The Latest

وحدت نیوز(لاہور) مجلس وحدت مسلمین شعبہ خواتین لاہور کی سیکرٹری جنرل محترمہ حنا تقوی نے ایام فاطمیہ کے سلسلے میں ٹاؤن شپ یونٹ، نادرآباد، سیکریٹریٹ اور جوہر ٹاؤن کے مقامات پر منعقد کردہ مجالس عزا سے خطاب کیا۔

محترمہ حنا تقوی کا کہنا تھا کہ سیدہ نساء العالمین نے دانش کدہ نبوت صلی اللہ علیہ وآلہ وسلم میں تربیت پائی اور بیت محمد صلی اللہ علیہ وآلہ وسلم میں پروان چڑھیں۔ دور حاضر میں جبکہ امت کی بیٹیاں تہذیب کفر کی نقل میں اپنی ناموس وعزت سے بے خبر ہورہی ہیں انہیں سیرت فاطمہ سلام اللہ علیہا کا مطالعہ کرنا چاہیے تاکہ وہ ایک آئیڈیل خاتون اسلام کی زندگی کے مطابق اپنے آپ کو ڈھال سکیں۔

وحدت نیوز(گلگت) مجلس وحدت مسلمین گلگت بلتستان کے سیکرٹری سیاسیات غلام عباس نے کہا ہے کہ سنچری ڈیل فلسطینی عوام کی تحریک مقاومت کو ختم کرنے کا بہانہ ہے۔ مسئلہ فلسطین کا واحد حل ارض فلسطین سے غاصب اسرائیل کا انخلاء ہے۔ فلسطینی عوام نے سنچری ڈیل کو مسترد کر دیا ہے۔ اسرائیل اور امریکہ کا پیش کردہ کوئی بھی منصوبہ فلسطینی عوام کے حق میں ہرگز نہیں۔

اپنے ایک بیان میں انہوں نے کہا کہ اسرائیل ایک غاصب حکومت ہے جس کے خاتمے سے ہی فلسطین کا مسئلہ حل ہو سکتا ہے۔ سنچری ڈیل فلسطینی عوام کو ان کی سرزمین سے بے دخل کرنے کا منصوبہ ہے جو کسی صورت قابل قبول نہیں ہو سکتا۔

انہوں نے کہا کہ وائٹ ہاؤس میں منعقدہ تقریب میں فلسطین کے کسی بھی نمائندے کو شرکت کی دعوت نہیں دی گئی جبکہ اس تقریب میں عمان، بحرین اور متحدہ عرب امارات کے سفیروں کی شرکت قابل مذمت ہے۔ مسئلہ فلسطین کا حل فلسطین کے عوام کی خواہشات کے مطابق ہونا چاہئے نہ کہ غاصب اسرائیل اور امریکہ کی مرضی کے مطابق۔

انہوں نے کہا کہ فلسطین میں نام نہاد قیام امن کیلئے امریکہ اسرائیل کی جانب پیش کردہ سنچری ڈیل مسئلہ فلسطین کو دبانے کا بہانہ ہے۔انہوں نے مزید کہا کہ دنیا بھر کے حریت پسند صدی کی اس نفرت انگیز ڈیل کے خلاف متحد ہو جائیں اور فلسطینی عوام کی حمایت اور غاصب اسرائیل کا فلسطین پر قبضہ چھڑانے اور بیت المقدس کی آزادی کیلئے صف آرا ہو کر صدی کی اس ڈیل کیخلاف آواز بلند کریں۔

وحدت نیوز(شکارپور) مجلس وحدت مسلمین پاکستان کے مرکزی رہنما علامہ سید حسن ظفر نقوی کی ڈکہن میں شہید طاہر عباس شاہ نقوی کی رہائش گاہ پر آمد، اس موقع پرانہوں نے عالمی اور ملکی صورتحال پر اہم پریس کانفرنس سے خطاب کرتے ہوئے کہا ہے کہ امریکہ کے اقدامات کی پوری دنیا نے مذمت کی پاکستان کے حکمرانوں میں اتنی بھی جرات نہیں ہے کہ امریکہ کے اس اقدامات کی مذمت کر سکیں۔

 علامہ حسن ظفرنقوی نے کہاکہ جنرل قاسم سلیمانی کی شہادت پر پاکستان کے حکمرانوں نے اظہار افسوس بھی نہیں کیا، انہوں نے مزید گفتگو کرتے ہوئے کہا کہ عوامی مسائل کا حل ہمارے حکمران طبقے کی ترجیحات میں شامل ہی نہیں، سندھ حکومت اور وفاقی حکومت من پسند آئی جی سندھ کی تعیناتی کیلئے نورا کشی میں مصروف ہیں ۔

 اس موقع پر مجلس وحدت مسلمین صوبہ سندھ کے ڈپٹی سیکریٹری چوہدری اظہر حسین مجلس وحدت مسلمین تحصیل گڑھی یاسین کے سیکرٹری جنرل مستنصر مہدی ابڑو محمد ملوک چانڈیو نوید علی شاہ طارق حسين اور ضلع شکارپور کے سیکرٹری جنرل اصغر علی سیٹھار بھی ہمراہ تھے۔

وحدت نیوز (رتوڈیرو) شہید عبدالمجید جلبانی کی پانچویں برسی کے موقع پر منعقدہ مجلس عزا سے خطاب کرتے ہوئے علامہ مقصودعلی ڈومکی نے کہا ہے کہ شہداء محفل بشریت کی شمع ہیں جو خود جل کر انسانوں کو روشنی فراہم کرتے ہیں۔ ہم نے ظلم کے خلاف قیام اور حق گوئی اور ولایت کے دفاع کا درس حضرت فاطمہ زہرا سلام اللہ علیہا سے لیا۔

انہوں نے کہا کہ کشمیر اور فلسطین میں جاری مظالم کے خلاف پوری امت مسلمہ کو صدائے احتجاج بلند کرنی چاہیے۔ یوم یکجہتی کشمیر کے موقع پر مظلوم کشمیریوں کو اپنے مکمل تعاون کا یقین دلاتے ہیں کشمیر کی آزادی کے لئے ہر سطح پر آواز بلند کریں گے۔

انہوں نےکہا کہ ہندوستانی وزیر اعظم مودی جنگی جنون رکھتا ہے مودی عالمی امن کے لئے خطرہ ہے۔ مودی کے انڈیا اور اسرائیل کے بڑھتے ہوئے تعلقات اسلام دشمنی پر مبنی ہے۔

انہوں نےکہا کہ کشمیر اور فلسطین کا مسئلہ ایک دوسرے سے مماثلت رکھتا ہے۔ پاکستانی حکمرانوں کو چاہئے کہ وہ ان خائن حکمرانوں سے کشمیر سے متعلق کسی خیر کی امید نہ رکھیں جنہوں نے فلسطین کا سودا کیا۔

وحدت نیوز(حیدرآباد) مجلس وحدت مسلمین پاکستان صوبہ سندھ کے سیکرٹری جنرل علامہ باقر عباس زیدی نے کہا ہے کہ درگاہ لعل شہبازقلندر میں خودکش حملہ وہ المناک سانحہ ہے جسے کبھی فراموش نہیں کیا جا سکتا۔اس روز سو سے زائد قیمتی جانوں کو دہشت گردی کے عفریت نے نگل لیا۔دہشت گردوں نے ایک ولی اللہ کے مزار کو خاک و خون میں نہلا کر اس بات کا ثبوت دیا کہ ان دہشت گردوں کا اسلام سے کوئی تعلق نہیں۔14فروری کو سانحہ سہون شہداء کی برسی کے موقع پر جمعہ کو شب شہداء منایاجائے گا جس میں مجلس وحدت مسلمین سمیت دیگر سیاسی و مذہبی جماعتوں کے رہنما ؤں اور عوام بڑی تعداد میں شریک ہوں گے۔ان خیالات کا اظہار انہوں نےحیدر آباد پریس کلب میں منعقدہ نیوز کانفرنس سے خطاب میں کیا اس موقع پر صحافیوں کی بڑی تعداد موجود تھی۔

علامہ باقر عباس زیدی نے کہا کہ ولی اللہ کے مزارات امن و محبت کے مراکز ہیں۔جہاں اتحاد و اخوت اور امن کا درس ملتا ہے۔جو مذموم عناصر ملک عبادت گاہوں اور شعائر اللہ کا نشانہ بنا کر ملک میں انتشار اور بد امنی پھیلانا چاہتے ہیں ان کے خلاف بھرپور کاروائی کی جانی چاہیے۔انہوں نے کہا کہ دہشت گردی کے خلاف جنگ کے خاطر فیصلہ کن مراحل میں داخل ہو چکی ہے۔ ملک میں دہشت گردی کے واقعات میں نمایاں کمی آئی ہے۔ تاہم دہشت گردوں کے لیے درد دل رکھنے والے سہولت کار اوران سے فکری ہم آہنگی رکھنے والے عناصر وطن عزیز کے لیے مستقل خطرہ ہیں۔ان کے خلاف گھیرا تنگ کر کے ہی ملک و قوم کو امن کی ضمانت دی جا سکتی ہے۔انہوں نے کہا کہ سانحہ سہون تین سال گزرنے کے باوجود واقعے کے ذمہ داران کو انصاف کے کٹہر ے میں نہیں لایا گیا۔مظلومین کو انصاف دلانے کا مقدمہ اب تک التواء کا شکار ہے جس سے ملکی عوام میں مایوسی پائی جاتی ہے۔ فوجی عدالتوں کے قیام کے بعد پوری قوم کو اطمنان تھا کہ اس ملک کو اب دہشت گردی کے عفریت سے چھٹکار ا حاصل ہو جائے گا لیکن بدقسمتی سے چند مخصوص سانحات کے ذمہ داروں کے خلاف فیصلوں کے علاوہ کوئی ایسا قابل ذکر فیصلہ نہ ہوا جس سے شہد ا کے لواحقین کی داد رسی ہوئی ہو۔

انہوںنے کہاکہ سندھ حکومت کی طرف سے شہدا کے خاندانوں کے ساتھ کیے گئے وعدے بجا طورپر پورے نہیں کیے گئے۔سانحہ سہون،سانحہ جیکب آباد اورسانحہ شکار پور کی طرح متعدد سانحات کا شکار ہونے والو ں کے غمزدہ وارثان آج بھی انصاف کے متلاشی اور حکمرانوں کی بے حسی پر سراپا احتجاج ہیں۔حکومت عوام کا خون چوسنے میں مصروف ہے۔انہیں اپنے مفادات کے سوا کسی سے کوئی غرض نہیں۔حکمرانوں کی ناکام پالیسیوں نے ملک کو بحرانوں کو شکار کر دیا ہے۔جمہوریت کے نام پر جمہوری اقدار کا جنازہ نکال کر رکھ دیا گیا۔ سیاسی جماعتوں میں بھی دہشتگردوں کے سہولت کار موجود ہیں جو کارروائی نہیں ہونے دیتے۔علامہ باقر عباس زیدی نے سندھ حکومت سے مطالبہ کیا کہ وہ شہدائے سانحہ سہون کے وارثان سے کئے ہوئے اپنے امدادی رقوم اور نوکریوں کے وعدے کو پورا کرے۔ التواء کے شکار ا مقدمے کو اپنے منتقی انجام تک پہچایا جائے اورسانحہ سہون میں ملوث دہشتگردوں کو سر عام پھانسی دی جائے۔انہوں نے سانحہ سیہون کے شہدا کی بلندی درجات اور اہل خانہ کے صبر کے لیے دعا بھی کی۔

وحدت نیوز(جیکب آباد) ایام فاطمیہ کی مناسبت سے چک سٹی میں منعقدہ مجلس عزا سے خطاب کرتے ہوئے مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ حضرت آسیہ کا اللہ تعالی پر کامل ایمان تھا اور آپ فرعون اور فرعونی نظام سے بیزار تھیں قرآن کریم نے حضرت آسیہ کے عظمت کردار کا ذکر کرتے ہوئے انہیں اھل ایمان کے لئے مثالی شخصیت قرار دیا۔انہوں نےکہا کہ سیدہ فاطمہ زہرا سلام اللہ علیہا کو اولین و آخرین کی سردار ہیں آپ ہم سب کے لئے اسوہ ہیں۔

انہوں نےکہا کہ آپ کا حق و صداقت دین اسلام اور ولایت کے لئے قیام اور راہ خدا میں مصائب و آلام کو برداشت کرنا ہر دور کے اہل حق کے لئے اسوہ ہے۔انہوں نےکہا کہ سیدہ کائنات حضرت فاطمہ زہرا سلام اللہ علیہا کی صداقت کی گواہی قرآن کریم نے دی لہذا آپ کو صدیقہ کبری کا لقب ملا۔

وحدت نیوز(گلگت) مجلس وحدت مسلمین گلگت بلتستان کے ڈپٹی سیکرٹری جنرل علامہ نیئر عباس مصطفوی نے کہا ہے کہ کوئی بھی آرڈر گلگت بلتستان کے عوامی حقوق کا نعم البدل نہیں ہو سکتا۔ عوام ماضی کی طرح نئے آرڈر کو بھی مسترد کر دینگے۔ جی بی کی متنازعہ حیثیت کے تناظر میں تمام تر بنیادی حقوق کا مطالبہ کرتے ہیں۔ صوبائی حکومت آنے والے الیکشن کو ہائی جیک کرنے کیلئے پبلک انٹرسٹ سے ہٹ کر ترقیاتی منصوبوں پر کام کر رہی ہے۔ چیف سیکرٹری عوامی مفاد کے منصوبوں کو یقینی بنائیں، الیکشن کمیشن صوبائی حکومت کے سامنے بے بس نظر رہا ہے۔

نماز جمعہ کے اجتماع سے خطاب میں وفاقی حکومت کی جانب سے ایک اور آرڈر جاری کرنے کے بیان پر سخت رد عمل دیتے ہوئے کہا کہ جی بی کے عوام ماضی کی طرح اس نئے آرڈر کو بھی مسترد کر دینگے۔ انہوں نے کہا کہ سپریم کورٹ کے فیصلے کی روشنی میں جی بی کو متنازعہ خطے کے تمام تر بنیادی حقوق دیئے جائیں اور یہاں کے عوام کی خواہشات کو مدنظر رکھ کر ہی فیصلے وفاق کے حق میں بہتر ہونگے۔ جی بی کے عوام نے جن جذبات اور خلوص سے اس خطے کا پاکستان کے ساتھ الحاق کیا تھا وفاقی حکمرانوں نے ہمارے جذبات اور خلوص کو ٹھکرا دیا ہے، اب بھی وقت ہے کہ حکمران ہوش کے ناخن لیں اور جی بی کے عوام کو مطمئن کریں۔


وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل علامہ احمد اقبال رضوی نے کہا ہے کہ کشمیر کی آزادی قریب پہنچ چکی ہے۔ بھارت میں علیحدگی پسند تحریکیں غیر معمولی طور پر زور پکڑ رہی ہیں۔وہ دن دور نہیں جب دنیا کے نقشے پر بھار ت مختلف ریاستوں میں منقسم نظر آئے گا۔ ایم ڈبلیو ایم 5 فروری کو یوم یکجہتی کشمیر بھرپوراندازسے منائے گی۔تنظیم کے مرکزی سیکرٹریٹ سمیت ضلعی و صوبائی دفاتر میں تقریبات منعقد کی جائیں گی۔

 انہوں نے کہا کہ مقبوضہ کشمیر کے باسی نہ کبھی پہلے تنہا تھے اور نہ اب تنہا ہیں۔ ہرمشکل گڑی میں پاکستانی قوم نے کشمیریوں کے مسلمانوں کی بھرپور تائید کرتے ہوئے ان کے حقوق کے لیے ہر سطح پر آواز بلند کی ہے۔ کشمیر پاکستان کی شہ رگ ہے کوئی روایتی جملہ نہیں بلکہ وہ حقیقت ہے جسے جھٹلایا نہیں جا سکتا۔ پاکستان کے ہر شہری کا کشمیری عوام سے مضبوط رشتہ ہے جس میں دنیا کی کوئی طاقت دراڑیں نہیں ڈال سکتی۔اپنے ظالمانہ ہتھکنڈوں سے آزادی کی تحریک کو کچلنے کی بھارتی سوچ سوائے خام خیالی کے اور کچھ نہیں۔

ان کا کہنا تھا کہ آج پورے ہندوستان کی سا لمیت لامحدود خطرات میں جھکڑی ہوئی ہے جس کا بنیادی سبب ہندوستانی وزیر اعظم موودی کی غیر دانشمندانہ و غیر جمہوری اقدامات ہیں۔بھارت کی موجودہ حکومت کے مخالف ملک کے اقلیتی طبقات ہی نہیں بلکہ ہندوں بھی بھارتی حکومت کی پالیسیوں سے سخت نالاں ہیں۔بھارتی وزیر اعظم اپنی خجالت چھپانے کے لیے منفی حربے اختیار کر رہے ہیں۔موجودہ صورتحال میں پاکستان کو کشمیری عوام کی آزادی کے لیے ٹھوس اور جرات مندانہ موقف اختیار کرنے کی ضرورت ہے۔

انہوں نے کہا کہ آزاد ریاستوں کی خارجہ پالیسی کسی گومگوں یا مصلحتوں کا شکار ہونے کی بجائے دو ٹوک ہوتی ہے۔مسئلہ کشمیر کے حوالے سے پاکستان جس اصولی موقف پر قیام پاکستان کے وقت کھڑا تھا آج بھی اسی اٹل حقیقت پر قائم رہنے کی ضرورت ہے۔مسئلہ کشمیر کو کشمیری عوام کے امنگوں کے مطابق حل کرنے کے علاوہ کسی دوسرے آپشن کی قطعاَََ کوئی گنجائش نہیں ہے۔انہوں نے کہا کہ حکومت پاکستان اقوام متحدہ کی قراردادوں کے مطابق اس مسئلے کے حل پر زور دے۔

وحدت نیوز(کراچی) صوبائی سیکرٹریٹ مجلس وحدت مسلمین سندھ کے تحت مجلس عزا شہادت دختر رسول خدا ص حضرت سیدہ فاطمتہ الزہرا سلام اللہ علیہا کے سلسلے میں وحدت ہاؤس سولجر بازار میں منعقد ھوئی جسمیں حدیث کساء ناصر الحسینی ، سوز خوانی ، سلام علی رضا جعفری و برادران جبکہ انجمن بہار فاطمہ ؑ سولجر بازار نے نوحہ خوانی و سینہ زنی کی، ایم ڈبلیو ایم کے ذمہ دارن و مومنین نے شرکت کی۔

 مجلس سے مجلس وحدت مسلمین صوبہ سندھ کے سیکرٹری جنرل علامہ باقر عباس زیدی نے خطاب کرتے ھوئے کہا کہ بی بی فاطمہ زہرا سلام اللہ علیہا کی سیرت و کردار اور طرز زندگی عالم انسانیت کیلئے مشعل راہ ہے جناب سیدہ ؑ وہ عظیم خاتون ہیں جو عصمت و طہارت کے ساتھ جرات و بہادری میں اپنی مثال ہیں جناب فاطمہ سلام اللہ علیہا نے دین اسلام کیلئے گرانقدر خدمات انجام دیں اور رسول خدا ؐاور امیر المومنین ؑکے ہمراہ سخت و کٹھن جدوجہد کے ذریعہ اسلام محمدی کی آبیاری کی۔

 مجلس و ماتمداری کے اختتام پر مومنین کیلئے نیاز کا اہتمام کیا گیا تھا ،صوبائی رہنما بردار ناصر حسینی نے کہا کہ 4 فروری 2020ء بروز منگل بعد نماز مغربین محفل شاہ خراسان روڈ پر ھفتہ وار دعائیہ اجتماع اور شہید مظفر کرمانی ، شہید نظیر عباس و کشمیری شہداء اور اظہارِ یکجہتی کیلئے دعائے توسل و چراغاں کیا جائے گا۔

وحدت نیوز(جیکب آباد) مجلس وحدت مسلمین پاکستان کے مرکزی ترجمان علامہ مقصود علی ڈومکی نے دوداپور اور امیر آباد میں مومنین کے اجتماع سے خطاب کرتے ہوئے کہا ہے کہ فلسطینیوں کی شمولیت کے بغیر فلسطین سے متعلق کوئی بھی فیصلہ قبول نہیں امریکہ امت مسلمہ کا دشمن سامراجی ملک ہے جو مسئلہ فلسطین کے حل سے مخلص نہیں ٹرمپ کی جانب سے غاصب اسرائیل کی حمایت سے یہ بات واضح ہے کہ امریکہ مسئلہ فلسطین میں غیر جانبدار ثالث نہیں بلکہ شریک جرم ہے جس کے ہاتھ فلسطین کے مظلوموں کے خون سے رنگین ہیں۔

انہوں نےکہا کہ ڈیل آف سینچری سامراجی طاقتوں کی استعماری جال ہے جسے امت مسلمہ کسی طور قبول کرنے کے لئے تیار نہیں۔انہوں نےکہا کہ امریکہ اور اسرائیل کے غلام عرب حکمرانوں نے سر زمین فلسطین اور امت مسلمہ سے خیانت کرکے ٹرمپ کو خوش کیا ہے۔انہوں نےکہا کہ فلسطین عنقریب آزاد ہوگا اور اسلام دشمن سامراجی طاقتوں کی تمام تر سازشیں ناکام ہوں گی۔

Page 8 of 1012

مجلس وحدت مسلمین پاکستان

مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاء ہمارا نصب العین ہے 


MWM Pakistan Flag

We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree