سے زیادہ مواقع سے استفادہ حاصل کر سکیں۔

وحدت نیوز(ملتان) ڈپٹی کمشنر ملتان محمد عامر خٹک، رکن صوبائی اسمبلی بیرسٹر وسیم خان بادوزئی،سی پی او ملتان میاں محبوب رشید، رہنما مجلس وحدت مسلمین جنوبی پنجاب انجینئر سخاوت علی نے کہا ہے کہ مسیحی برادری کے حقوق کے لئے حکومتی سطح پر اقدامات کئے جارہے ہیں قیام پاکستان کے موقع پر مسیحی برادری کی بیش بہا قربانیوں کو فراموش نہیں کیاجاسکتا مسیحی بھائیوں کو کرسمس تہوار کے موقع پر مبارکباد پیش کرتے ہیں مسیحی ہمارے بھائی ہیں اور ان کے حقوق اور مسائل کے حل کے لئے پاکستان میں عملی طور پر اقدامات کو یقینی بنایا جارہا ہے جبکہ ہمسایہ ملک میں اقلیتوں کے ساتھ ناروا سلوک اختیار کیاجارہا ہے پاکستان ایک پرامن ملک ہے اور اولیاء اللہ کی دھرتی ملتان محبتوں کا شہر ہے جہاں سے دنیا بھر میں اتحاد، اخوت، امن اور بھائی چارے کا پیغام جاتا ہے مسیحی برادری سمیت دیگر اقلیتی برادری ہمارے لئے قابل احترام ہے جو ملک وقوم کی سلامتی، ترقی و خوشحالی کے لئے اپنا کردار ادا کر رہے ہیں۔

ان خیالات کا اظہار انہوں نے کرسمس تہوار کے سلسلے میں کیتھولک چرچ میں کیک کاٹنے کی تقریب کے دوران کیا اس موقع پر بشپ یونس سہراب، بشپ ہولیڈک پول نے مہمانان کا شکریہ ادا کیا اور کہا کہ انہوں نے ان کے مذہبی تہوار کرسمس کے موقع پر ان کی خوشیوں میں شامل ہو کر ان کی حوصلہ افزائی کی جبکہ اس موقع پر تحفظ عزاداری حضرت امام حسین ؑ کونسل کے مرکزی صدر خاور شفقت بھٹہ ، طالب حسین پرواز حسین، علامہ مرتضی خان، سید حسنین رضا،سلیم خان گجر، ملک اسماعیل شجرا بھی موجود تھے ۔

Page 8 of 1090

مجلس وحدت مسلمین پاکستان

مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاء ہمارا نصب العین ہے 


MWM Pakistan Flag

We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree